အခြေခံပညာကျောင်းဆောင် ၄သောင်းကျော် ဆောက်လုပ်ရန် အထူးလိုအပ်နေဟု ပညာရေးဝန်ကြီးပြော

.

နေပြည်တော်၊ စက်တင်ဘာ ၁၀ ။        ။ မြန်မာတစ်နိုင်ငံလုံးတွင် ၂၀၁၇-၂၀၁၈ ဘဏ္ဍာရေးနှစ် စာရင်းများအရ မူလတန်း၊ အလယ်တန်း၊ အထက်တန်း ကျောင်းဆောင် စုစုပေါင်း ၄၄၁၂၉ ဆောင် အထူးလိုအပ်နေကြောင်း ပညာရေးဝန်ကြီးဌာန၀န်ကြီး ဒေါက်တာ မျိုးသိမ်းကြီးက ပြောကြားသည်။

“၀န်ထမ်းအိမ်ရာတွေကို ပညာရေးဝန်ကြီးဌာနအနေနဲ့သာ နှစ်စဉ်ဖြည့်ဆည်းဆောင်ရွက်ပေးဖို့ ဖြစ်ပါတယ်။ သို့သော် အထူးလိုအပ်နေတဲ့ မူလတန်း ၊ အလယ်တန်း၊ အထက်တန်း ကျောင်းဆောင် စုစုပေါင်း ၄၄၁၂၉  ဆောင် ဖြည့်ဆည်းပေးဖို့ လိုအပ်လျက်ရှိပါတယ်” ဟု ၄င်းက ပြောကြားသည်။

ယနေ့ စက်တင်ဘာ ၁၀ရက်နေ့က ပြည်ထောင်စုလွှတ်တေ်ာ အစည်းအဝေးတွင်း ပြည်ထောင်စု စာရင်းစစ်ချုပ် ရုံး၏ ၂၀၁၆-၂၀၁၇ ဘဏ္ဍာရေးနှစ် စစ်ဆေးတွေ့ရှိချက် အစီရင်ခံစာအပေါ် ပြည်သူ့ငွေစာရင်းပူးပေါင်းကော်မတီ ၏ လေ့လာတွေ့ရှိချက် နှင့် သဘောထားမှတ်ချက် အစီရင်ခံစာနှင့် လွှတ်တော်ကိုယ်စားလှယ်များ၏ ဆွေးနွေးချက်ကို ပြည်ထောင်စုအဆင့်အဖွဲ့အစည်းဝင် ဒေါက်တာမျိုးသိန်းကြီးက ပြန်လည်ရှင်းလင်းခဲ့ရာ တွင် ယခုကဲ့သို့ ပြောကြားခဲ့ခြင်းဖြစ်သည်။

ထို့ပြင် မူလတန်းတွင် သင်ကြားပြသရန် လိုအပ်သည့် ဆရာ၊ ဆရာမ ၅၀၈၂၀ ဦး၊ အလယ်တန်းပြ ဆရာ၊ ဆရာမ ၂၂၃၃၁ ဦးနှင့် အထက်တန်းပြ ဆရာ၊ ဆရာမ ၁၁၃၅၀ ဦးတို့ကို ခန့်ထားပေးရန် လိုအပ်နေသည်ဟု ဒေါက်တာမျိုးသိမ်းကြီးက ပြောကြားခဲ့သည်။

“ဒါတွေကို တစ်နှစ်တည်းနဲ့ ခန့်ထားဖြည့်ဆည်းပေးဖို့ ဆိုတာ မဖြစ်နိုင်ပါဘူး။ ဒါကြောင့်မို့လို့ ပညာရေးဝန်ကြီး ဌာနအနေနဲ့ ဒီလိုအပ်နေတဲ့ ကျောင်းဆောင်တွေ ဆရာ၊ဆရာမတွေကို ငါးနှစ်အတွင်း ဖြည့်ဆည်းခန့်ထားပေးဖို့ အတွက်ကိုတော့ ဦးစားပေးဆောင်ရွက်သွားမယ်” ဟု ၄င်းက ဆက်လက်ပြောကြားသည်။

၂၀၁၆-၂၀၁၇ခုနှစ် ဘဏ္ဍာရေးနှစ်တွင် ဆရာ၊ ဆရာမနှင့် ၀န်ထမ်းများအတွက် လိုအပ်သည့် အိမ်ရာ (၇၈) ခု အတွက် ကျပ်သန်းပေါင်း ၉၉၆၀.၆သန်း၊ ၂၀၁၇-၂၀၁၈ဘဏ္ဍာနှစ်တွင် လုပ်ငန်း ၂၃၆ ခုအတွက် ကျပ်သန်း ပေါင်း(၇၂၃၈.၆၂၅)သန်းနှင့် ၂၀၁၈-၂၀၁၉ဘဏ္ဍာနှစ်တွင် လုပ်ငန်းပေါင်း ၂၁၄ ခုအတွက် ကျပ်သန်းပေါင်း (၉၉၃၈.၈၆၄) သန်း တို့ကို ခွင့်ပြု ဘဏ္ဍာငွေ ဘောင်သတ်မှတ်ချက်အပေါ်မူတည်ကာ နယ်မြေဒေသအလိုက် ဆောင်ရွက်ပေးသွားမည်ဖြစ်သည်ဟု ဒေါက်တာမျိုးသိမ်းကြီးက ဆက်လက်ပြောကြားသည်။