ကြက်ဆူစိုက်ရန် ငှားရမ်းခဲ့သောမြေဧက ၃၂၀၀ အား ဖျက်သိမ်းရန် လွှတ်တော်၌ ဆွေးနွေးမည်

.

(ဓါတ်ပုံ - Tun Tun Win)

မုံရွာ၊ သြဂုတ် ၁၁။         ။ စစ်ကိုင်းတိုင်းဒေသကြီး ကနီမြို့နယ်၌ ကြက်ဆူစိုက်ရန် ငှားရမ်းခဲ့သော မြေဧက ၃၂၀၀ အား ဖျက်သိမ်းရန် စစ်ကိုင်းတိုင်းဒေသကြီး လွှတ်တော်၌ ဆွေးနွေးကြမည်ဖြစ်ကြောင်း၊ လွှတ်တော်ကိုယ်စားလှယ်များထံမှ စုံစမ်း သိရသည်။

ကနီမြို့နယ်၊ ပေါက်အင်းတောင်ဒေသတွင် ကြက်ဆူပင်စိုက်ပျိုးရန်အတွက် တင်ဝင်းထွန်းကုမ္ပဏီမှ တစ်ဧကလျှင် ၁၀၀ ကျပ်နှုန်းဖြင့် သစ်တောဌာနထံမှနှစ် ၃၀ စာချုပ်ဖြင့် ငှားရမ်းလုပ်ကိုင်နေခြင်းဖြစ်ပြီး ယင်းစာချုပ်အား ဖျက်သိမ်းရန် အဆိုအား ဆွေးနွေးကြမည်ဖြစ်သည်။

ပေါက်အင်းတောင်သစ်တောကြိုးဝိုင်းအား ၂၀၀၆ ခုနှစ်အတွင်းက ကြက်ဆူစီမံကိန်းအထူးဇုန်အဖြစ် သတ်မှတ်ခဲ့ပြီး ၂၀၀၉ ခုနှစ် မတ်လတွင် အဆိုပါကုမ္ပဏီ မှ ငှားရမ်းခဲ့ခြင်းဖြစ်သည်။

"အကောက်ခွန်ဌာနကိုမေးကြည့်တော့ အခုချိန်ထိ မြေငှားခပေးထားတာမရှိဘူးလို့ ဆိုတယ်။ နောက်ပြီး ကုမ္ပဏီဘက်က စာချုပ်ပါ စည်းကမ်းချက်တွေကိုလည်း လိုက်နာမှုမရှိတာတွေ တွေ့နေရတယ်။ စာချုပ် ဖျက်သိမ်းပြီး သစ်တောပိုင်မြေအဖြစ် ပြန်လည် သတ်မှတ်သင့်ကြောင်း လွှတ်တော်မှာ ဆွေးနွေးကြမှာပါ။" ဟု ကနီမြို့နယ်၊ တိုင်းဒေသကြီးလွှတ်တော်ကိုယ်စားလှယ် ဦးထွန်းထွန်းဝင်းက ပြောသည်။

ကနီမြို့နယ်မှ တိုင်းဒေသကြီးလွှတ်တော်ကိုယ်စားလှယ် ဦးထွန်းထွန်းဝင်းက သြဂုတ် ၉ ရက်က ပြုလုပ်သော (၁၅) ကြိမ်မြောက် တိုင်းဒေသကြီးလွှတ်တော် (၉) ရက်မြောက်နေ့တွင် အဆိုတင်သွင်းခဲ့ခြင်းဖြစ်ပြီး ကိုယ်စားလှယ်များကလည်း လွှတ်တော်၌ လက်ခံဆွေးနွေးရန် သဘောတူခဲ့သည်။

ယင်းသို့ ကြက်ဆူစိုက်ပျိုးရန် ကုမ္ပဏီဘက်မှ ငှားရမ်းပြီးနောက်တွင် ယခင်ကနေထိုင်ခဲ့ကြသော ဒေသခံများမှာ မြေယာကျူးကျော်မှုဖြင့် ထောင်ဒဏ်ကျခံခဲ့ရသည်။အဆိုပါဒေသ၌ အိမ်ခြေ ၃၅၀ ကျော်၊ လူဦးရေ ၁၅၀၀ ကျော်နေထိုင်လျှက်ရှိပြီး လက်ရှိအချိန်တွင် တောင်သူ (၁၄)ဦးမှာ တရားရင်ဆိုင်နေကြောင်း သိရသည်။

ယင်းအဆိုကို (၁၅) ကြိမ်မြောက် စစ်ကိုင်း တိုင်းဒေသကြီးလွှတ်တော် (၁၁) ရက်မြောက်နေ့ (တနင်္လာနေ့) တွင် ဆွေးနွေးနိုင်ဖွယ်ရှိကြောင်း လွှတ်တော်ကိုယ်စားလှယ်များက ဆိုသည်။