နေပြည်တော်၊ စက်တင်ဘာ ၆ ။ ။ ထီး နှင့် ယပ်တောင်များပေးဝေကာ နေပြည်တော် ဒက္ခိဏသီရိမြို့နယ်တွင် မဲဆွယ်သည်ဟုဆိုကာ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန ဝန်ကြီး ဦးမြင့်လှိုင် နှင့် ညွှန်ကြားရေးမှူးချုပ်(ငြိမ်း) ဦးကျော်ဝင်းတို့ကို အမျိုးသားဒီမိုကရေစီအဖွဲ့ချုပ်ပါတီမှ ကိုယ်စားလှယ်လောင်းက စက်တင်ဘာ ၆ ရက်တွင် ဒက္ခိဏသီရိမြို့နယ် မြို့မရဲစခန်းတွင် တိုင်တန်းခဲ့သည်။
“ ရဲအရေးအရေးပိုင်တဲ့အမှု မဟုတ်တဲ့အတွက် တိုင်ကြားစာကို လက်ခံဆောင်ရွက်ပေးခြင်းမရှိပါ” ဟု အဆိုပါရဲစခန်းမှ စခန်းမှူးက ဒုရဲမှူးစိုးဝင်းက မဇ္ဈိမကို ပြောသည်။
ဒက္ခိဏသီရိရဲစခန်းသို့ အမျိုးသားဒီမိုကရေစီအဖွဲ့ချုပ်၏ ကိုယ်စားလှယ်လောင်း ကိုသန့်ဇင်ထွန်း နှင့် သူ၏ ကိုယ်စားလှယ် ဒေါ်သန်းသန်းစိုးတို့ သွားရောက်ကာ တိုင်ကြားခဲ့ခြင်းဖြစ်သည်။
“မနက်ဖြန်မှာ ပြည်ထောင်စုကော်မရှင်ရုံးချုပ်ကို ကျွန်တော်ရဲ့ ကိုယ်စားလှယ်ကနေ သွားရောက်တိုင်ကြားမှာပါ” ဟု ဦးသန့်ဇင်ထွန်းက စက်တင်ဘာ ၆ရက်က မဇ္ဈိမကို ပြောသည်။
တစ်သီးပုဂ္ဂလ ကိုယ်စားလှယ်လောင်း ဦးကျော်ဝင်းသည် စက်တင်ဘာလ ၄ ရက်က နေပြည်တော် ကောင်စီနယ်မြေ ဒက္ခိဏသီရိမြို့နယ်ရှိ ကျေးများအချို့တွင် “ဒို့အတွက် အမှန်တကယ်အကျိုးပြုမည့် ကိုယ်စားလှယ် ဦးမြင့်လှိုင်ကို ဒို့အားလုံး ထောက်ခံ ဆန္ဒမဲပေးကြပါစို့” ဟု စာသားများ ထီးများကို ပေးဝေခဲ့ပြီး မဲဆွယ်ခဲ့သည်။
အလားတူ ဝန်ကြီးဦးမြင့်လှိုင်ကလည်း ဒက္ခိဏသီရိမြို့နယ် ရွာသစ်ရွာကျေးရွာတွင် ဆီ နှင့် ကျောင်းသုံးပစ္စည်းများပေးအပ်ခဲ့သည်။
ထို့ကြောင့် အမျိုးသား ဒီမိုကရေစီအဖွဲ့ချုပ် (နေပြည်တော်) က ပြည်ထောင်စု ကြံ့ခိုင်ရေးနှင့် ဖွံံ့ဖြိုးရေးပါတီကိုယ်စားပြု ယှဉ်ပြိုင်မည့် ဗိုလ်ချုပ်ကြီး (ငြိမ်း)ဝဦးလှဌေးဝင်း(ဇေယျာသီရိ မဲဆန္ဒနယ်၊ ပြည်သူ့လွှတ်တော် ကိုယ်စားလှယ်လောင်း)၊ ဒုတိယဗိုလ်ချုပ်ကြီး ဦးဝေလွင် ( ပုဗ္ဗသီရိမဲဆန္ဒနယ် ပြည်သူ့လွှတ်တော်ကိုယ်စားလှယ်လောင်း)၊ ပြည်ထောင်စုဝန်ကြီး ဦးမြင့်လှိုင်(လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန) နှင့် ဦကျော်ဝင်း(လယ်/ဆည် ငြိမ်း)( တစ်သီးပုဂ္ဂလ အမျိုးသားလွှတ်တော် မဲဆန္ဒနယ်အမှတ်-၁၀ )တို့ကို ပြည်ထောင်စုနယ်မြေ ရွေးကောက်ပွဲ ကော်မရှင် အဖွဲ့ခွဲထံသို့ စက်တင်ဘာ ၇ရက်တွင် တိုင်ကြားမည်ဟု လက်ရှိပြည်သူ့လွှတ်တော်ကိုယ်စားလှယ် ဦးမင်းသူက စက်တင်ဘာ ၅ရက်က သတင်းစာရှင်းလင်းပွဲတွင် ပြောသည်။
နိုဝင်ဘာ ၈ရက်တွင် ကျင်းပမည့် ၂၀၁၅ အထွေထွေရွေးကောက်ပွဲတွင် ဝင်ရောက်ယှဉ်ပြိုင်မည့် ကိုယ်စားလှယ်လောင်းများ အနေဖြင့် စက်တင်ဘာ ၈ရက်တွင် စတင်ကာ တရားဝင်မဲဆွယ်နိုင်ကြောင်း ပြည်ထောင်စုရွေးကောက်ပွဲကော်မရှင်က ကြေငြာထားသည်။
ပြည်သူ့လွှတ်တော် ရွေးကောက်ပွဲဥပဒေ ရွေးကောက်ပွဲဆိုင်ရာ ပြစ်မှုများနှင့်ပြစ်ဒဏ်များ အခန်း(၁၃)ပုဒ်မ ၅၈ (က)တွင် ရွေးကောက်ပွဲဆိုင်ရာ အခွင့်အရေးကို မတရားသဖြင့် ရရှိစေရန်သော် လည်းကောင်း၊ ယင်းအခွင့်အရေးကို ရရှိခဲ့ခြင်းအတွက် ကျေးဇူးတုံ့ပြန်သည့် အနေဖြင့်သော်လည်းကောင်း ငွေ၊ ပစ္စည်း၊ အစားအသောက်၊ ရာထူး၊ အလုပ်အကိုင်နေရာပြောင်းရွှေ့မှု သို့မဟုတ် အခြားအခွင့်အရေးတစ်ခုခုကို အသုံးပြုလျက် လဘ်ပေးခြင်း သို့မဟုတ် လဘ်ယူခြင်း ပြုလုပ်ကြောင်း ပြစ်မှုထင်ရှား စီရင်ခြင်းခံရလျင် ထိုသူအား တစ်နှစ်ထက်မပိုသော ထောင်ဒဏ်ဖြစ်စေ၊ ကျပ်တစ်သိန်းထက်မပိုသော ငွေဒဏ်ဖြစ်စေ၊ ဒဏ်နှစ် ရပ်လုံးဖြစ်စေ ချမှတ်ရမည်ဟု ပြဌာန်းထားသည်။
