တံတားဆောက်ရာတွင် အရည်အသွေးထိမ်ချန်သူများကို အရေးယူနိုင်မည့် ဥပဒေကြမ်းတင်သွင်း

.

ဓာတ်ပုံ-EPA

နေပြည်တော်၊ သြဂုတ်လ ၂၁ ။           ။ တံတားကြီးများ တည်ဆောက်မှုကို စစ်ဆေးရာတွင် စံချိန်စံညွှန်းလျော့နည်းတည်ဆောက်ခြင်းကို တမင်ထိမ်ချန် ဆောင်ရွက်သူများအတွက် ပြစ်မှုနှင့်   ပြစ်ဒဏ်များပါဝင်သည့် ဥပဒေကြမ်းကို ယနေ့ သြဂုတ်လ ၂၁ ရက်နေ့က အမျိုးသားလွှတ်တော်တွင် တင်သွင်းခဲ့သည်။

အဆိုပါ ဥပဒေကြမ်းကို ဆောက်လုပ်ရေးဝန်ကြီးဌာန ဒုတိယ၀န်ကြီး ဦးကျော်လင်းက အမျိုးသားလွှတ်တော် တွင် ဆွေးနွေးပေးနိုင်ရန် ယနေ့ အဆိုတင်သွင်းခဲ့ခြင်းဖြစ်သည်။

“ဆောက်လုပ်ရေးဝန်ကြီးဌာနမှ ၂၀၁၈ ခုနှစ်၊ မတ်လအထိ ပေ ၁၈၀ နဲ့ အထက်တံတားကြီး ၅၄၉ စင်းကို တည်ဆောက်ထိန်းသိမ်းထားလျက်ရှိပြီး အဆိုပါ တံတားကြီးများ ရေရှည်တည်တံ့ခိုင်မြဲရေးနှင့် ဥပဒေအရ အကာအကွယ်ပြုရမည့်လုပ်ငန်းစဉ်များအတွက် အလွန်အရေးပါတဲ့ တံတားကြီးများ ဥပဒေကို ရေးဆွဲပြဋ္ဌာန်းနိုင် ရေးဆောင်ရွက်ရခြင်းဖြစ်ပါတယ်” ဟု ဒုတိယ၀န်ကြီးဦးကျော်လင်းက   ပြောကြားသည်။

ဆောက်လုပ်ရေးဝန်ကြီးဌာန အတိုင်ပင်ခံပညာရှင်အဖွဲ့၊ တံတားဦးစီးဌာနနှင့် လမ်းဦးစီးဌာနတို့မှ ၂၀၁၆ ခုနှစ် ဇူလိုင်လ မှ ၂၀၁၈ ခုနှစ်၊ ဇန်န၀ါရီလထိ ညှိနှိုင်းဆွေးနွေးပွဲများ ပြုလုပ်ခဲ့ကာ ရှေ့နေချုပ်ရုံးထံမှ သဘောထား မှတ်ချက်များ တောင်းခံပြီး ရေးဆွဲထားသည့် ဥပဒေကြမ်းဖြစ်သည်။  

လမ်းနှင့်တံတားများ အသုံးပြုခြင်းဆိုင်ရာ ဥပဒေကို ၁၉၅၈ ခုနှစ်တွင်၎င်း၊ လမ်းမကြီးများ ဥပဒေကို ၂၀၀၀ ခုနှစ် တွင်၎င်း၊ အမြန်လမ်းမကြီးဥပဒေကို ၂၀၁၅ ခုနှစ်တွင်လည်းကောင်း၊ စုပေါင်းပိုင် အဆောက်အအုံ ဆိုင်ရာ ဥပဒေ ကို ၂၀၁၆ ခုနှစ်တွင် ၄င်း ရေးဆွဲပြဋ္ဌာန်းထားရှိပြီးဖြစ်သည်ဟု ဆောက်လုပ်ရေးဝန်ကြီးဌာနမှ သိရသည်။

“ ဥပဒေကြမ်းတွင် တံတားကြီးများကို တည်ဆောက်ခြင်း ပြုပြင်ခြင်းလုပ်ငန်းစဉ်များ သာမကဘဲ ဒီဇိုင်း ရေးဆွဲခြင်း၊ တည်ဆောက်ရေးပစ္စည်းများ၏ အရည်အသွေးစံနှုန်း သတ်မှတ်ထားခြင်း၊ ကြံ့ခိုင်မှုကို အချိန်ဇယား တိကျစွာ ကာလသတ်မှတ်ထား၍ စစ်ဆေးခြင်းအပြင် အသုံးပြုနိုင်သည့် ကာလသက်တမ်းအပိုင်းအခြားများ သတ်မှတ်ထားခြင်းတို့ကိုပြင်ဆင်ဖြည့်စွက်ထားတယ်” ဟု အဆိုပါ ဥပဒေကြမ်းအပေါ် အမျိုးသားလွှတ်တော် ဥပဒေကြမ်းကော်မတီမှ စိစစ်ထားသည့် လေ့လာတွေ့ရှိချက်ကို တပ်မတော်သားကိုယ်စားလှယ် အမျိုးသားလွှတ်တော် ဥပဒေကြမ်းကော်မတီဝင် ဗိုလ်ချုပ်တင့်လွင်က လွှတ်တော်တွင်း ပြောကြားခဲ့သည်။

“တံတားကြီးများ အရည်အသွေး မပြည့်မီမှုကြောင့် ပျက်စီးမှုများဖြစ်ပေါ်လာခြင်းမရှိစေရန် အရည်အသွေး စံချိန်စံညွှန်း လျော့နည်း၍ တည်ဆောက်ခြင်း ၊ ပြုပြင်ခြင်း၊ အရည်အသွေးစစ်ဆေးရာတွင် သိလျက်နှင့် တမင်ထိမ်ချန်ဆောင်ရွက်ခြင်းအတွက် အရေးယူဆောင်ရွက်မှု ၊ ပြစ်မှု၊ ပြစ်ဒဏ်များ ဖြည့်စွက်ပြဋ္ဌာန်းရန် လည်းကောင်း၊ တံတားကြီးများ၏ လုံခြုံရေး ၊ ကြံ့ခိုင်ရေးနှင့် သက်တမ်းပြည့်ဝစွာ အသုံးပြုနိုင်ရေးတို့အတွက် ထိရောက်ဟန့်တားသည့်ထောင်ဒဏ်နှင့် ငွေဒဏ်ပြဋ္ဌာန်းချက်များ ဖော်ပြပါရှိနိုင်စေရန်လည်းကောင်း” စသည့် အချက်များ ပါရှိသည်ဟု ဗိုလ်ချုပ်တင့်လွင်က ပြောကြားခဲ့သည်။

၎င်းဥပဒေကြမ်းနှင့်ပတ်သက်ပြီး ပြင်ဆင်ချက် အဆိုတင်သွင်းလိုသည့် လွှတ်တော်ကိုယ်စားလှယ်များသည် ပြင်ဆင်လိုသည့် အပိုဒ်၊ အပိုဒ်ခွဲများအလိုက် အသေးစိတ်ဖော်ပြ လက်မှတ်ရေးထိုးကာ သြဂုတ်လ ၂၇ ရက်၊ တနင်္လာနေ့ထက် နောက်မကျဘဲ အမျိုးသားလွှတ်တော်ရုံး ညွှန်ကြားရေးမှူးချုပ်ထံ အမည်စာရင်း တင်သွင်းရမည် ဟု အမျိုးသားလွှတ်တော် ဥက္ကဋ္ဌ မန်းဝင်းခိုင်သန်းက ပြောကြားခဲ့သည်။