ရန်ကုန်၊ နိုဝင်ဘာလ ၁၆ ။ ။ လူမှုကွန်ရက်စာမျက်နှာပေါ်တွင် ဟာသရုပ်သံတိုများဖြင့် လူသိများခဲ့သော သရုပ်ဆောင် အောင်ရဲထွေး သေ ဆုံးခဲ့သည့်အမှုတွင် လာဘ်စားမှုဖြင့် တရားရင်ဆိုင်နေရသည့် ရန်ကုန်တိုင်းဥပဒေချုပ်ဟောင်းဦးဟန်ထူး အပါ အဝင် ၅ ဦးအမှု၌ တရားလို၏ ထွက်ဆိုချက်များအားဆက်လက်မှတ်တမ်းတင်ရန် ရန်ကုန်တိုင်းဒေသကြီး တိုင်း တရားလွှတ်တော်မှ တရားသူကြီးက ကြားဖြတ်အမိန့်ချမှတ်လိုက်သည်။
နိုဝင်ဘာလ ၁၆ ရက်နေ့တွင် ရန်ကုန်တိုင်းဒေသကြီးတိုင်းတရားလွှတ်တော်၌ တိုင်းဥပဒေချုပ်ဟောင်း ဦးဟန်ထူးအပါအဝင် ၅ ဦးအား ၇ ကြိမ်မြောက်ရုံးထုတ်ခဲ့ပြီးစွပ်စွဲခံထားသူများဘက်မှ လိုက်ပါဆောင်ရွက် ပေးသည့် ရှေ့နေများ၏ ကန့်ကွက်ထားချက်ကို ကြားဖြတ်အမိန့်ချမှတ်ခဲ့ခြင်းဖြစ်သည်။
“ ဒီနေ့ အမိန့်ချတယ်။ ကျွန်တော်တို့ကတဆင့်ကြားဖြစ်တယ်။ ရဲရှေ့ထွက်ချက်ဖြစ်တယ်ဆိုပြီးတော့ ကျွန်တော် တို့ မှတ်တမ်းမတင်သင့်ဘူးပြောတော့ ရုံးတော်က မှတ်တမ်းတင်ခွင့်ရှိတယ် ဆိုပြီး အမိန့်ချလိုက်တယ်”ဟု ရန်ကုန်တိုင်းဥပဒေချုပ်ဟောင်းဦးဟန်ထူးဘက်မှ လိုက်ပါဆောင်ရွက်ပေးနေသည့် တရားလွှတ်တော် ရှေ့နေ ဦးမင်းစိန်ကပြောသည်။
တရားလို၏ ထွက်ဆိုချက်များမှာဥပဒေနှင့် မညီသည့်အပြင် ရဲရှေ့ထွက်ဆိုချက်များဖြစ်သည်ဟုဆိုကာ ရာဇဝတ် ကျင့်ထုံး- ၁၆၂ ဖြင့် စွပ်စွဲခံရသူများဘက်မှ ကန့်ကွက်ကြောင်း တင်ပြထားခြင်းဖြစ်သည်။
အဂတိလိုက်စားမှုတိုက်ဖျက်ရေးဥပဒေမှာ အထူးဥပဒေဖြစ်သည့်အတွက် ရာဇဝတ်ကျင့်ထုံးနှင့် သက်ဆိုင်ခြင်း မရှိ ဟုဆိုကာစွပ်စွဲခံရသူများဘက်မှ တင်ပြထားသည့် ကန့်ကွက်မှုကိုတိုင်းတရားသူကြီးက ပယ်ချလိုက်ပြီး တရားလို၏ ထွက်ဆိုချက်များကိုဆက်လက်မှတ်တမ်းတင်ရန် ကြားဖြတ်အမိန့် ချမှတ်လိုက်ခြင်းဖြစ်သည်။
လာဘ်စားမှုဖြင့် တရားရင်ဆိုင်နေရသည့် ရန်ကုန်တိုင်းဥပဒေချုပ်ဟောင်းအပါအဝင် ၅ ဦးအမှုအား စစ်ဆေးနေ သည်မှာ နိုဝင်ဘာလ ၁၆ ရက်နေ့ထိ ရုံးချိန်းပေါင်း ၇ ချိန်းထိရှိနေပြီးဖြစ်သော်လည်း တရားလိုဖြစ်သူအားစစ်နေ သည်မှာ ပြီးစီးမှုမရှိသေးပေ။
“ ဒါကနာရီချိန်နည်းတာလည်း ပါနိုင်တယ်။ နောက်ပြီးတော့ ကျွန်တော်တို့ အကြောင်းတစ်ခုရှိလို့ချင်ရင် ဘာပဲ ဖြစ်စေပေါ့။ နှစ်ဖက်ကန့်ကွက်ချက်ဘာညာရှိတော့ လျှောက်လဲချက်ကတော့ ကြားနာရတယ်။ လျှောက်လဲချက် ကြားနာမှလည်းတရားသူကြီးကအမိန့်ချမှာကိုး”ဟုတရားလွှတ်တော်ရှေ့နေဦးမင်းစိန်ကပြောသည်။
သရုပ်ဆောင်အောင်ရဲထွေးသေဆုံးခဲ့သည့်အမှုတွင် လူသတ်မှု ကျူးလွန်သူဟု စွပ်စွဲခံရသူ ၃ ဦး လွတ်မြောက် နိုင်ရေးအတွက် ကျပ်သိန်း ပေါင်း ရဝဝ ကျော် စုပေါင်းလာဘ်စားခဲ့သည်ဟု ဆိုကာ ရန်ကုန်တိုင်းဒေသကြီး ဥပဒေချုပ် ဦးဟန်ထူး၊ တိုင်းဥပဒေ အရာရှိဦးသိန်းဇော်၊ ခရိုင်ဥပဒေအရာရှိဦးကိုကိုလေး၊ ဒုခရိုင်ဥပဒေအရာရှိ ဒေါ်သစ်သစ်ခင်၊ တရားသူကြီး ဦးအောင်ကြည်နှင့် ရဲအုပ်ချစ်ကိုကိုတို့ကို အဂတိလိုက်စားမှု တိုက်ဖျက်ရေး ကော်မရှင်မှ ပြီးခဲ့သည့် စက်တင်ဘာလ ၁၃ ရက်နေ့တွင် အမှုဖွင့်အရေးယူခဲ့ခြင်းဖြစ်သည်။
