ဂဏန်းအမာ တရုတ်အ၀ယ်များ၍ ဂဏန်းပျော့မွေးမြူရေးသမားများ အခက်အခဲဖြစ်လာ

.

မြိတ်၊ စက်တင်ဘာ ၇ ။          ။ မြိတ်ကျွန်းစုဒေသ၏ ရေထွက်ပစ္စည်းတစ်မျိုး ဖြစ်သော ဂဏန်းအမာများကိုသာ တရုတ်နိုင်ငံမှ အ၀ယ်များ နေသောကြောင့် မြိတ်၊ ကျွန်းစုဒေသရှိ ဂဏန်းပျော့ မွေးမြူသူများ အခက်အခဲ ဖြစ်ပေါ်လာနေကြောင်း မွေးမြူသူများထံမှ သိရသည်။

ကျွန်းစုမြို့နယ်၊ ပထက်ကျေးရွာရှိ အပြည်ပြည်ဆိုင်ရာ ပြည်ဖြိုးထွန်းကုမ္ပဏီလီမိတက် ဂဏန်းပျော့ မွေးမြူရေးလုပ်ငန်းတာဝန်ခံ မန်နေဂျာ ဦးမြတ်နိုးသူက “ကျွန်တော်တို့ ဂဏန်းပျော့မွေးမြူရေးလုပ်ငန်းကို ၂၀၀၄ ခုနှစ်က စခဲ့တာပါ၊ အဆင်ပြေလာတော့ နှစ်အလိုက် တိုးချဲ့ပြီး ၁၈ ကန်အထိ ဖြစ်လာတယ်၊ အခု ၂၀၁၇ ခုနှစ်၊ ဧပြီလကစပြီး ကုန်ကြမ်း ဂဏန်းအမာတွေ ၀ယ်ယူမှုက ဈေးတအားမြင့်တက်လာတော့  တွက်ခြေမကိုက် ဖြစ်လာတယ်၊ အခုဆိုလျှင် ကန်တွေ ပြန်လျှော့လိုက်လို့ ၁၁ ကန်ပဲ ကျန်တော့တယ်၊ အလုပ်သမားတွေ လျော့လိုက်ရတယ်” ဟု ပြောသည်။

လက်ရှိအချိန်တွင် ကုန်ကြမ်း ဂဏန်းအမာများကို တရုတ်ကုန်သည်များက မြိတ်မြို့ ဒေသခံ အ၀ယ်တော် ကိုယ်စားလှယ်များနှင့် ပူးပေါင်းပြီး၊ အ၀ယ်ဒိုင် ၃၀ မှ ၄၀ နီးပါးအထိ ဖွင့်လှစ်ကာ လာရောက် ၀ယ်ယူနေကြသည်။

ဂဏန်းအမာများကို ယခင်က ဒေသခံအများစုက မွေးမြူရေးကန်သို့ အဓိကထား ရောင်းချကြသော်လည်း လက်ရှိတွင် ဈေးကြီးပေးဝယ်ယူသော တရုတ်ကုန်သည်များသို့သာ ရောင်းချသောကြောင့် ဂဏန်းပျော့ မွေးမြူသူများ အခက်အခဲ ပြဿနာတစ်ခု ဖြစ်လာနေကြောင်း မွေးမြူရေး လုပ်ငန်းရှင်များက ဖွင့်ဟကြသည်။

မြိတ်တစ်ဖက်ကမ်းရှိ ကောင်းကောင်း ဂဏန်းပျော့ မွေးမြူရေးကန် မှ တာဝန်ရှိသူတစ်ဦးက “ဂဏန်းပျော့ ဈေးကွက်က ထိန်းချုပ်လို့ မရဘူး ဖြစ်နေပြီ၊ အဓိကတော့ ဒေသခံတွေက ဈေးပိုပေးနေတဲ့ အ၀ယ်ဒိုင်တွေ ဆီကိုပဲ အားကိုးပြီး ရောင်းနေကြတော့ ဒီဖက်က မွေးမြူရေးကန်တွေကို သိပ်မလာကြတော့ ကုန်ချော လုပ်ငန်းရှင်တွေမှာ အများကြီး ထိခိုက်လာတယ်” ဟု ဆိုသည်။

၂၀၁၆ ခုနှစ်မှ ၂၀၁၇ ခုနှစ်ထိ ဂဏန်းအမာ တစ်ပိဿာ ၅၀၀၀ ကျပ်မှ ၇၀၀၀ ကျပ်အထိ ဈေးအမြင့်ဆုံးပေး ၀ယ်ယူခဲ့ရပြီး လက်ရှိအချိန်တွင် တရုတ်ကုန်သည်များက တစ်ပိဿာ ၁၂၀၀၀ ကျပ်မှ ၁၃၀၀၀ ကျပ် အထိ ဈေးပေးဝယ်ယူလျှက် ရှိသည်။