ပစ်ခတ်မှုများရှောင်ရှားနိုင်ရေး နယ်မြေတည်ဆောက်ခြင်းမလုပ်ကြရန် ဗိုလ်ချုပ်ရာပြည့်ပြော

.

ရန်ကုန်၊ စက်တင်ဘာ ၁၂ ။          ။ တစ်နိုင်ငံလုံးအပစ်ရပ်စာချုပ် (NCA) ရေးထိုးထားသည့်တိုင်းရင်းသားလက်နက်ကိုင်များ အချင်းချင်းနှင့် တပ်မတော်တို့အကြား ပစ်ခတ်မှုများမဖြစ်စေရန်အတွက် နယ်မြေတည်ဆောက်ခြင်း၊ အင်အား တည်ဆောက်ခြင်းများမပြုလုပ်ကြရန် JMC-U ဥက္ကဋ္ဌ ဒုတိယဗိုလ်ချုပ်ကြီးရာပြည့်က ပြောကြားလိုက်သည်။

ရန်ကုန်မြို့၊ရွှေလီလမ်းရှိ အမျိုးသားပြန်လည်သင့်မြတ်ရေးနှင့်ငြိမ်းချမ်းရေးဗဟိုဌာန (NRPC) တွင် ၁၈  ကြိမ် မြောက် ပြုလုပ်နေသည့်  ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ(JMC-U) ၏ ပုံမှန်အစည်းအဝေးအဖွင့်မိန့်ခွန်းတွင် ထည့်သွင်းပြောကြားလိုက်ခြင်း ဖြစ်သည်။

“ လက်ရှိအနေအထားမှာဖြစ်ပေါ်နေတဲ့ ပဋိပက္ခတွေကို ကြည့်လို့ရှိရင် အင်အားတည်ဆောက်တာတွေ၊ နယ်မြေ တည်ဆောက်တာတွေ ဒီပေါ်မှာအခြေခံပြီး ဖြစ်ပွားနေတာတွေ့ရပါတယ်။ အခုလိုတစ်ဖက်နဲ့တစ်ဖက် ယုံကြည်မှုတည်ဆောက်နေတဲ့ကာလမှာ ပစ်ခတ်ရင်ဆိုင်မှုများကိုရှောင်ရှားဖို့အတွက် နယ်မြေ တည်ဆောက် တာတွေ၊ အင်အားတည်ဆောက်တာတွေ ဆောင်ရွက်ခြင်းမပြုဖို့အတွက် ကျွန်တော့်အနေနဲ့ သတိပေး ပန်ကြားလိုပါတယ်” ဟု ဒုတိယဗိုလ်ချုပ်ကြီးရာပြည့်က ပြောသည်။

တပ်မတော်အနေဖြင့် ထာဝရငြိမ်းချမ်းရေးနှင့် ပါတီစုံဒီမိုကရေစီလမ်းကြောင်းကို ဦးတည်ဖော်ဆောင်နေပြီး အင်တားတည်ဆောက်ခြင်းနှင့် နယ်မြေတည်ဆောက်နေခြင်းများသည် ထာဝရငြိမ်းချမ်းရေးတည်ဆောက်ရန် အတွက် ကြီးမားသောအဟန့်အတားဖြစ်စေကြောင်းလည်း ၄င်းကဆိုသည်။

ထို့အပြင် JMC -U  ဒုဥက္ကဋ္ဌ (၁) ဗိုလ်ချုပ် စောအိုင်းဇက်ဖိုးက မြေပြင်မှာလက်နက်ကိုင်ထိတွေ့မှုဖြစ်တိုင်း ဒေသခံပြည်သူများကသာ ခံစားရ၍ တိုက်ပွဲများမဖြစ်စေရန် နှစ်ဖက်လက်နက်ကိုင်များက ထိမ်းသိမ်းရမည်ဟု ဆိုသည်။

“ ပဋိပက္ခတွေဖြစ်တိုင်း တစ်ဦးအပေါ်တစ်ဦး ရှုတ်ချပြစ်တင်ခြင်းဟာလည်း ပြဿနာရဲ့အဖြေမဟုတ်သလို ပြသာနာကိုပိုမိုကြီးထွားစေပြီး ရန်လိုစိတ်၊ မုန်းတီးစိတ်တွေကိုပဲ တိုးပွားစေမှာဖြစ်ပါတယ်။ ဒါကြောင့် ပြသာနာအရင်းအမြစ်တွေကို စေတနာမှန်မှန်ဖြင့် ပွင့်ပွင့်လင်းလင်း ဝေဖန်သုံးသပ် ထောက်ပြနိုင်တဲ့ အလွတ်သဘောဆွေးနွေးမှုများကိုလည်း မကြာခဏ ပြုလုပ်နိုင်ဖို့လိုအပ်မယ်လို့ ထင်ပါတယ်” ဟု ၄င်းက ဆိုသည်။

ယခုပြုလုပ်နေသည့် JMC-U ပုံမှန်အစည်းအဝေးတွင် ကြားကာလအတွင်း အကောင်အထည်ဖော်ခဲ့မှုများ၊ ဒေသခံအရပ်သားစောင့်ကြည့်သူများကိစ္စ၊ JMC လုပ်ငန်းလမ်းညွှန်မှုကြမ်းနှင့် ဘဏ္ဍာရေးကိစ္စများကို ဆွေးနွေးကြမည် ဖြစ်သည်။

အပစ်ရပ် တိုင်းရင်းသားများနှင့် တပ်မတော်ကိုယ်စားလှယ်များ ပါဝင်သည့် JMC အစည်းအဝေး စက်တင်ဘာ ၁၂ ရက်နေ့မှ  ၁၄ ရက် နေ့အထိ ပြုလုပ်သွားမည်ဖြစ်သည်။

ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ(JMC-U) သည် NCA ရေးထိုးထားသည့် တိုင်းရင်းသား လက်နက်ကိုင်များအချင်းချင်းကြားနှင့် တပ်မတော်တို့အကြား တိုက်ပွဲမဖြစ်ပွားစေရန် စောင့်ကြည့် ဆုံးဖြတ်ပေးရသည့် ကော်မတီလည်းဖြစ်သည်။