စိုစွတ်နေတဲ့ မိုးရာသီမှာ အနာကိုဘယ်လိုဂရုစိုက်မလဲ

.

ရေးသားသူ Aye Thi Mon
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win.

အနာဆိုတာ ထိခိုက်ဒဏ်ရာတစ်မျိုးပါ။ မြင်သာအောင်ပြောပြရရင် အပေါ်ယံအရေပြား ပေါက်ပြဲသွားတာပေါ့။ အပေါ်ယံအရေပြားက ခန္ဓာကိုယ်ရဲ့ ခံတပ်လေ။ ခံတပ်ပျက်သွားပြီဆိုရင် အန္တရာယ်ကျရောက်ဖို့ကလွယ်သွားပြီပေါ့။ အခုလိုမိုးရာသီမှာဆိုရင် စိုစိုစွတ်စွတ်ရှိတော့ ပိုးမွှားတွေပေါက်ဖွားဖို့အတွက်အခွင့်ကောင်းပါ။ ဒီတော့ အပေါ်ယံအရေပြား ပေါက်ပြဲမှုကနေတဆင့်   ရောဂါပိုးတွေအလွယ်တကူဝင်ရောက်ပြီး  အနာရင်းတာ၊ ပိုးဝင်တာနဲ့ နောက်ဆက်တွဲပြဿနာတွေ ဖြစ်ဖို့တော်တေ်ာလေးလွယ်ကူသွားနိုင်တဲ့အနေအထားပေါ့။ မိုးရာသီမှာ အနာကို သေသေချာချာဂရုစိုက်ဖို့လိုပါမယ်။ မိုးရေနဲ့အတူ ဘက်တီးရီးယားတွေက မဖိတ်ခေါ်ဘဲ ပါလာတတ်တာကြောင့်ပါ။

မိုးရာသီမှာ ခြေထောက်လိုမျိုးနေရာမှာ အနာဖြစ်လို့ကတော့ ဘက်တီးရီးယားတွေက တံခါးမရှိ ဓားမရှိဝင်ရောက်ပြီး ခန္ဓာကိုယ်ကို ထိခိုက်မှုတွေဖြစ်စေမှာပါ။ ဒါကြောင့် စိုစွတ်တဲ့မိုးရာသီမှာ အနာကိုသေချာဂရုစိုက်ဖို့လိုပါမယ်။

မိုးရာသီမှာ အနာကို ဒီလိုဂရုစိုက်ပါ

အနာကိုမိုးရေနဲ့ မထိတွေ့ပါစေနဲ့– မိုးရေမှာ ရောဂါပိုးတွေပါဝင်နေတတ်တာကြောင့် အပြင်ထွက်ခါနီးတိုင်း အနာကို ပလာစတာကပ်တာမျိုးဖြစ်ဖြစ် ပတ်တီးစည်းတာမျိုးဖြစ်ဖြစ်လုပ်သွားပေးပါ။ အနာကို မိုးရေနဲ့တိုက်ရိုက်မထိတွေ့အောင်ကာကွယ်ပါ။ အနာကို မိုးရေနဲ့ထိတွေ့စေမှုက ပြင်းထန်တဲ့ ရောဂါပိုးကူးစက်မှုကိုဖြစ်စေနိုင်တာကြောင့်ပါ။

အနာမှာ ညစ်ပေနေတဲ့အရာတွေ ပေကျံနေလားဆိုတာကို စစ်ဆေးပါ – အပြင်ကနေ မိုးစိုစိုနဲ့ပြန်လာတဲ့အခါ အနာမှာ ညစ်ပေတဲ့အရာတွေ ပေကျံကပ်ပါလာလားဆိုတာကို သေချာစစ်ဆေးပါ။   ပေကျံနေတယ်ဆိုရင် ဖယ်ရှားသန့်စင်ပါ။ ဒီလိုလုပ်ပေးတာက အနာကို ပိုးဝင်ကူးစက်တာမျိုးမဖြစ်အောင်ကာကွယ်နိုင်မှာပါ။

အနာကို သန့်ရှင်းပေးပါ – အနာကို သန့်စင်ဖို့ကမဖြစ်မနေလုပ်သင့်တဲ့အချက်တစ်ခုပါ။ အပြင်ကပြန်လာတဲ့အခါတိုင်းမှာ ခြေလက်တွေကို သန့်စင်အောင်ဆေးကြောပေးပါ။ ပြီးရင်တော့ အနာကို သန့်ရှင်းရေးလုပ်ပါ။ အနာတဝိုက်ကို ဆပ်ပြာနဲ့ရေသန့်သန့်လေးသုံးပြီး သေချာဆေးကြောသန့်စင်ပေးပါ။ ရေနွေးခပ်နွေးနွေးလေးကို တဘက်စသန့်သန့်လေးနဲ့ယူပြီး အနာပေါ်နဲ့ အနာတဝိုက်ကို ဆေးကြောသန့်စင်ပေးတာက ထိရောက်တဲ့နည်းလမ်းတစ်ခုပါ။

အနာကိုခြောက်သွေ့အောင်ထားပေးပါ – အနာကို သန့်စင်ဆေးကြောပြီးတဲ့အခါ အနာကို ခြောက်သွေ့အောင်ထားပေးဖို့ မမေ့ပါနဲ့။ စိုစွတ်တဲ့အခြေအနေက ဘက်တီးရီးယားတွေကို အလွယ်တကူပေါက်ဖွားစေနိုင်တာကြောင့်ပါ။ ဒီလိုလုပ်ပေးတာက အရေပြားအတွင်းပိုင်းကို ရောဂါပိုးတွေမဝင်ရောက်နိုင်အောင် ထိထိရောက်ရောက်ကာကွယ်ပေးနိုင်ပါတယ်။

