ရခိုင်ကိစ္စ နိုင်ငံတကာနှင့် ဆက်လက်ပူးပေါင်းဆောင်ရွက်ဖို့ မြန်မာအစိုးရကို စင်ကာပူတိုက်တွန်း

.

သြဂုတ် ၂၂ ။           ။ စင်ကာပူနိုင်ငံမှာ သြဂုတ် ၁၉ ရက်ကနေ ၂၂ ရက်အထိ လေးရက်တာ ခရီးရောက်ရှိနေလျက်ရှိတဲ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ ယမန်နေ့ သြဂုတ် ၂၁ ရက်က စင်ကာပူနိုင်ငံသမ္မတ ဟာလီမာ ယာကော့ဘ်၊ ၀န်ကြီးချုပ် လီရှန်လုံး တို့နဲ့ တွေ့ဆုံ ဆွေးနွေးခဲ့ကြောင်း သိရပါတယ်။

နိုင်ငံတော်၏ အတိုင်ပင်ခံပုဂ္ဂိုလ်နဲ့ စင်ကာပူဝန်ကြီးချုပ်တို့ တွေ့ဆုံကြစဉ် ဒေသတွင်းနဲ့ နိုင်ငံတကာ ကိစ္စရပ်တွေနဲ့ပတ်သက်လို့ ဆွေးနွေးခဲ့ကြကြောင်း စင်ကာပူ နိုင်ငံခြားရေးဝန်ကြီးဌာနက ထုတ်ပြန်ထားပါတယ်။

ခေါင်းဆောင်နှစ်ဦးရဲ့ ဆွေးနွေးမှုတွေထဲမှာတော့ နှစ်နိုင်ငံစလုံးမှာ ကြုံတွေ့နေရတဲ့ စီးပွားရေး စိန်ခေါ်မှုတွေ၊ မြန်မာနိုင်ငံက ရခိုင် ကိစ္စ အခြေအနေတို့နဲ့ ပတ်သက်လို့ ထည့်သွင်းဆွေးနွေးခဲ့ကြတယ်လို့ သိရပါတယ်။

ရခိုင် ကိစ္စမှာ ထိခိုက်ခံ အသိုင်းအ၀ိုင်း အားလုံးကို လူသားချင်း စာနာမှု အကူအညီတွေ ထောက်ပံ့ပေးနိုင်ဖို့နဲ့ ဒုက္ခသည်တွေကို မူလနေရပ် ဘေးကင်းလုံခြုံ သိက္ခာရှိစွာ ပြန်လာနိုင်ရေး ကိစ္စတို့နဲ့ပတ်သက်လို့ မြန်မာအစိုးရအနေနဲ့ ဘင်္ဂလားဒေ့ရှ်၊ ကုလသမဂ္ဂနဲ့ နိုင်ငံတကာ အသိုင်းအ၀ိုင်းတို့နဲ့ ဆက်လက် ပူးပေါင်းလုပ်ဆောင်သွားဖို့ စင်ကာပူဝန်ကြီးချုပ်က တိုက်တွန်းသွားခဲ့ပါတယ်။

ဒါ့အပြင် ရခိုင်ပြည်နယ်အတွက် ရေရှည် ဖြေရှင်းချက်နည်းလမ်းတစ်ခု မြန်မာအစိုးရဘက်က ဖော်ဆောင် ဆောင်ကြဉ်းပေးနိုင်လိမ့်မယ်လို့ မျှော်လင့်ကြောင်း စင်ကာပူဝန်ကြီးချုပ်က ဒေါ်အောင်ဆန်းစုကြည်နဲ့တွေ့ဆုံစဉ် ထုတ်ဖော် ပြောဆိုခဲ့တယ်လို့ သိရပါတယ်။

ရာသီဥတု ပြောင်းလဲမှုကိစ္စနဲ့ စပ်လျင်းလို့လည်း သဘာဝဘေးအန္တရာယ်တွေ တိုးမြင့်ဖြစ်ပေါ်နေတဲ့ အခြေအနေအပေါ် နိုင်နင်းစွာ ထိန်းသိမ်းစီမံနိုင်ရေးအတွက် အာဆီယံအဖွဲ့အတွင်းမှာလည်း ပိုမို ပူးပေါင်းဆောင်ရွက်သွားဖို့ လိုအပ်ကြောင်း စင်ကာပူဝန်ကြီးချုပ်က ပြောသွားပါတယ်။

လက်ရှိအချိန်မှာ စင်ကာပူနဲ့ မြန်မာတို့အနေနဲ့ စီးပွားရေးနဲ့ ရင်းနှီးမြှုပ်နှံမှုတို့ တိုးမြင့်ရေးအတွက် နှစ်နိုင်ငံ ရင်းနှီးမြှုပ်နှံမှု စာချုပ်တစ်ရပ် ချုပ်ဆိုနိုင်ရေး ဆွေးနွေးနေကြောင်းလည်း သိရပါတယ်။

နိုင်ငံတော်၏ အတိုင်ပင်ခံပုဂ္ဂိုလ်နဲ့ စင်ကာပူသမ္မတ ဟာလီမာ ယာကော့ဘ်နဲ့ တွေ့ဆုံပြီး နှစ်နိုင်ငံ ရင်းနှီးမြှုပ်နှံမှု အခွင့်အလမ်းများ၊ ဈေးကွက်သစ်များ ဖော်ထုတ် အသုံးချရေး၊ လူငယ်တွေကို ကျွမ်းကျင်မှု အရည်အချင်းတွေ လေ့ကျင့်သင်ကြားပေးရေး ကိစ္စရပ်တွေ ဆွေးနွေးခဲ့ကြတယ်လို့ သိရပါတယ်။