ဗိုလ်ချုပ်ကြေးရုပ်နောက်ကွယ်က ကယားနိုင်ငံရေး

ကယားပြည်နယ်မှာ အာဏာပိုင်တွေနဲ့ ထိပ်တိုက်တွေ့နေသူတွေဟာအာဏာရပါတီကိုဝန်းရံခဲ့သူတွေ ဖြစ်နေပါတယ်

(လွိုင်ကော်)— ၂ဝ၁၂ ဇူလိုင်လရဲ့တစ်ခုသော ညသန်းခေါင်အချိန်မှာ စိတ်တူကိုယ်တူရှိကြတဲ့ ကရင်နီလူငယ်တချို့ဟာ လျှို့ဝှက်နိုင်ငံရေးလှုပ်ရှားမှုတစ်ခု လုပ်ဖို့တိုင်ပင်ခဲ့ကြပါတယ်။

ဆယ်စုနှစ် နှစ်ခုကျော်ကြာတဲ့ စစ်အုပ်ချုပ်ရေးအဆုံးသတ်သွားချိန် စစ်အစိုးရဟောင်းရဲ့လူတွေအဲဒီအချိန်က သူတို့ကိုနေရာအနှံ့ကနေ စောင့်ကြည့်နေတဲ့ကြားက ဗိုလ်ချုပ်အောင်ဆန်းကို အမွှမ်းတင်ထားတဲ့၊ အာဇာနည်နေ့နဲ့ဆိုင်တဲ့ စာရွက်စာတမ်းတွေကို မြို့အနှံ့ လိုက်ကပ်ကြပါတယ်။

ကယား ပြည်နယ် ဝန်ကြီးချုပ် ဦးအယ်လ်ဖောင်းရှို (ဓာတ်ပုံ - ကယားပြည်နယ်အစိုးရအဖွဲ့ရုံး)

ရက်အနည်းငယ်ကြာတော့ သူတို့ဟာပိတ်ထားတာကြာပြီဖြစ်တဲ့ကယားပြည်နယ် လွိုင်ကော်မြို့လယ်က အာဇာနည် ကျောက်တိုင်စိုက်ထူထားတဲ့ ပန်းခြံထဲက မြက်တွေကို စတင်ရှင်းလင်းပါတော့တယ်။

အာဇာနည်နေ့အရောက်မှာတော့ လူငယ် ၅ဝ လောက်ဟာ ရဲနဲ့အရပ်ဝတ်ထောက်လှမ်းရေး ၂ဝဝ လောက် စောင့်ကြည့်နေတဲ့ကြားထဲကနေလွတ်လပ်ရေးခေါင်းဆောင်တွေကိုချီတက် အလေးပြုခဲ့ကြပါတယ်။

“နိုင်ငံရေးသမားပါလို့ အခုပြောနေတဲ့သူတွေ (အဲဒီတုန်းက) တစ်ယောက်မှမပါဘူး” လို့ အာဇာနည်နေ့ကို အသစ်တဖန်ပြန်အသက်သွင်းခဲ့ရာမှာ ဦးဆောင်ခဲ့တဲ့ ကယန်းလူငယ် ခွန်းအသန်းကပြောပါတယ်။

နောက်ခြောက်နှစ်အကြာ ၂ဝ၁၈ ဇူလိုင်မှာတော့ အဲဒီလူငယ်ထဲက တစ်ဒါဇင်လောက်ဟာ လွိုင်ကော်မှာ ဗိုလ်ချုပ်ကြေးရုပ် စိုက်ထူရေး အစီအစဉ်ကို ကန့်ကွက်မှုကြောင့် တရားစွဲခံနေရပြီး လေးယောက်ဟာလွိုင်ကော် အကျဉ်းထောင်မှာရောက်နေပါတယ်။

ဗိုလ်ချုပ်အောင်ဆန်းကြေးရုပ်စိုက်ထူမှုကို ဇူလိုင် ၃ ရက်နေ့က ကန့်ကွက် ဆန္ဒပြသူများ (ဓာတ်ပုံ - ခွန်းအသန်း)

စစ်ပွဲတွေ၊ ဘာသာရေးပဋိပက္ခတွေ မရှိဘဲ ငြိမ်သက်နေတဲ့ မြန်မာနိုင်ငံအရှေ့ဖျား ကယားပြည်နယ်မှာ ဗိုလ်ချုပ်အောင်ဆန်ကြေးရုပ်စိုက်ထူဖို့ ပြည်နယ်အစိုးရက စီစဉ်ခဲ့ပြီးတဲ့နောက်ဒေသခံတွေနဲ့အစိုးရအကြား တင်းမာမှုတွေ၊ အမြင်မကြည်လင်မှုတွေ ဖြစ်နေပါတယ်။

