နိုဝင်ဘာ ၁၂ ။ ။ အရှေ့တောင်အာရှဒေသတွင်းမှာ နယ်စပ်ဖြတ်ကျော် e-commerce အရောင်းအဝယ်ကိစ္စတွေကို ယခင်ထက် ပိုမို အဆင်ပြေလွယ်ကူသွားစေနိုင်မယ့် သဘောတူညီချက်တစ်ရပ်ကို နိုဝင်ဘာ ၁၂ ရက်က အာဆီယံစီးပွားရေးဝန်ကြီးတွေ သဘောတူ လက်မှတ်ရေးထိုးခဲ့ကြတယ်လို့ သိရပါတယ်။
အဆိုပါ စာချုပ်အတွက် ဆွေးနွေးမှုတွေကို ယမန်နှစ် ဇွန်လကတည်းက စတင်ခဲ့ရတာဖြစ်ပြီး ကိုးကြိမ်မြောက် ညှိနှိုင်းဆွေးနွေးမှုတွေလုပ်ဆောင်အပြီးမှာတော့ ယခုလို သဘောတူစာချုပ် ချုပ်နိုင်ခဲ့တာဖြစ်ပါတယ်။ ဒါ့အပြင် အဆိုပါ စာချုပ်ဟာ အာဆီယံအုပ်စုရဲ့ ပထမဆုံးသော e-commerce ဆိုင်ရာ သဘောတူညီချက်လည်း ဖြစ်ပါတယ်။
ချုပ်ဆိုလိုက်တဲ့ အဆိုပါစာချုပ်အရဆိုရင် နယ်စပ်ဖြတ်ကျော် e-commerce အရောင်းအဝယ်လုပ်ငန်းတွေကို အဆင်ပြေလွယ်ကူသွားစေဖို့ ရှိတဲ့အပြင် အဖွဲ့အတွင်း e-commerce ဆိုင်ရာ အသုံးချလုပ်ကိုင်မှုပိုင်းမှာ ယုံကြည်စိတ်ချရမှုပိုင်းကိုပါ တိုးတက်အောင် နှိုးဆွပေးနိုင်ဖို့ ရည်ရွယ်တယ်ဆိုပြီး စင်ကာပူ ကုန်သွယ်ရေးနဲ့ စက်မှု ဝန်ကြီး Chan Chun Sing က ပြောသွားပါတယ်။
၁၇ ကြိမ်မြောက် အာဆီယံ စီးပွားရေး အသိုက်အဝန်း AEC ကောင်စီ အစည်းအဝေးရဲ့ ဘေးပန်းပြင်ပမှာ သီးခြား လုပ်ဆောင်တဲ့ လက်မှတ်ရေးထိုးမှုအခမ်းအနားမှာ ၎င်းက အထက်ပါအတိုင်း ပြောဆိုသွားတာဖြစ်ပါတယ်။
ဒါ့အပြင် ယခု စာချုပ်ကို ချုပ်ဆိုခြင်းအားဖြင့် အာဆီယံအဖွဲ့ဝင် နိုင်ငံတွေအကြား ပူးပေါင်းဆောင်ရွက်မှုတွေကို ပိုမို နက်ရှိုင်းသွားစေဖို့ ရှိနေကြောင်းလည်း သိရပါတယ်။
