ကမ္ဘာကျော် ဂုတ်ထိပ်တံတားဘေးတွင် တံတားအသစ်တစ်စင်း ထိုးမည်

.

ဓာတ်ပုံ - သူရ/မဇ္ဈိမ

နေပြည်တော်၊ စက်တင်ဘာ ၅ ရက် ။         ။ မြန်မာနိုင်ငံနှင့် တရုတ်နိုင်ငံ ၂ နိုင်ငံ နယ်စပ်ကုန်သွယ်ရေးလမ်းဖြစ်သည့် လားရှိုး-မူဆယ်လမ်းပိုင်းရှိ ဂုတ်တွင်း လမ်းပိုင်းသည် ယာဉ်ကြောပိတ်ဆို့မှုများ မကြာခဏ ဖြစ်ပွားသောကြောင့် နောင်ချိုမြို့ရှောင်လမ်း ဖောက်လုပ်ရာတွင် ပါရှိသည့် ဂုတ်ထိပ်တံတားဘေးတွင် တံတားသစ်တစ်စင်းကို တည်ဆောက်သွားမည် ဖြစ်ကြောင်း ဆောက်လုပ်ရေးဝန်ကြီးဌာန ဒုတိယ၀န်ကြီး ဦးကျော်လင်းက ပြောကြားသည်။

“ဂုတ်တွင်းလမ်းပိုင်းကို ရှောင်ရှားမည့် နောင်ချိုမြို့ရှောင်လမ်းနှင့် ဂုတ်တွင်း တံတားသစ် လက်ရှိတည်ဆောက်မည့် နေရာသည် ကမ္ဘာကျော် ဂုတ်ဂိတ်တံတားကြီးမှ ၆၉၆ မီတာဝေးသော နေရာတွင် တည်ဆောက်မည်  ဖြစ်ပြီးတော့ တံတားပြီးတဲ့အချိန်မှာတော့ ကမ္ဘာကျော်ဂုတ်ထိပ်တံတားကိုလည်း ယှဉ်တွဲပြီး မြင်တွေ့ရမည့် အခြေအနေဖြစ်တဲ့အတွက် ကမ္ဘာလှည့် ခရီးသည်များကိုလည်း ဆွဲဆောင်နိုင်မည့်စီမံကိန်း ဖြစ်ပါတယ်” ဟု ဦးကျော်လင်းက ပြောကြားသည်။

ယနေ့ စက်တင်ဘာ ၅ ရက်က ကျင်းပပြုလုပ်သည့် အမျိုးသားလွှတ်တော်အစည်းအဝေးအတွင်း ရှမ်းပြည်နယ် မြောက်ပိုင်း ၊အမှတ်(၄)မဲဆန္ဒနယ်မှ အမျိုးသားလွှတ်တော်ကိုယ်စားလှယ် ဦးစိုင်းအုန်းကျော် မေးမြန်းခဲ့သည့် “ ရှမ်းပြည်နယ်(မြောက်ပိုင်း) ကျောက်မဲခရိုင်အတွင်းရှိ နောင်ချိုမြို့ရှောင်လမ်း စီမံကိန်း သို့မဟုတ် ဂုတ်တွင်း တံတားသစ် ချဉ်းကပ်လမ်းစီမံကိန်းနှင့် စပ်လျဉ်း၍ သိရှိလိုခြင်း” မေးခွန်းနှင့်ပတ်သက်ပြီး ဆောက်လုပ်ရေး ဒုဝန်ကြီး ဦးကျော်လင်းက ပြန်လည်ဖြေကြားခဲ့ခြင်းဖြစ်သည်။

