James Bond 007 ရုပ်ရှင်ကားရိုက်ကူးရေးအဖွဲ့မှ ဒါရိုက်တာ ဒန်နီဘွိုင်းလ် နှုတ်ထွက်

.

သြဂုတ် ၂၃ ။           ။ James Bond ရုပ်ရှင်ကားတွေ ရိုက်ကူးလာခဲ့တဲ့ Oscar ဆုရှင် ဒါရိုက်တာ ဒန်နီဘွိုင်းလ်ဟာ James Bond 007 ရုပ်ရှင်ကား ရိုက်ကူးရေးအဖွဲ့ကနေ ပြီးခဲ့တဲ့ သြဂုတ်လ၊ ၁၁ ရက်က နှုတ်ထွက်သွားပြီဖြစ်ပါတယ်။

အဆိုပါအကြောင်းကို James Bond တရားဝင် Twitter စာမျက်နှာမှာ ထုတ်ပြန်ကြေညာခဲ့တာဖြစ်ပါတယ်။

အသက် ၆၁ နှစ်အရွယ် Oscar ဆုရှင် ဒန်နီဘွိုင်းလ်ဟာ Trainspotting၊ 28 Days Later၊ Steve Jobs၊ Slumdog Milionaire ရုပ်ရှင်ကားတွေ ရိုက်ကူးခဲ့တဲ့ ဒါရိုက်တာတစ်ဦး ဖြစ်ပါတယ်။

အသစ်ထွက်ရှိမယ့် James Bond 007 ရုပ်ရှင်ဇာတ်ကားသစ်မှာ ရုရှနဲ့ ဆက်နွယ်တဲ့ နိုင်ငံရေးပဋိပက္ခတွေနဲ့အတူ စစ်အေးကာလကို ပြန်လည်ပုံဖော်ရိုက်ကူးဖို့ စီစဉ်ထားခဲ့ကြတာဖြစ်ပါတယ်။  

အဆိုပါ James Bond 007 ဇာတ်ကားမှာ ပါဝင်တဲ့  ရုရှသူလျှိုဇာတ်ကောင်နဲ့ စပ်လျဉ်းပြီး James Bond ဇာတ်လိုက် ဒန်နီယယ်ခရိတ်နဲ့ ဒါရိုက်တာ ဒန်နီဘွိုင်းလ်တို့ အချေအတင်ဖြစ်ခဲ့ကြတယ်လို့ ရုပ်ရှင်လောကက လူတွေက ထင်မြင်ချက်ပေးခဲ့ကြပါတယ်။

အလားတူပဲ ရုပ်ရှင်ဇာတ်ညွှန်းရေးဆရာ ဂျွန်ဟော့ခ်လည်း James Bond ရုပ်ရှင်ကားရိုက်ကူးရေးကို စွန့်ခွာသွားပြီလို့ သိရပါတယ်။

နောက်လေးလအကြာမှာ James Bond 007 ကိုစတင်ရိုက်ကူးဖို့ စီစဉ်ထားပေမယ့် ဒန်နီဘွိုင်းလ်တို့ ထွက်သွားတဲ့အတွက် ဒါရိုက်တာအသစ်ကို အစားထိုးရတော့မှာဖြစ်ပါတယ်။

“အဆိုပါ James Bond 007 ရုပ်ရှင်ကားကို ၂၀၁၉ ခုနှစ်၊ အောက်တိုဘာလမှာ ရုံတင်ပြသဖို့ လျာထားခဲ့ပေမယ့် Eon ရုပ်ရှင်ရိုက်ကူးရေးကုမ္ပဏီအနေနဲ့  ဒါရိုက်တာနေရာမှာ အစားထိုးဖို့ ရွေးချယ်နေဆဲဖြစ်တဲ့အတွက် ဘယ်ချိန်မှာ ရုံတင်ပြသဖြစ်မယ်ဆိုတာ မပြောနိုင်သေးပါဘူး။”လို့ တာဝန်ရှိသူတွေက ပြောပါတယ်။