ကျောက်မီးသွေးတွင်းပေါက်ကွဲမှုမှ သေဆုံးသူများအတွက် တစ်ဦးလျှင် ကျပ်သိန်း ၈၀ လျော်ကြေး ပေးအပ်

.

ဆော၊ စက်တင်ဘာ ၁၁ ။             ။ ကျောက်မီးသွေးတွင်း ပေါက်ကွဲမှုကြောင့် သေဆုံးခဲ့သူကုမ္ပဏီလုပ်သား ရှစ်ဦး၏ ကျန်ရစ်သူမိသားစုများအား စက်တင်ဘာလ ၁၀ ရက်၊ ညနေ ၅ နာရီက ဆောမြို့၊ ယောမင်းကြီးဦးဘိုးလှိုင်ခန်းမ၌ ကုမ္ပဏီဘက်မှ လျော်ကြေးငွေ ပေးအပ်ခဲ့ကြောင်း သိရသည်။

ယခင်က သေဆုံးသူတစ်ဦးလျှင် ကျပ် သိန်း ၂၀ ပေးထားပြီး ယမန်နေ့တွင် ကျပ်သိန်း ၆၀ စီ ထပ်မံပေးအပ်ခဲ့ပြီး သေဆုံးသူတစ်ဦးလျှင် ကျပ် သိန်း ၈၀  ကုမ္ပဏီမှ လျော်ကြေးပေးခဲ့သည်။

ဖြစ်စဉ်မှာ မကွေးတိုင်းဒေသကြီး၊ ဂန့်ဂေါခရိုင်၊ ဆောမြို့နယ်၊ ကျောက်မြောင်းကျေးရွာနှင့် ၂ မိုင်ခန့်အကွာ ထွန်းရာဇသတ္ထုတွင်းတူးဖော်ရေးကုမ္ပဏီလီမိတက်ပိုင် ကျောက်မီးသွေးတွင်းတွင် စက်တင်ဘာလ ၆ ရက်နေ့ နံနက်က ပေါက်ကွဲမှုဖြစ်ပွားရာ လူ ၃ ဦးသေဆုံးပြီး ၅ ဦး ပိတ်မိနေခဲ့ခြင်း ဖြစ်သည်။

အဆိုပါ ကျောက်မီးသွေးတွင်းပေါက်ကွဲမှုတွင် အလောင်းရသူ ၄ ဦး၊ ပိတ်မိနေသူ ၄ ဦး(သေဆုံး)၊ ဒဏ်ရာရသူ ၁ ဦး ဖြစ်သည်။

ခရိုင်ဘေးအန္တရာယ်ဆိုင်ရာ စီမံခန့်ခွဲမှု ဦးစီးဌာန ဂန့်ဂေါနှင့်ပခုက္ကူမှ သေဆုံးသူ တစ်ဦးလျှင် ကျပ် သုံးသိန်း၊ ဒဏ်ရာရသူတစ်ဦးလျှင် ကျပ် ငါးသောင်း ပေးအပ်သွားမည်ဟု သိရသည်။

ဆောမြို့နယ်၊ မြို့နယ်အုပ်ချုပ်ရေးမှူး ဦးမြဝင်းက "ကုမ္ပဏီရှင်းလင်းဆောင်မှာ သေဆုံးသူ ၈ ဦးအတွက် တစ်ဦးလျှင် ကျပ်သုံးသိန်း နှင့်ဒဏ်ရာရှိသူတစ်ဦးအတွက် ကျပ်ငါးသောင်းကို ခရိုင်ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာန ဂန့်ဂေါနှင့်ပခုက္ကူ တို့က ထောက်ပံ့ပေးအပ်တာဖြစ်ပါတယ်။ ယခု တစ်ဦးလျှင် သိန်း ၈၀ စီ ကတော့ ကုမ္ပဏီဘက်က သီးခြားလူမှုရေး ထောက်ပံ့တာဖြစ်ပါတယ်"ဟု ပြောသည်။

ကုမ္ပဏီမန်နေးဂျင်း ဒါရိုက်တာဦးကျော်ထွန်းက သီးခြားထောက်ပံငွေအဖြစ် လုပ်ငန်းခွင်တွင် သေဆုံးခဲ့သည့် အလုပ်သမားရှစ်ဦးအတွက် တစ်ဦးလျှင် ငွေကျပ်သိန်း ၈၀ ကို ကျန်ရစ်သူမိသားစုများထံပေးအပ်ခဲ့ပြီးဒဏ်ရာရရှိခဲ့သည့် ဆေးရုံတက်ရောက်ကုသနေသူတစ်ဦးအား ဆေးဝါးကုသပေးနေကာ ထောက်ပံ့ကြေး ၃ လစာ ကျပ် ၇ သိန်းခွဲ ပေးအပ်သွားမည်ဖြစ်ကြောင်းသိရသည်။