လွှတ်တော်တွင် ကတိပေးပြီး လုပ်ငန်းဆောင်ရွက်မှု ၆၂ ရာခိုင်နှုန်းသာရှိသောကြောင့် အားရမှုမရှိ

.

မုံရွာ၊ စက်တင်ဘာ ၇ ။         ။ စစ်ကိုင်းတိုင်းဒေသကြီး အစိုးရအဖွဲ့အနေဖြင့် လွှတ်တော်၌ ကတိဖြစ်ပြီးသောလုပ်ငန်းများအား လုပ်ဆောင်ပေးမှု သည် ၆၂ ရာခိုင်နှုန်းရှိသောကြောင့် လုပ်ငန်းဆောင်ရွက်မှုအပေါ် အားမရကြောင်း စစ်ကိုင်းတိုင်းဒေသကြီး လွှတ်တော်၊ အစိုးရ၏အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီ ဥက္ကဋ္ဌ ဒေါ်စုမြတ်ထက်က ပြောသည်။

အဆိုပါ ၆၂ ရာခိုင်နှုန်းသည် ၂၀၁၇-၁၈ ဘဏ္ဍာနှစ်အတွင်း တိုင်းဒေသကြီးအစိုးရ အဖွဲ့ဝင်ဝန်ကြီးများ၏ လွှတ်တော်၌ဖြေကြားခဲ့သော ကတိဖြစ်အဖြေများကို လုပ်ဆောင်မှုဖြစ်ကြောင်း သိရသည်။

"တကယ်ဆိုရင် ၈၀ ရာခိုင်နှုန်းလောက်ထိတော့ ပြီးစေချင်တာပေါ့။ အခုဟာက ၆၀ ရာခိုင်နှုန်းကျော်ပဲ ဆိုတော့ သိပ်တော့အားမရမိဘူး" ဟု စစ်ကိုင်းတိုင်းဒေသကြီးလွှတ်တော် အစိုးရ၏အာမခံချက်များ၊ ကတိများနှင့် တာဝန်ခံချက်များ စိစစ်ရေးကော်မတီ ဥက္ကဋ္ဌ ဒေါ်စုမြတ်ထက်က ပြောသည်။

၂၀၁၇ - ၁၈ ဘဏ္ဍာနှစ်အတွင်းလုပ်ဆောင်ရမည့် ကတိဖြစ်လုပ်ငန်းများ၏ လုပ်ဆောင်မှုများဖြစ်ပြီး ဒုတိယ အကြိမ်စစ်ကိုင်းတိုင်းဒေသကြီးလွှတ်တော်၊ (၂) ကြိမ်မြောက်ပုံမှန်အစည်းအဝေးမှ (၈) ကြိမ်မြောက် ပုံမှန်အစည်းအဝေးထိ ပေးခဲ့သောကတိများဖြစ်ကြောင်း ၄င်းကဆက်လက်ရှင်းပြသည်။

"ပြီးခဲ့တဲ့ကတိကဝတ်စောင့်ကြည့်မှုမှာ ခရိုင်အလိုက် စိစစ်ပြီးစောင့်ကြည့်ခဲ့တယ်။ ဒီတခါတော့ ဝန်ကြီးဌာန အလိုက် စိစစ်စောင့်ကြည့်မှာဖြစ်ပါတယ်။ ဒါမှသာ သက်ဆိုင်ရာဝန်ကြီးတွေအနေနဲ့ မိမိရဲ့အားနည်းချက်/ အားသာချက်တွေကို ပြန်လည်သုံးသပ်နိုင်မှာဖြစ်ပါတယ်။" ဟု ဒေါ်စုမြတ်ထက်က ဆိုသည်။

ထို့ပြင် သက်ဆိုင်ရာတိုင်းဒေသကြီးအဆင့် ဝန်ကြီးများမှ မိမိတို့၏ဖြေကြားချက်များကို တိကျစွာဖြေကြားပြီးပါက ဘတ်ဂျက်ရေးဆွဲချိန်တွင် စနစ်တကျထည့်သွင်းရေးဆွဲစေချင်ကြောင်း ဆက်လက်ပြောကြားသည်။