ကုလအချက်အလက်ရှာဖွေရေးအဖွဲ့ ၏ ထုတ်ပြန်ချက် မြန်မာအစိုးရ လက်မခံ

.

ရန်ကုန် ၊ စက်တင်ဘာ ၁ ။              ။ ကုလသမဂ္ဂ လူ့အခွင့်အရေးကောင်စီအချက်အလက်ရှာဖွေရေးအဖွဲ့ ထုတ်ပြန်ခဲ့သော အစီရင်ခံစာ နှင့်ပတ်သက်ပြီး လက်ခံနိုင်ခြင်းမရှိဟု မြန်မာအစိုးရက တုံ့ပြန်ပြောဆိုထားသည်။

အဆိုပါ အစီရင်ခံသည် ရခိုင်ပြည်နယ်နှင့် နိုင်ငံတစ်ဝန်း၌ စိတ်ဝမ်းကွဲမှု ၊ အယုံအကြည်ကင်းမဲ့မှုများကိုသာ ပိုမိုဖြစ်ပေါ် စေမည်ကို ဝမ်းနည်းဖွယ်ရာတွေ့ရှိရသည်ဟု အစိုးရဘက်မှ ထုတ်ပြန်ထားသည်။

“အချက်အလက် ရှာဖွေရေးအဖွဲ့၏ ဘက်လိုက်မှု ကင်းနိုင်ခြေအပေါ် စိုးရိမ်သည့်အတွက် ယင်းအဖွဲ့၏ ဆောင်ရွက်ပိုင်ခွင့်ကို လက်မခံခဲ့ကြောင်း ၊ ယင်းအစီရင်ခံစာကို အချိန်ကိုက် ထုတ်ပြန်သည့် ရည်ရွယ်ချက် ပေါ်တွင်လည်း မိမိအနေဖြင့် များစွာ သံသယရှိပါတယ်” ဟု ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်၊ သံအမတ်ကြီး ဦးဟောက်ဒိုဆွမ်းက သြဂုတ်လ ၂၈ ရက်နေ့တွင် ပြုလုပ်ခဲ့သည့် ကုလသမဂ္ဂလုံခြုံရေးကောင်စီ တံခါးဖွင့်အစည်းအဝေးတွင် ပြောဆိုခဲ့သည်။

ကုလသမဂ္ဂ လူ့အခွင့်အရေးကောင်စီအချက်အလက်ရှာဖွေရေးအဖွဲ့ တည်ထောင်မှု၊ ဖွဲ့စည်းမှုနှင့် လုပ်ပိုင်ခွင့် တို့သည် သမာသမတ်ကျမှု မရှိစေနိုင်သလို ရခိုင်ပြည်နယ်အရေးနှင့်ပတ်သက်ပြီး ရေရှည်တည်တံ့သည့် အဖြေများကိုရှာဖွေနေသည့်  အစိုးရ၏ ကြိုးပမ်းအားထုတ်မှုများကိုပါ အဟန့်အတားဖြစ်လာနိုင်စေမည်ကို စိုးရိမ်ဖွယ်ရာတွေ့မြင်ရသည်ဟု နိုင်ငံခြားရေးဝန်ကြီးဌာနမှ ထုတ်ပြန်ထားသည်။

ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်၊ သံအမတ်ကြီး ဦးဟောက်ဒိုဆွမ်းက ကုလသမဂ္ဂ လုံခြုံရေး ကောင်စီအစည်းအဝေး၌  ကိုယ်ကျိုးစီးပွားနှင့် နိုင်ငံရေး အကျိုးအမြတ်ရလိုမှုအတွက် ရခိုင်ပြည်နယ်ရှိ အပြစ်မဲ့ ပြည်သူများ၊ အထူးသဖြင့် အမျိုးသမီးများနှင့် ကလေးသူငယ်များ၏ ဒုက္ခကို အမြတ်ထုတ်ရန် အချိန် မဟုတ်ကြောင်း ပြောဆိုခဲ့သည်။

ကုလသမဂ္ဂ လူ့အခွင့်အရေး ကောင်စီ အချက်အလက် ရှာဖွေရေးအဖွဲ့၏ အစီရင်ခံစာတွင် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် အပါအဝင် တပ်မတော် ထိပ်ပိုင်း တာဝန်ရှိသူ ၆ ဦးအား လူမျိုးတုံး သတ်ဖြတ်မှုနှင့် နိုင်ငံတကာ စစ်ရာဇဝတ် တရားရုံး(ICC) ၌ စစ်ဆေးသင့်သည်ဟု ဖော်ပြထားသည်။

ယင်းအပြင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် သည် တပ်မတော်၏ လူ့အခွင့်အရေး ချိုးဖောက်မှု များကို တားဆီးရန် ပျက်ကွက်ခဲ့သည်ဟု အစီရင်ခံစာတွင် ဖော်ပြထားသည်။