ခရစ်ယာန်ဂိုဏ်းအုပ်များ ခန့်အပ်ရေး သမိုင်းဝင်သဘောတူညီချက် တရုတ်-ဗာတီကန်အကြား ရရှိ

.

စက်တင်ဘာ ၂၃ ။         ။ တရုတ်နဲ့ ဗာတီကန်နန်းတော်အကြား ခရစ်ယာန် ဂိုဏ်းအုပ်ဘုန်းတော်ကြီးများ ခန့်အပ်ရေး သမိုင်းဝင်သဘောတူညီချက်တစ်ရပ် ချုပ်ဆိုနိုင်ခဲ့ကြောင်း စက်တင်ဘာ ၂၂ ရက်က ထုတ်ဖော်ကြေညာခဲ့ပါတယ်။

ဒါဟာ ကွန်မြူနစ်နိုင်ငံနဲ့ ဗာတီကန်တို့အကြား ကာလကြာအေးခဲနေခဲ့တဲ့ ဆက်ဆံရေးကို တိုးတက်စေခဲ့တဲ့အပြင် ယခုသဘောတူညီချက် တစ်စိတ်တစ်ဒေသအနေနဲ့ တရုတ်အစိုးရက ခန့်အပ်ထားတဲ့ ခရစ်ယာန်ဂိုဏ်းအုပ် ခုနစ်ဦးကို ပုပ်ရဟန်းမင်းကြီး ဖရန်စစ်က အသိအမှတ်ပြုလက်ခံလိုက်ပြီ ဖြစ်ပါတယ်။

တရုတ်နဲ့ ဗာတီကန်တို့အကြား ၁၉၅၁ ခုနှစ် သံတမန်ဆက်ဆံရေးပြတ်တောက်ခဲ့ပြီးနောက်ပိုင်းကတည်းက ဂိုဏ်းအုပ်ဘုန်းတော်ကြီးတွေ ခန့်အပ်မှုနဲ့ပတ်သက်လို့ အငြင်းပွားမှုတွေ ဖြစ်နေခဲ့တာဖြစ်ပါတယ်။

တရုတ်မှာ ခရစ်ယာန် ဂိုဏ်းအုပ်တွေကို တရုတ်အစိုးရက ၎င်းတို့ဘာသာ ခန့်အပ်အတည်ပြုခွင့်ရှိတယ်ဆိုပြီး နှစ်များစွာကြာ အခိုင်အမာ ပြောဆိုနေခဲ့ခြင်းက ပုပ်ရဟန်းမင်းကြီးကပဲ ရွေးချယ်ခန့်အပ်ရသည့် လုပ်ပိုင်ခွင့်ကို ဆန့်ကျင်ရာ ရောက်နေခဲ့ခြင်း ဖြစ်ပါတယ်။

လက်ရှိအချိန်မှာတော့ တရုတ်မှာတော့ ခရစ်ယာန်ဘာသာဝင်အသိုင်းအ၀ိုင်းအကြား အစိုးရက တရားဝင် ခွင့်ပြုပေးထားတဲ့ ကက်သလစ်ကျောင်းတွေကို ကိုးကွယ်တဲ့အုပ်စုနဲ့ ပုပ်ရဟန်းမင်းကြီးကို သစ္စာခံတဲ့ တရားမ၀င်ကက်သလစ်ကျောင်းတွေကို ကိုးကွယ်သူအုပ်စုဆိုပြီး နှစ်ခြမ်းကွဲနေလျက်ရှိပါတယ်။

ယခု ရရှိခဲ့တဲ့ သမိုင်းဝင်သဘောတူညီချက်ကြောင့် အတိတ်က ရှိခဲ့တဲ့ ဒဏ်ရာဒဏ်ချက်တွေကို ကုစားကျော်လွှားနိုင်မယ်လို့ ပုပ်ရဟန်းမင်းကြီးက မျှော်လင့်ထားကြောင်း ဗာတီကန်က ထုတ်ပြန်ပါတယ်။

ယခု သဘောတူညီချက်ကြောင့် ရှေ့ကာလမှာ တရုတ်မှာ ခန့်အပ်မယ့် ခရစ်ယာန် ဂိုဏ်းအုပ်တွေကို တရုတ်အာဏာပိုင်တွေက နာမည်စာရင်း တင်သွင်းပြီး ပုပ်ရဟန်းမင်းကြီးက အတည်ပြုပေးရဖို့ ရှိနေကြောင်း သိရပါတယ်။