ဖေဖော်ဝါရီ ၁၅ ။ ။ ကမ္ဘာ့အကြီးဆုံး ခရီးသည်တင်လေယာဉ်အမျိုးအစားဖြစ်တဲ့ A380 superjumbo ကို ဆက်မထုတ်တော့ဖို့ ဥရောပ လေယာဉ်ထုတ်ကုမ္ပဏီကြီး Airbus က ဆုံးဖြတ်လိုက်ပြီ ဖြစ်ပါတယ်။
အဆိုပါ A380 လေယာဉ် ထုတ်လုပ်ရတာဟာ ကုန်ကျစရိတ် အင်မတန် ကြီးမားလွန်းလှပြီး ယင်းကုန်ကျစရိတ်ကို ထေကာမိစေဖို့အတွက် လုံလောက်တဲ့ အမှာစာတွေ မရရှိတဲ့နောက် ယခုလို ထုတ်လုပ်မှု ရပ်ဆိုင်းဖို့ Airbus က စီစဉ်လိုက်ရတာဖြစ်ပါတယ်။
Airbus အနေနဲ့ အဆိုပါ A380 superjumbo လေယာဉ်ပရိုဂရမ်ကို စွန့်လွှတ်ပြီး အရွယ်အစား ပိုသေးတဲ့ လေယာဉ်တွေဘက်ကို ပိုမိုဦးစားပေးထုတ်လုပ်သွားဖို့ ရှိနေတာဖြစ်ပါတယ်။
အဆိုပါ A380 လေယာဉ် မှာယူထားမှုတွေအတွက် ပေးပို့မှုတွေကို လာမယ့် ၂၀၂၁ ထဲမှာ အပြီးလုပ်ဆောင်သွားမှာ ဖြစ်ကြောင်း Airbus က ဖေဖော်ဝါရီ ၁၄ ရက်မှာ ထုတ်ပြန်သွားပါတယ်။
ဒါဟာ A380 ရဲ့ အကြီးဆုံး customer ဖြစ်တဲ့ Emirates လေကြောင်းလိုင်းက ယင်း အထင်ကရ လေယာဉ် မှာယူမှုတွေကို လျှော့ချပြီး အရွယ်အစားပိုသေးတဲ့ လေယာဉ် မော်ဒယ်တွေကို ပိုမှာယူခဲ့တဲ့နောက်ပိုင်း ယခုလို Airbus ရဲ့ ဆုံးဖြတ်ချက် ထွက်ရှိလာခြင်းလည်း ဖြစ်ပါတယ်။