တစ်ချိန်က ဗိုလ်ချုပ်ကို စံပြအဖြစ် ယုံကြည်ကြတဲ့ ဌာနေတိုင်းရင်းသားတွေဟာ ဗိုလ်ချုပ်ကြေးရုပ် စိုက်ထူရေး အစီအစဉ်နဲ့ ပတ်သက်ပြီး ပြည်နယ်အစိုးရနဲ့ ထိပ်တိုက်ရင်ဆိုင်နေကြရပါတယ်။ သူတို့ဟာ အမျိုးသားဒီမိုကရေစီအဖွဲ့ချုပ် (NLD)ကို ရွေးကောက်ပွဲ အနိုင်ရအောင် ကြိုးစားပေးခဲ့ကြတဲ့သူတွေလည်း ဖြစ်ပါတယ်။

အကျပ်အတည်းများ၏အစ

ကျပ်သိန်း ၈ဝဝ နီးပါး ကုန်ကျမယ့် ဗိုလ်ချုပ်အောင်ဆန်းမြင်းစီးကြေးရုပ်ကို ကယားပြည်နယ်ခန်းမနားက ပန်းခြံမှာထားဖို့ ပြည်နယ်အစိုးရက ဖေဖော်ဝါရီလဆန်းမှာ ဆုံးဖြတ်တဲ့နောက် နှစ်ဖက်အကြားတင်းမာမှုက စတင်ပါတော့တယ်။

လွိုင်ကော်မြို့ ဗိုလ်ချုပ်အောင်ဆန်းကြေးရုပ် စိုက်ထူမည့်နေရာ (ဓာတ်ပုံ - ဖဒူ ထွန်းအောင်/Myannmar Now)

ပြည်နယ်ထဲ ပထမဆုံးစိုက်ထူမယ့် ဗိုလ်ချုပ်ကြေးရုပ်ကို ဒေသခံအချို့က သဘောမကျပါဘူး။ အထူးသဖြင့် ဌာနေ တိုင်းရင်းသားတွေ စိတ်မသက်မသာ ဖြစ်နေကြပါတယ်။ ဗိုလ်ချုပ်ဟာ လူများစုဖြစ်တဲ့ ဗမာတွေအတွက် လွတ်လပ်ရေး သူရဲကောင်း ဖြစ်ပေမယ့် ကယားပြည်နယ် အတွက်တော့ ဒီအချက်ဟာမဟုတ်ခဲ့ဘူးလို့ ကန့်ကွက်သူတွေက ထောက်ပြပါတယ်။

‘ကရင်နီပြည်’လို့ခေါ်တဲ့ ကယားဒေသဟာ သမိုင်းအစဉ်အလာအရ သီးခြားလွတ်လပ်စွာ တည်ရှိခဲ့တဲ့ ဒေသအဖြစ် ၁၈၇၅ ခုနှစ်မှာ ဗမာနဲ့ အင်္ဂလိပ်ဘုရင်ရဲ့သံတမန်တွေ လက်မှတ်ရေးထိုးခဲ့တဲ့ အချက်ကို သူတို့က ကိုင်စွဲထားခဲ့ကြပါတယ်။ ဒီအချက်ကြောင့် အဲဒီဒေသဟာ ဗမာဘုရင်ထိန်းချုပ်ထားတဲ့ဒေသမဟုတ်သလို အင်္ဂလိပ်ကိုလိုနီဒေသလည်း မဖြစ်ခဲ့ဘူးလို့ ကယားလူမျိုးတွေက အခိုင်အမာ ယုံကြည်ကြပါတယ်။

ဗိုလ်ချုပ်အောင်ဆန်းဟာ လွတ်လပ်ရေးအကြိုကာလမှာ ကယားပြည်နယ်ကို တစ်ကြိမ်ရောက်ခဲ့ဖူးပြီး နိုင်ငံသစ်ကိုအတူတကွ တည်ထောင်ကြဖို့နဲ့ ဒီလိုတည်ထောင်ရာမှာ တန်းတူအခွင့်အရေးပေးမယ်လို့ ကတိကဝတ်တွေလည်း ပြုခဲ့ပါတယ်။

မကြာသေးခင်က လွိုင်ကော်မြို့ နေအိမ်မှာ တွေ့ရတဲ့ ဒေသခံ နိုင်ငံရေးသမားကြီး ဦးတင်အောင် (ဓာတ်ပုံ - ဖဒူ ထွန်းအောင်/Myannmar Now)

ဒါပေမယ့် ဗိုလ်ချုပ်လုပ်ကြံခံခဲ့ရပြီးတဲ့နောက် မြန်မာနိုင်ငံရဲ့အခြားဒေသတွေလိုပဲ ကယားပြည်နယ်မှာလည်း အာဏာရအစိုးရတွေရဲ့ဗိုလ်ကျလွမ်းမိုးမှုတွေ တိုင်းရင်းသားအခွင့်အရေးတွေကိုကန့်သတ်မှုတွေ ဖြစ်လာခဲ့ပါတယ်။

လွတ်လပ်ရေးရပြီးနောက် ၁၉၄၇ ခုနှစ်ဖွဲ့စည်းပုံအခြေခံဥပဒေမှာ ‘ကရင်နီနယ်’ လို့သတ်မှတ်ခဲ့ပြီး ကရင်ပြည်နယ်အတွင်း ထည့်သွင်းခဲ့ပါတယ်။ ၁၉၅၁ ခုနှစ် ဖွဲ့စည်းအုပ်ချုပ်ပုံအခြေခံဥပဒေ ပြင်ဆင်ချက် အက်ဥပဒေ ပုဒ်မ (၈) အရ ‘ကယားပြည်နယ်’ အမည်နဲ့ သီးခြားပြည်နယ်တစ်ခုဖြစ်လာခဲ့ပါတယ်။

