မကွေးတိုင်းအတွင်းရှိ ပခုက္ကူတွင် ပုဂ္ဂလိကရေနံချက်စက်ရုံများ လုပ်ကိုင်ခွင့်ပြုသွားမည်

.

ပခုက္ကူ၊ သြဂုတ်လ ၂၅ ။            ။ မကွေးတိုင်းဒေသကြီးအစိုးရမှ ပုဂ္ဂလိကရေနံချက်ဇုန်များအား စက်ရုံဇုန်အဖြစ် သတ်မှတ်ကာ လုပ်ကိုင်ခွင့်ပြု သွားမည်ဟု သိရသည်။

" ပြည်ထောင်စုအစိုးရက မကွေးတိုင်းမှာ ရေနံချက်ဖိုတွေ ပြုလုပ်ခွင့်ပေးဖို့ အကြောင်းကြားလာတဲ့အခါ ကျွန်တော်တို့က မေတ္တာရပ်ခံပြီး အသေးစား၊အလတ်စား၊ ကျွန်တော်တို့ တိုင်းဒေသကြီး အစိုးရနဲ့ပြည်ထောင်စုအစိုးရ တို့ ညှိနှိုင်းပြီး ကျွန်တော်တို့မကွေးတိုင်းမှာ ရေနံချက်စက်ရုံတွေ ပြုလုပ်ခွင့်ပြုဖို့ ဆုံးဖြတ်ထားပါတယ်"ဟု မကွေးတိုင်း ဒေသကြီး သယံဇာတနှင့်သတ္ထုတွင်းဝန်ကြီး ဦးမြင့်ဇော်က ပြောကြားသည်။

ထိုကဲ့သို့ ခွင့်ပြုရာတွင် တူးဖော်သည့်နေရာ ပြန့်ကျဲမှုမရှိစေရေးအတွက် ပခုက္ကူတစ်နေရာတည်းတွင် လုပ်ကိုင်ခွင့် ပြုသွားမည်ဖြစ်ကာ အခြေခံလိုအပ်ချက်များဖြစ်သော မြေနေရာ၊ လျှပ်စစ်၊ ရေတို့အား အစိုးရမှ ကူညီသွားမည်ဖြစ်သည်ဟု  သိရသည်။

"အခုလို စက်ရုံတွေအတွက် နေရာရှာတဲ့အခါ အသင့်တော်ဆုံးဖြစ်တဲ့ ပခုက္ကူမြို့နယ်ထဲက ယာမြေဧက ၄၀၀ကျော်ကို ရေနံချက်စက်ရုံဇုန် တည်ထောင်ဖို့ ရည်ရွယ်ထားပါတယ်"ဟု ၀န်ကြီး ဦးမြင့်ဇော်က ပြောကြားသည်။

အဆိုပါရေနံချက်စက်ရုံဇုန်တွင် အသေးစားနှင့်အလတ်စား ရေနံချက်စက်ရုံများကို အရည်အသွေးနှင့် စည်းကမ်း ချက်များနှင့်အညီ ပြုလုပ်ခွင့်ပေးသွားမည်ဖြစ်သည်ဟု သိရသည်။

" ကျွန်တော်တို့က ကားတွေဆိုင်ကယ်တွေမောင်းလို့ရတဲ့ အဆင့်မှီတဲ့ ဆီတွေဖြစ်အောင် မြန်မာ့ရေနံနဲ့ သဘာဝဓာတ်ငွေ့လုပ်ငန်းက စက်ရုံတွေ ဖြစ်တဲ့ မန်းသံပုရာကန်၊ ချောက်၊ သန်လျှင်က ရေနံစက်ရုံတွေလို အသေးစား၊ အလတ်စားတွေ ခွင့်ပြုသွားမှာပါ” ဟု ၀န်ကြီးက ဆိုသည်။

မကွေးတိုင်းဒေသကြီးအနေဖြင့် ရေနံထွက်ရှိရာဒေသအများဆုံးဖြစ်ပြီး စက်ရုံတည်ဆောက်ရာတွင် တစ်ရက်လျှင် ရေနံဂါလံ သုံးထောင်မှ သုံးသောင်းအထိ ထွက်ရှိမည့် စက်ရုံများအားခွင့်ပြုသွားမည်ဟု သိရသည်။