ဗိုလ်ချုပ်ရုပ်ရှင်ဇာတ်ညွှန်း စက်တင်ဘာလကုန်တွင် ပြီးစီးမည်

.

ရန်ကုန် သြဂုတ် ၁၅ ။         ။ ဗိုလ်ချုပ်ရုပ်ရှင်ရိုက်ကူးရန် ဇာတ်ညွှန်းမှာ ပြီးစီးသလောက် ရှိနေပြီး လာမည့် စက်တင်ဘာလကုန်တွင် အချောသပ် နိုင်လိမ့်မည်ဖြစ်ကြောင်း ဒါရိုက်တာ မင်းထင်ကိုကိုကြီးက မဇ္ဈိမသို့ ပြောသည်။

ဇာတ်ညွှန်းပြီးစီးသည်နှင့် ၆ လ ဝန်းကျင် ရိုက်ကူးရေး ပြင်ဆင်ကာ ဆက်လက်ရိုက်ကူးသွားနိုင်ရန်ကိုလည်း ၎င်းက မျှော်လင့်ထားသည်။

"ဇာတ်ညွှန်းက စက်တင်ဘာလကုန်လောက်မှာ ပြီးတော့မှာပါ။" ဟု ဒါရိုက်တာ မင်းထင်ကိုကိုကြီးက ပြောသည်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း ဗိုလ်ချုပ်အောင်ဆန်းအတ္ထုပ္ပတ္တိ ရုပ်ရှင်ဇာတ်ကားကြီး ရိုက်ကူးမည့် အချိန်ကာလကို တစ်လတစ်ကြိမ်ခန့် မေးမြန်းနေလျက်ရှိနေသည်ဟု ပြည်ထောင်စုဝန်ကြီး သူရဦးအောင်ကိုက ပြောကြားထားသည်။

အဆိုပါ ရုပ်ရှင်ရိုက်ကူးရန် ကျပ်သိန်းပေါင်း ၁ သောင်းခန့် လျာထားကြောင်း သိရပြီး လက်ရှိတွင် စုစုပေါင်း ကျပ်သိန်း ၁၂၀၀၀ ကျော်နှင့် အမေရိကန်ဒေါ်လာ ၅၀၀၀ နီးပါး ရရှိထားကြောင်း ဇွန်လ ၃၀ ရက်နေ့က ပြုလုပ်ခဲ့သည့် ဗိုလ်ချုပ်အောင်ဆန်း အတ္ထုပ္ပတ္တိ ရုပ်ရှင်ရိုက်ကူး ထုတ်လုပ်ရေး လုပ်ငန်းကော်မတီ ပဉ္စမအကြိမ် လုပ်ငန်းအစည်းအဝေးတွင် တာဝန်ရှိသူများက သတင်းမီဒီယာများကို ရှင်းလင်းခဲ့သည်။

ဗိုလ်ချုပ်အောင်ဆန်းရုပ်ရှင်ဖြစ်မြောက်ရေးအဖွဲ့ ကို ၂၀၁၂ ဖေဖော်ဝါရီ ၁၃ ရက်တွင် ဖွဲ့စည်းခဲ့ခြင်း ဖြစ်ခဲ့သော်လည်း ဗိုလ်ချုပ်အောင်ဆန်းရုပ်ရှင် မှာ ၅ နှစ်တာကာလအတွင်း ရိုက်ကူးနိုင်ခဲ့ခြင်းမရှိ၍ ဝေဖန်မှုများ ထွက်ပေါ်ခဲ့သည်။

လက်ရှိတွင် ဗိုလ်ချုပ်အောင်ဆန်းအတ္ထုပ္ပတ္တိ ရုပ်ရှင် ဇာတ်ကား ဇာတ်ညွှန်းရေးသားနေပြီး ၂၀၁၉ ခုနှစ် ဒီဇင်ဘာလအတွင်း အပြီးရိုက်ကူးခြင်းနှင့် ၂၀၂၀ ခုနှစ်တွင် ရုံတင်ပြသနိုင်မည်ဟု ဒါရိုက်တာ မင်းထင်ကိုကိုကြီးက ဆိုသည်။