မကွေးတိုင်းဒေသကြီး စလေကျေးရွာကို မြို့အဖြစ်ပြောင်းလဲဖွင့်လှစ်

.

မကွေး၊စက်တင်ဘာ ၆ ။         ။ စာဆိုတော်စလေဦးပုည၏ ဇာတိမြေဖြစ်သော စလေကျေးရွာကို စလေမြို့အဖြစ်ပြောင်းလဲပြီး ဖွင့်ပွဲအခမ်းအနားအား စက်တင်ဘာလ ၆ရက်နေ့က မြို့ပိုင်ခန်းမတွင် ကျင်းပပြုလုပ်ခဲ့သည်။

“မြို့ဖြစ်သွားသော်လည်း စလေမြို့ ပြည့်သူ့လွှတ်တော်ကိုယ်စားလှယ်လို့တော့ ထွက်လို့မရဘူး။ချောက်မြို့နယ် ပြည်သူ့လွှတ်တော်ကိုယ်စားလှယ်ပဲ ဖြစ်မယ်။ လက်ရှိ ရှိပြီးသားအခြေခံဖွဲ့စည်းပုံဥပဒေအရ တစ်နိုင်လုံးမှာ ပြည်သူ့လွှတ်တော်(၃၃၀) ပဲရှိရမယ်။ (၃၃၀) ထက်မပိုရဆိုတာ ရှိတယ်။ ဒါပေမယ့် စလေသား စလေ ဇာတိကတော့ ချောက်မြို့နယ်ကနေ ဖြစ်လို့ရပါတယ်” ဟု ဝန်ကြီးချုပ်ဒေါက်တာအောင်မိုးညိုက ဖွင့်ပွဲတွင် ပြောကြားသည်။

ကျေးရွာအဆင့်မှ မြို့အဖြစ်သို့ ပြောင်းလဲခြင်းကို ပြည်ထဲရေးဝန်ကြီးဌာန၏ ၂၀၁၈ မေလ ၁၀ ရက်စွဲပါ အမိန့် ကြေငြာစာအမှတ် (၅၇၃/၂၀၁၈) အရ ရပ်ကွက် ၅ ရပ်ကွက်ဖြင့် စလေမြို့အဖြစ် အဆင့်တိုးမြှင့်ဖွဲ့စည်းခဲ့သဖြင့် စလေမြို့ဖွင့်ပွဲ အခမ်းအနားကိုကျင်းပခြင်းဖြစ်ကြောင်း သိရသည်။

စလေမြို့သည် ရတနာပုံမန္တလေးမြို့၏ထီးနန်းရှင် မင်းတုန်းမင်း ထီးနန်းစိုးစံစဉ် စာဆိုတော် စလေးဆရာကြီး ဦးပုည (မင်လှသင်္ခယ) ၏ ဇာတိမြို့လည်း ဖြစ်သည်။

“စလေမြို့မှာအထင်ကရရှေ့ဟောင်း အမွေအနစ်များဖြစ်တဲ့ စလေရုပ်စုံကျောင်းနဲ့ စလေဇီးသီးဆိုရင် နိုင်ငံနှင့် အဝှမ်း မသိသူမရှိလောက်အောင်ဖြစ်ပြီး စာဆိုရှင် စလေဦးပုညပေါ်ထွန်းခဲ့တဲ့မြို့သမိုင်းတွေ ရှိခဲ့တဲ့ မြို့ တစ်မြို့ ဖြစ်ပါတယ်။ ၁၉၃၀ နှစ်မှာ ချောက်ရေနံမြေပေါ်ပေါက်လာလို့ ကျွန်တော်တို့မြို့ကြီးကိုသယ်သွားတာပါ။ အဲဒါကြောင့် စလေသားတွေက တောသားဖြစ်သွားတာပါ။ ကျွန်တော်တို့ အနှစ်နှစ်အလလ ကြိုးစားခဲ့ကြလို့ အခု အသက် (၇၅)နှစ်ရောက်မှ မြို့ဖြစ်ခွင့် ရခဲ့တာပါ”ဟု စလေမြို့မှ အငြိမ်းစားကျောင်းဆရာ ဦးငွေသိန်း က ပြောသည်။

စလေမြို့၏ အကျယ်အဝန်းမှာ (၁ ဒဿ မ၀၂၉)မိုင်ရှိပြီး အိမ်ထောင်စု (၁၆၄၂)စုနှင့်မြို့ပေါ်ရပ်ကွက် (၅) ရပ်ကွက်ရှိကြောင်း သိရသည်။