စက်တင်ဘာ ၂၃၊ ရန်ကုန်။ ။ မြန်မာ့လက်ရွေးစင်အမျိုးသမီးအသင်း ဝါရင့်ကစားသမားဖြစ်သည့် အသင်းခေါင်းဆောင် စန်းစန်းမော်နှင့် သန်းသန်းထွေးတို့သည် ၂၀၁၆ အိုလံပစ်ခြေစစ်ပွဲ ဒုတိယအဆင့်ပွဲစဉ်များအပြီး၌ ကစားသမားဘဝမှ အနားယူလိုက်ပြီ ဟု တရားဝင်ကြေငြာခဲ့သည်။
စန်းစန်းမော်နှင့် သန်းသန်းထွေးတို့သည် ၂၀၀၁ ဆီးဂိမ်းပြိုင်ပွဲမှ စတင်ကာ အမျိုးသမီးလက်ရွေးစင်အသင်းတွင် ပါဝင်ကစားခဲ့ပြီး အအောင်မြင်ဆုံးအဖြစ် ၂၀၀၄ နှင့် ၂၀၀၇ ခုနှစ် တို့တွင် အသင်းနှင့်အတူ အာဆီယံအမျိုးသမီး ချန်ပီယံဆုဖလားရရှိအောင် စွမ်းဆောင်ပေးနိုင်ခဲ့သည်။
“ ဒီခြေစစ်ပွဲအပြီးမှာ ကစားသမားဘဝက အနားယူပါပြီ။ လက်ရှိ ဒဏ်ရာကလည်း ရှိနေတယ်။ အသက်အရွယ်ကြောင့် မကစားချင်တော့တာရောကြောင့်ပါ။ ဘောလုံးမကစားဖြစ်တော့ရင် ဘာဆက်လုပ်မယ်ဆိုတာတော့ အခုထိ မဆုံးဖြတ်ရသေးပါဘူး။ အခြားစီနီယာတွေလို နည်းပြဘ၀ ပြောင်းမယ် မပြောင်းဘူး ဆိုတာလည်း မသေချာသေးပါဘူး။ ပြိုင်ပွဲကလည်း ပြီးတာမကြာသေးတော့ မဆုံးဖြတ်ရသေးတာပါ။ ခြေစစ်ပွဲမှာ ရလဒ်မကောင်းခဲ့တဲ့အတွက် စိတ်မကောင်းပါဘူး ” ဟု အမျိုးသမီးလက်ရွေးစင် ကွင်းလယ်ကစားသမား သန်းသန်းထွေးက သူ၏ အနာဂတ်နှင့် ပတ်သက်၍ ပြောသည်။
မြန်မာ့လက်ရွေးစင်အမျိုးသမီးအသင်းသည် ၂၀၁၆ အိုလံပစ်ခြေစစ်ပွဲ အာရှဇုန် ပထမအဆင့်၌ အိန္ဒိယ၊ သီရိလင်္ကာ၊ ဘာရိန်း စသည့်အသင်းများကို ကျော်ဖြတ်နိုင်ခဲ့သော်လည်း ဒုတိယအဆင့်ခြေစစ်ပွဲတွင် တရုတ်တိုင်ပေ၊ ဂျော်ဒန်တို့ကို အနိုင်ရခဲ့ကာထိုင်း၊ ဗီယက်နမ် တို့ကို ရှုံးနိမ့်ခဲ့သဖြင့် နောက်ဆုံးအဆင့်သို့ မတက်ရောက်နိုင်ပဲ ပြိုင်ပွဲမှ ထွက်ခွာခဲ့ရသည်
