ကြားဖြတ်တွင် မဲဆွယ်မည့် လက်ကမ်းစာစောင်နှင့်နေရာများကို မန်းရွေး/ကော်ကို အသိပေးရမည်

.

မန္တလေး၊ စက်တင်ဘာ ၂ ။            ။ ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်ကြမည့်ပါတီများအနေဖြင့် လက်ကမ်းစာစောင်များ ဖြန့်ဝေရန်နှင့်စုဝေးဟောပြောမည့်နေရာများကို သက်ဆိုင်ရာဌာနများနှင့် ရွေးကောက်ပွဲကော်မရှင်သို့ အသိပေးအကြောင်းကြားရမည်ဟု မန္တလေးတိုင်းဒေသကြီး၊ ရွေးကောက်ပွဲကော်မရှင်ဥက္ကဋ္ဌ ဦးရှိန်ဝင်းက ပြောသည်။

"ပန်းဖလက်ဖြန့်ဝေခွင့်ရဖို့က ပြန်/ဆက်မှာ တင်ရမယ်။ စုဝေးဟောပြောမယ့်နေရာ၊ လူဦးရေစာရင်းကတော့ သက်ဆိုင်ရာမြို့နယ် ရွေးကောက်ပွဲကော်မရှင်ရုံးခွဲတွေမှာ တင်ရပါမယ်။"ဟု ဦးရှိန်ဝင်းက ပြောသည်။

မဲဆွယ်စည်းရုံးသည့်နေရာတွင် ပါတီတစ်ခုနှင့်တစ်ခု မဆုံနိုင်ရန်အတွက်လည်း အချိန်များ ခွဲဝေပေးသွားမည် ဖြစ်သည်။ ထိုသို့ လုပ်ဆောင်ရခြင်းမှာ ပါတီတစ်ခုနှင့်တစ်ခုဆုံပါက ပြဿနာတစ်စုံတစ်ရာ ဖြစ်ပေါ်မည်ကို စိုးရိမ်သောကြောင့် ဖြစ်သည်ဟု ရွေး/ကော်မှ သိရသည်။

"ပါတီတွေ မဆုံအောင် အချိန်သတ်မှတ်ပေးမယ်။ ဆုံရင် ပြောလို့မရဘူး။သူ့ အားပေးထောက်ခံသူ၊ ကိုယ့် အားပေးထောက်ခံသူချင်းလည်း ပြဿနာဖြစ်နိုင်တယ်။ဒါကြောင့် အချိန်တွေ လွှဲပေးပါမယ်။" ဟု ဦးရှိန်ဝင်းက ပြောသည်။

မန္တလေးတိုင်းဒေသကြီးအတွင်းတွင် လစ်လပ်မဲဆန္ဒနယ်များဖြစ်သည့် မြင်းခြံမြို့နယ်၊သပိတ်ကျင်းမြို့နယ်နှင့် ရှမ်းတိုင်းရင်းသားလူမျိုး မဲဆန္ဒနယ်တို့တွင် NLD၊ ပြည်ခိုင်ဖြိုး၊ တစည၊ NDF၊ SNLD စသည့်ပါတီတို့မှ ကိုယ်စားလှယ်လောင်း ၁၆ ဦးတို့ ဝင်ရောက်အရွေးချယ်ခံယှဉ်ပြိုင်ကြမည် ဖြစ်သည်။

လာမည့် နိုဝင်ဘာလ ၃ ရက်တွင် ကျင်းပမည့် ကြားဖြတ်ရွေးကောက်ပွဲကို ဝင်ရောက် အရွေးချယ်ခံ ယှဉ်ပြိုင်မည့်ပါတီများအနေဖြင့် စက်တင်ဘာ ၃ ရက်နေ့မှ စတင်၍ ရက်ပေါင်း ၆၀ စည်းရုံးဟောပြောခွင့် ရရှိကြမည် ဖြစ်သည်။

၂၀၁၈ ကြားဖြတ်ရွေးကောက်ပွဲတွင် လစ်လပ်မဲဆန္ဒနယ် ၁၃ နေရာ ရှိပြီး  တိုင်းဒေသကြီးလွှတ်တော်တွင် ၆ နေရာ၊ ပြည်နယ်လွှတ်တော်တွင် ၂ နေရာ၊ ပြည်သူ့လွှတ်တော်တွင် ၄ နေရာ၊ အမျိုးသားလွှတ်တော်တွင် ၁ နေရာ အသီးသီး လစ်လပ်နေသည်။

တိုင်းဒေသကြီးလွှတ်တော်တွင် မန္တလေးတိုင်းဒေသကြီး သပိတ်ကျင်း၊  ရှမ်းတိုင်းရင်းသားလူမျိုး မဲဆန္ဒနယ်၊ မကွေးတိုင်းဒေသကြီး မင်းဘူး မဲဆန္ဒနယ် အမှတ်(၂)၊ ၊ စစ်ကိုင်းတိုင်းဒေသကြီး တမူးမဲဆန္ဒနယ် အမှတ် (၁) ၊ ရန်ကုန်တိုင်းဒေသကြီး ဆိပ်ကမ်းမြို့နယ် မဲဆန္ဒနယ် အမှတ်(၂)၊ ပဲခူးတိုင်းဒေသကြီး အုတ်တွင်း မဲဆန္ဒနယ် အမှတ် (၂)၊ ပြည်နယ်လွှတ်တော်တွင် ရခိုင်ပြည်နယ်၊ ရသေ့တောင်မဲဆန္ဒနယ် အမှတ် (၂)၊ ချင်းပြည်နယ် မတူပီ မဲဆန္ဒနယ် အမှတ် (၁) တို့ လစ်လပ်နေသည်။

ပြည်သူ့လွှတ်တော်တွင် မန္တလေးတိုင်းဒေသကြီး မြင်းခြံမဲဆန္ဒနယ်၊ ရန်ကုန်တိုင်းဒေသကြီး တာမွေမဲဆန္ဒနယ်၊ ချင်းပြည်နယ် ကန်ပက်လက်မဲဆန္ဒနယ်၊ ရှမ်းပြည်နယ် လဲချားမဲဆန္ဒနယ်တို့ လစ်လပ်နေပြီး အမျိုးသား လွှတ်တော်တွင် ကချင်ပြည်နယ် မဲဆန္ဒနယ်မြေ အမှတ်(၂)တို့ လစ်လပ်နေခြင်း ဖြစ်သည်။