Antibiotic Cream လူးပေးပါ – Antibiotic Cream တွေက အနာကို အစိုဓာတ်ရှိနေအောင် ထိန်းထားပေးနိုင်ရုံတင်မဟုတ်ဘဲ ပိုးဝင်ကူးစက်တာမျိုးမဖြစ်အောင်ကာကွယ်ပေးနိုင်ပါတယ်။ ဒါကြောင့် အနာကို သန့်စင်ပြီး ခြောက်သွေ့အောင်လုပ်ပြီးတဲ့အခါ Antibiotic Cream ခပ်ပါးပါးလေးလူးပေးပါ။ အချို့ Antibiotic Cream တွေမှာ အရေပြားဓာတ်မတည့်စေနိုင်တဲ့ ပစ္စည်းတွေပါဝင်တတ်တာကြောင့် အရေပြားမှာ ဆေးလူးပြီးလို့ ယားယံတာ၊ အဖုအပိမ့်ထွက်တာမျိုးဖြစ်လာမယ်ဆိုရင် ဆက်မလူးဖို့ ပြောပါရစေ။

အနာကို ပလာစတာကပ်ပါ၊ ပတ်တီးစည်းပါ – အနာကို ပလာစတာကပ်ပေးတာ၊ ပတ်တီးစည်းထားတာတွေက အနာကို ပိုးမဝင်အောင်ထိထိရောက်ရောက်ကာကွယ်ပေးနိုင်ပါတယ်။ ဒါကြောင့် အနာကို အပြင်သွားခါနီးတိုင်းရော အိမ်မှာနေရင်းရော ပလာစတာကပ်တာ၊ ပတ်တီးစည်းတာမျိုးတွေ လုပ်ပေးဖို့မမေ့ပါနဲ့။ အခုလိုမိုးရာသီမှာတော့ ရေစိုခံ Hansaplast ကအဆင်ပြေဆုံးဖြစ်မှာပါ။

အနာကို ကုတ်ဖဲ့တာမျိုးမလုပ်ပါနဲ့ – အနာကို ကုတ်ဖဲ့တာ၊ အနာဖေးကိုခွာထုတ်တာမျိုးမလုပ်ပါနဲ့။ အနာမကျက်ခင်မှာ ကုတ်ဖဲ့မိတဲ့အခါ အနာပေါက်ပြန်ဖြစ်သွားပြီး ရောဂါပိုးတွေဝင်ရောက် ကူးစက်တာမျိုးဖြစ်နိုင်တာကြောင့်ပါ။ အနာဖေးကိုခွာတာက လက်သည်းကြားထဲကပိုးတွေ အနာထဲကို ဝင်ရောက်နိုင်သလို ပတ်ဝန်းကျင်က ဘက်တီးရီးယားတွေလည်း အနာထဲကို အလွယ်တကူဝင်ရောက်နိုင်ပါတယ်။ အနာကျက်ဖြစ်စဉ်ကိုနှောင့်နှေးစေနိုင်ပါတယ်။

ပလာစတာလဲပေးပါ – အနာမှာကပ်ထားတဲ့ ပလာစတာတွေ၊ ပတ်တီးတွေညစ်ပတ်နေရင်၊ရေစိုနေရင် ချက်ချင်းလဲပေးပါ။ ဒီလိုလုပ်တာကလည်း အနာပိုးမဝင်အောင်ကာကွယ်ရာရောက်ပါတယ်။

အပြင်သွားမယ့်အခါတိုင်း အနာကို ပလာစတာကပ်တာ၊ ပတ်တီးစည်းတာတွေလုပ်သွားပေးပါ။ ဒီလိုလုပ်ပေးတာက အနာထဲကို ပြင်ပကအရာတွေနဲ့ ဘက်တီးရီးယားတွေမဝင်ရောက်အောင်ကာကွယ်ပေးနိုင်ပါတယ်။ မိုးရာသီမှာ အနာကို  အရက်ပြန်လိုမျိုး ပိုးမွှားတွေကို သေစေနိုင်တဲ့အရာမျိုးနဲ့ သန့်စင်ဆေးကြောပေးပါ။ အနာကို မိုးရေနဲ့ ဆေးကြောတာမျိုးမလုပ်ဘဲ ရေသန့်သန့်လေးနဲ့ပဲဆေးကြောပေးပါ။အနာကို ကာကွယ်ထားခြင်းမရှိဘဲ အပြင်မထွက်ပါနဲ့။

အနာရင်းနေလား စစ်ဆေးဖို့ သတိရပါ – တစ်နေ့တစ်ကြိမ်တော့ အနာကို မဖြစ်မနေစစ်ဆေးပေးပါ။ အနာကိုစစ်ဆေးတဲ့အခါ

  •     အနာတဝိုက်နီမြန်းရောင်ရမ်းနေလား၊
  •     အနာတဝိုက်မှာ နာကျင်နေလား၊
  •     အနာကနေ ပြည်လိုမျိုးအရည်တွေထွက်နေလား၊
  •     အဖျားရှိနေတာလား ဆိုတာတွေကို သေချာစစ်ဆေးပေးပါ။

ဤဆောင်းပါးကို Mizzima ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။