မကွေးတိုင်းအတွင်းရှိ ရေသန့်စက်ရုံများ စီမံခန့်ခွဲမှုအပိုင်း မလိုက်နာပါက စက်ရုံပိတ်သိမ်းမည်

.

သြဂုတ် ၁၈ ။            ။ မကွေးတိုင်းအတွင်းရှိ မြို့နယ်များတွင် ရေသန့်ထုတ်လုပ်ရောင်းချနေသော ရေသန့်စက်ရုံလုပ်ငန်းရှင်များသည် ရေသန့်စက်ရုံ၏ စီမံခန့်ခွဲမှု အဓိက အချက် (၃) ချက်ကို လိုက်နာဆောင်ရွာခြင်း မရှိပါက စက်ရုံပိတ်သိမ်းသည် အထိ အရေးယူဆောင်ရွက်သွားမည်ဟု မကွေးတိုင်းဒေသကြီး အစားအသောက်နှင့် ဆေးဝါးကွပ်ကဲရေး ဦးစီးဌာန တိုင်းတာဝန်ခံ ဒေါက်တာပြည့်ထူးက ပြောသည်။

သြဂုတ်လ ၁၇ ရက်နေ့ နံက်ပိုင်း၌ မကွေးမြို့ Magway Tea House ခန်းမတွင် ကျင်းပပြုလုပ်သည့် တိုင်း အစားအသောက်နှင့် ဆေးဝါးကွပ်ကဲရေးဦးစီးဌာန တာဝန်ရှိသူများနှင့် တိုင်းအတွင်းရှိ ရေသန့်လုပ်ငန်းရှင် များတွေ့ဆုံပွဲအခမ်းအနားတွင် ပြောခဲ့ခြင်း ဖြစ်သည်။

အဆိုပါ အချက် ၃ ချက်မှာ မကွေးတိုင်းအတွင်းရှိ ရေသန့်စက်ရုံများ၏ တည်နေရာအကျယ်အဝန်း အဆောက် အဦ ဖွဲ့စည်းမှုပုံစံသည် အခြားလုပ်ငန်းများနှင့် တွဲဘက်လုပ်ကိုင်ခြင်း မရှိရ။ ၄င်းအဆောက်အဦ၏ အပေါ်ထပ် များတွင် လူနေထိုင်ခြင်း မရှိရ။ ရေသန့်စက်ရုံ၏ စက်ပစ္စည်းများသည် ကောင်းမွန်သည့် ဓါတုပစ္စည်းများကို ဖယ်ရှားနိုင်ခြင်း၊ Chemical များ ဖယ်ရှားနိုင်ခြင်း၊  (Micro) မိုက်ခရို ဟု ခေါ်သည့် ပိုးမွှားများအား ဖယ်ရှားနိုင် သည့် စက်ပစ္စည်းများ ဖြစ်ရမည်ဖြစ်သည်။

ထိုအပြင် ယင်းစက်ရုံရှိ ဝန်ထမ်းများသည် တစ်ကိုယ်ရေသန့်ရှင်းမှုဖြစ်ရမည် ဖြစ်ပြီး ၄င်းတို့တွင် နှာခေါင်းစီး တပ်ဆင်ခြင်း၊ လက်အိတ်စွပ်ခြင်း၊ ခေါင်းစည်းများ ဝတ်ဆင်ရမည်ဖြစ်ကြောင်း မကွေးတိုင်းဒေသကြီး အစား အသောက်နှင့်ဆေးဝါးကွပ်ကဲရေးဦးစီးဌာန တိုင်းတာဝန်ခံ ဒေါက်တာပြည့်ထူးက ပြောသည်။

“ တိုင်းအတွင်းမှာ ရေသန့် စက်ရုံ(၈၀)ကျော်ရှိတယ်၊ အဓိက နှစ်ပိုင်းရှိတယ်။ စီမံခန့်ခွဲမှုအပိုင်းနဲ့ ဥပဒေ ကြောင်းအရ အရေးယူတာရှိပါတယ်။ ဥပဒေကြောင်းအရ စက်ရုံပိတ်သိမ်းတာ မရှိပါဘူးခုထိပေါ့။ စီမံခန့်ခွဲမှု ပိုင်းအရ သက်တမ်းတိုး ပိတ်သိမ်းမှုနှင့် လုံးဝစက်ရုံ ပိတ်သိမ်းမှု ဒီလိုအရေးယူခဲ့တဲ့ရေသန့်စက်ရုံ (၁၃)ရုံ ရှိခဲ့တယ်” ဟု ဒေါက်တာပြည့်ထူးက ပြောသည်။

မကွေးတိုင်းအတွင်း ကောင်းမွန် ၊ ဘို့ရတနာ ၊ Super Top ၊ ခေတ်ရှေ့၊ ပွင့်ထွန်း၊ ရတု၊ Silver Snow။ K M G ၊ Mon Star။ Slow Moutain၊ ငွေနဒီ စုစုပေါင်း ရေသန့်  ၁၂ မျိုး ရှိသည်။