ဓာတ်ကြိုးများ ပြတ်ကျနေပါက လျှပ်စစ်ရုံးများသို့ ကူညီအကြောင်းကြားရန် နှိုးဆော်

ဓာတ်ကြိုးများ ပြတ်ကျနေပါက လျှပ်စစ်ရုံးများသို့ ကူညီအကြောင်းကြားရန် နှိုးဆော်
ဓာတ်ပုံ - YESC Call Center

 

ရန်ကုန် ၊ သြဂုတ် ၂ ။              ။ ရန်ကုန်တိုင်းဒေသကြီးအတွင်းရှိ ခရိုင်နှင့်မြို့နယ်များတွင် လျှပ်စစ်ဓာတ်အားလိုင်းကြိုးများ ပြုတ်ကျ၊ပြတ်ကျခြင်းများကို တွေ့ရှိပါက နီးစပ်ရာ လျှပ်စစ်ရုံးများသို့ ကူညီအကြောင်းကြားရန် ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက နှိုးဆော်ထားသည်။

သြဂုတ်လ ၂ရက်နေ့တွင် မိုးသည်းထန်စွာ ရွာသွန်းမှုကြောင့် ရန်ကုန်တိုင်းဒေသကြီးအတွင်းရှိ ခရိုင်နှင့်မြို့နယ်အချို့တွင် လျှပ်စစ်ဓာတ်အားလိုင်းများပေါ်သို့ သစ်ပင်၊သစ်ကိုင်းများ ရိုက်ခတ်မိခြင်း၊ သစ်ပင်ကြီးများ ပြိုလဲခြင်းတို့ ဖြစ်ပေါ်ရာမှ လျှပ်စစ်ဓာတ်အားလိုင်းကြိုးများ ပြုတ်ကျ၊ ပြတ်ကျခြင်းတို့ ဖြစ်နိုင်ပြီး လျှပ်စစ်အန္တရာယ် ဖြစ်ပွားနိုင်ကြောင်း သိရသည်။

အဆိုပါအခြေအနေများကို မီးသုံးသူ ပြည်သူများမှ ပြတ်ကျနေသော ဓာတ်အားလိုင်းကြိုးများကို တွေ့ရှိပါက နီးစပ်ရာ မြို့နယ်၊လျှပ်စစ်ရုံးများသို့လည်းကောင်း၊YESC Call Center 24 Hrs Service Telephone များ (01-2302285 ၊01-2302286 ၊ 01-2302287၊ 01-2302288၊ 01-2302289 ) သို့လည်းကောင်း ဆက်သွယ်တိုင်ကြားပေးပါရန် ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက ကြေညာခဲ့သည်။

လက်ရှိတွင် ရန်ကုန်လျှပ်စစ်ဓာတ်အားပေးရေးကော်ပိုရေးရှင်းအနေဖြင့် ရန်ကုန်တိုင်းဒေသကြီးအတွင်း မြို့နယ်များရှိ ရှုပ်ထွေးဆားဗစ်ဝါယာကြိုးများ ရှင်းလင်းပြုပြင်မှုများကိုဆောင်ရွက်နေသကဲ့သို့ ကြံ့ခိုင်မှု အားနည်းနေသော တာဝါတိုင်များကို အသစ်လဲလှယ်ခြင်းများလည်း ဆောင်ရွက်နေကြောင်း သိရသည်။

 

Mizzima Weekly