အဆိုပါ တံတားသစ်သည် ပျမ်းမျှ ပေ ၆၀၀ ခန့် အမြင့်ရှိမှာဖြစ်ပြီး မြန်မာနိုင်ငံတွင် အမြင့်ဆုံးတံတားဖြစ်ပြီး နိုင်ငံတွင် တစ်ကြိမ်တစ်ခါမှ တည်ဆောက်ခြင်းမရှိသေးသည့် (Balance Cantilever Method)အား (Cable Stayed) ဖြင့် တည်ဆောက်မည်ဖြစ်ကာ စီမံကိန်းပြီးဆုံးပါကလည်း ဂုတ်တွင်းလမ်းအတက်အဆင်း ကြာချိန်သည် ကားငယ်လေးများ ၄၅ မိနစ်နှင့်ကားကြီးများအတွက် ၁ နာရီခွဲခန့်ကြာမည်ဖြစ်ကြောင်းသိရသည်။

အဆိုပါ နောင်ချိုမြို့ရှောင်လမ်းပိုင်းနှင့် တံတားသစ်တည်ဆောက်ရာတွင် သဘာဝပတ်ဝန်းကျင် ထိခိုက် ပျက်စီးမှုများအတွက် ဆန်းစစ်ခြင်း( Environmental Impact Assessment EIA) ဆိုင်ရာ လုပ်ထုံးလုပ်နည်းများနှင့်အညီ စစ်ဆေးခဲ့ရာတွင် တံတားအဆင့်မြှင့်တင်ခြင်းလုပ်ငန်းအတွက် မီတာ(၃၀၀) နှင့်အထက်အား ကနဦး ပတ်ဝန်းကျင်ဆန်းစစ်ရန်(IEE) လုပ်ရန်ဖြစ်ပြီး၊ အဝေးပြေးလမ်းမအတွက် အရှည်(၂)ကီလိုမီတာနှင့် အထက် (၅၀)ကီလိုမီတာအထိအား စစ်ဆေးရန်လိုကြောင်း သဘာဝပတ်ဝန်းကျင် ထိန်းသိမ်းရေးနှင့် သစ်တော ၀န်ကြီးဌာနမှ ဖော်ပြထားသည်။

“နောင်ချိုမြို့ရှောင်လမ်းလျာထားအူကြောင်းမှာ (၂၁)ကီလိုမီတာ ဖြစ်ပါသဖြင့် ကနဦးပတ်ဝန်းကျင် ဆန်းစစ်ခြင်း (IEE) သတ်မှတ်ချက်တွင်သာ ပါဝင်တဲ့အတွက် ကျွန်တော်တို့ IEE ဆောင်ရွက်ခဲ့တာဖြစ်ပါတယ်။ EIA ထိ ဆောင်ရွက်ရန် မလိုတဲ့အတွက် IEE နဲ့ ကျွန်တော်တို့ဒီ သဘာဝပတ်ဝန်းကျင်ဝန်ကြီးဌာနကို တင်ပြဆောင်ရွက်ခဲ့ကြောင်း” ဦးကျော်လင်းက ဆက်လက်ပြောကြားခဲ့သည်။

အဆိုပါ လမ်းပိုင်းနှင့် တံတားတည်ဆောက်ရာ စီမံကိန်းတစ်လျှောက်တွင် ပါဝင်သည့် မြေများကို လျော်ကြေး ပေးနိုင်ရေးနှင့် ပွင့်လင်းမြင်သာမှု ရှိစေရေး အတွက် အကြိမ် (၃၀) ဆွေးနွေးခြင်းများပြုလုပ်ခဲ့ပြီး ကျောက်မဲမြို့နယ်တွင်း စိုက်ပျိုးမြေ ဧရိယာ စုစုပေါင်း (၁၆၉.၉၉)ဧက၊ နောင်ချိုမြို့နယ်တွင် စိုက်ပျိုးမြေနှင့် သစ်တောမြေ စုစုပေါင်း(၃၂၉.၇၄)ဧကတို့ ပါဝင်ပြီး အဆိုပါ မြေဧရိယာ(၄၉၉.၇၃) ဧကတွင် (၃၆.၃၅) ဧက သည် အစိုးရ အဖွဲ့အစည်းပိုင်မြေများ ဖြစ်သည်။