မက္ကာမြို့တွင် ကွပ်မျက်ခံရသူမှာ မြန်မာနိုင်ငံသားမဟုတ်ဟု နိုင်ငံခြားရေးထုတ်ပြန်

.

 

သြဂုတ်လ ၁၀ ရက် ။               ။ ဆော်ဒီအာရေဗျနိုင်ငံ၊ မက္ကာမြို့တွင် လူသတ်မှု၊ ခိုးယူမှုနှင့် အဓမ္မပြုကျင့်မှုများဖြင့် စွဲချက်တင်၍ ကွပ်မျက်ခဲ့ သည့် မြန်မာနိုင်ငံသားဟုဆိုသူသည် မြန်မာသံရုံးတွင် မှတ်ပုံတင်ထားသည့် မြန်မာနိုင်ငံသားများ စာရင်းတွင် ပါဝင်ခြင်း မရှိကြောင်း စိစစ်တွေ့ရှိသည်ဟု နိုင်ငံခြားရေးဝန်ကြီးဌာနမှ  ထုတ်ပြန်သည်။

ပြည်ပအခြေစိုက်သတင်းဌာနတစ်ခုတွင် ဖော်ပြခဲ့သော မြန်မာနိုင်ငံသားဟုဆိုသူ Elias Abulkalaam Jamaledden ဆိုသူ၏ သတင်းအား သြဂုတ်လ ၈ ရက်က အင်တာနက်သတင်း၌ တင်ခဲ့ခြင်းဖြစ်ပြီး အခြားပြည်ပသတင်းဌာန ၂ ခုမှလည်း တင်ခဲ့သောကြောင့် နိုင်ငံခြားရေးဝန်ကြီးဌာနမှ  ရီယာဒ်မြို့၊ မြန်မာသံရုံးသို့ စိစစ်ခဲ့ကြောင်း သြဂုတ်လ ၁၀ ရက် ထုတ်ပြန်ချက်တွင် ဖော်ပြထားသည်။

အဆိုပါကိစ္စနှင့် ပတ်သက်၍ ဆော်ဒီအာရေဗျ နိုင်ငံခြားရေးဝန်ကြီးဌာနမှ မြန်မာသံရုံးသို့ တရားဝင် အကြောင်းကြားလာခြင်း မရှိသည့်အပြင် ဆော်ဒီအာရေဗျ အစိုးရ၏ အင်္ဂလိပ်သတင်းစာများတွင်လည်း ဖော်ပြခြင်း မရှိပါကြောင်း၊ မြန်မာသံရုံးတွင် မှတ်ပုံတင်ထားသည့် ဆော်ဒီအာရေဗျနိုင်ငံတွင် နေထိုင်သူ မြန်မာနိုင်ငံသားများ စာရင်းတွင်လည်း ပါဝင်ခြင်း မရှိကြောင်း၊ ၎င်း၏အမည်ဖြင့် မြန်မာနိုင်ငံကူးလက်မှတ် ထုတ်ပေးထားခြင်းလည်း မရှိကြောင်း စိစစ်တွေ့ရှိရပါသည်ဟု ထုတ်ပြန်ထားသည်။

ဆော်ဒီအာရေဗျနိုင်ငံတွင် ရောက်ရှိနေကြသည့် အထောက်အထားမဲ့ ရွှေ့ပြောင်းလုပ်သားအချို့အား (Special Document) နေထိုင်ခွင့်ကတ်ပြားများကို ထုတ်ပေးထားရာ အာရပ်ဘာသာဖြင့် Burmese ဟူ၍ ရေးသားထားမှုများ ရှိကြောင်း၊ပြစ်ဒဏ်ပေးခံရသူမှာ မြန်မာနိုင်ငံသားဟု ဆိုသည့်သတင်းမှာ မှန်ကန်မှု မရှိနိုင်ကြောင်း မြန်မာသံရုံးမှ ပြန်ကြားထားကြောင်း ပါရှိသည်။