ခရုကူးစက်ရောဂါ သုတေသနလုပ်ရန် နိုင်ငံတကာပညာရှင်အဖွဲ့ ရခိုင်ကို လာမည်

.

ပြီးခဲ့သည့် ဇူလိုင်လက နေပြည်တော်ကျန်းမာရေးဝန်ကြီးဌာနမှ တာဝန်ရှိသူများလာရောက်ကာ ရခိုင်ပြည်နယ်ကျန်းမာရေးဦးစီးရုံး၌ သွေးလွန်တုပ်ကွေးနှင့် ပတ်သက်၍ ရှင်းလင်းပွဲလုပ်စဉ်

စစ်တွေ၊ စက်တင်ဘာ ၅ ရက်။          ။ ၇ လတာကာလအတွင်း ခရုကတစ်ဆင့်ရောဂါ ကူးစက်ခံရသူပေါင်း ၄၀၀ ဝန်းကျင်ရှိခဲ့သည့် ရခိုင်ပြည်နယ်ကို နိုင်ငံတကာ ပညာရှင်အဖွဲ့က သုတေသနလုပ်ရန် လာမည်ဟု ပြည်နယ် ပြည်သူ့ကျန်းမာရေးဦးစီးဌာနက ပြောသည်။

လက်ရှိတွင် နေပြည်တော်၌ ကမ္ဘာ့ကျန်းရေးအဖွဲ့ WHO မှ အကြီးအကဲများအပါအဝင် တရုတ်နိုင်ငံမှ ပညာရှင်များနှင့် မြန်မာနိုင်ငံမှ ကျန်းမာရေးဝန်ကြီးဌာန တာဝန်ရှိသူများနှင့် တွေ့ဆုံကာ ညှိနိုင်းဆွေးနွေးပွဲတစ်ခုပြုလုပ်နေပြီး တိုင်းဒေသကြီးနှင့် ပြည်နယ်များအနက် ရခိုင်ပြည်နယ်တွင် ကူးစက်ဖြစ်ပွားမှုနှုန်း မြင့်မားနေသည့်အတွက် ရခိုင်ပြည်နယ်သို့ အမြန်ဆုံးလာရန် စီစဉ်နေကြကြောင်း ပြည်နယ် ပြည်သူ့ ကျန်းမာရေးဦးစီးမှူး ဒေါက်တာကြည်လွင်က ပြောသည်။

“သူတို့အဖွဲ့တွေ သုတေသနလုပ်ဖို့ ပြန်လာဖို့ရှိတယ်။ အဓိက ရခိုင်နဲ့ ရာသီဥတု ရေမြေအနေအထားတူတဲ့ နောက်ထပ်တွေ့တဲ့ နေရာတွေလည်း ရှိတယ်။ ရန်ကုန်မှာ နည်းနည်းတွေ့တယ်။ တစ်ယောက်စ နှစ်ယောက်စပေါ့။ အများကြီး မဟုတ်ပါဘူး။ ဧရာဝတီမှာလည်း ရှိတယ်။ ပဲခူးမှာလည်း ရှိတယ်ပေါ့။ ဒီနေရာတွေက ရေမြေအနေထားအရ ခြင်ထူထပ်တဲ့အတွက်ကြောင့် ရခိုင်မှာလည်း လုပ်မယ်။ ဒီနေရာတွေမှာလည်း လုပ်မယ်လို့ ဆွေးနွေးကြတဲ့ အထဲမှာပါတယ်။”

မြန်မာနိုင်ငံတွင် ပြည်နယ်နှင့် တိုင်းများအနက် ရခိုင်ပြည်နယ်တွင် အဖြစ်အများဆုံးဟု သိရပြီး ထို့အတွက်ကြောင့်လည်း အမြန်ဆုံး လာရောက်ကာ သုတေသနပြုလုပ်ရန် စိစစ်နေခြင်းဖြစ်ပြီး ယခု စက်တင်ဘာလထဲတွင်ပင် လာရောက်နိုင်ကြောင်း ဒေါက်တာ ကြည်လွင်က ခန့်မှန်းပြောဆိုသည်။

ထိုအဖွဲ့မှာ ပြီးခဲ့သည့် ရက်ပိုင်းကလည်း ရခိုင်ပြည်နယ်သို့ ရောက်ရှိလာကြပြီး အဆိုပါ ရောဂါနှင့် ပတ်သတ်သည့် လူနာများနှင့် တွေ့ဆုံခဲ့သလို ခရုနမူနာများကိုလည်း စမ်းသပ်ရန် ယူဆောင်သွားကြောင်း သိရသည်။

ရခိုင်ပြည်နယ်တွင် သွေးလွန်တုပ်ကွေးနှင့် ပတ်သတ်၍ စိုးရိမ်ရသည့် အနေအထားမှာ ရှိသည့်အတွက် သတိထားနေကြရန် ကျန်းမာရေးနှင့် အားကစားဝန်ကြီးဌာနမှ တိုက်တွန်းထားသည့် ဒေသတစ်ခုလည်း ဖြစ်သည်။