ရန်ကုန် လှိုင်သာယာမြို့နယ် ကလူဦးရေရဲ့ တစ်ဝက်တောင်မရှိတဲ့ လူဦးရေ ၂၉ဝ,ဝဝဝ နီးပါးနေထိုင်တဲ့ နိုင်ငံ အရှေ့ပိုင်းက ကယားပြည်နယ်ဟာ လွတ်လပ်ရေးရပြီးတဲ့နောက်မှာလည်း တိုးတက်မှု နှေးကွေးခဲ့ရတဲ့ ဒေသတစ်ခုဖြစ်ခဲ့ပါတယ်။

နိုင်ငံကို လျှပ်စစ်စွမ်းအင် ထုတ်ပေးရာ အဓိက နေရာဖြစ်တဲ့ လောပိတ ဓာတ်အားပေး စက်ရုံဟာ ကယားပြည်နယ်ထဲမှာ ရှိတာဖြစ် ပေမယ့် ပြည်နယ်လူဦးရေရဲ့ ထက်ဝက်လောက်ဘဲ အစိုးရလျှပ်စစ်မီးရတယ်လို့ ၂ဝ၁၄ သန်းခေါင်စာရင်းက ဆိုပါတယ်။

အခြားဒေသတွေနဲ့ ကွဲပြားတဲ့သမိုင်းနောက်ခံရှိတာကြောင့် ဗိုလ်ချုပ်အောင်ဆန်းရုပ်ထု စိုက်ထူဖို့အစီအစဉ်ကို ဒေသခံတွေကလနဲ့ချီ ကန့်ကွက်ခဲ့ကြပေမယ့် အစိုးရဟာနောက်မဆုတ်ခဲ့ပါဘူး။ နှစ်ဖက်အကြားတင်းမာမှုတွေဟာ အခုအချိန်မှာ အမြင့်ဆုံးအဆင့်ရောက်နေခဲ့ပြီး၊ ကန့်ကွက်ဆန္ဒပြမှုတွေကို အင်အားသုံးဖြိုခွင်းတာ၊ တရားစွဲဆိုတာတွေဖြစ်နေခဲ့ပါတယ်။

ပြီးခဲ့တဲ့ သီတင်းပတ်ကလည်း ဒေသခံလူငယ် ၂ဝ လောက်ဟာ ကရင်နီသမိုင်း စာရွက်ဖြန့်ဝေမှုကြောင့် နိုင်ငံတော် အကြည်ညို ပျက်စေမှု၊ ခွင့်ပြုချက်မဲ့ဆန္ဒပြမှုတွေနဲ့ တရားရင်ဆိုင်နေရပါတယ်။ သူတို့ထဲကတချို့ဟာ လွိုင်ကော်ထောင်မှာထိန်းသိမ်းခံနေရပါတယ်။

ဒေသခံတွေနဲ့အစိုးရအကြားတင်းမာလာတဲ့ဒီပြဿနာအစပြုတဲ့ ဗိုလ်ချုပ်ကြေးရုပ်ကို စိုက်ထူရေးအတွက် ပါတီနဲ့ အစိုးရက သူတို့မူဝါဒမဟုတ်ဘူးလို့ပြီးခဲ့တဲ့ လအတွင်းက ထုတ်ပြောလိုက်ပြီးတဲ့နောက်မှာ ဒေသခံအများအပြားရဲ့ ဒေါသဟာ ပြည်နယ်အစိုးရဆီကိုစုပြုံရောက်သွားခဲ့ပါတယ်။

အထူးသဖြင့်ရုပ်ထုစိုက်ထူရေးကိုတက်တက်ကြွကြွဦးဆောင်နေတဲ့ ဝန်ကြီးချုပ် ဦးအယ်လ်ဖောင်းရှိုကို ဦးတည်ကန့်ကွက်ကြပါ တော့တယ်။

မျက်နှာသစ် ခေါင်းဆောင်

ဗုဒ္ဓဘာသာဝင်တစ်ယောက်ဖြစ်ပေမယ့် ခရစ်ယာန်တွေမှည့်လေ့ရှိတဲ့ကျမ်းစာထဲက “အယ်လ်ဖောင်းရှို” ဆိုတဲ့ အမည်နဲ့အမျိုးသားဟာ ရွေးကောက်ပွဲအပြီးကယားမှာ လူသိနည်းတဲ့မျက်နှာသစ်ဖြစ်ပါတယ်။

လူဦးရေ သုံးသိန်းတောင်မပြည့်တဲ့ကယားကလက်ချိုးရေတွက်လို့ရတဲ့နိုင်ငံရေးသမားတွေကြားထဲမှာလည်း ၃၉ နှစ်အရွယ် ဦးအယ်လ်ဖောင်းရှို ဘယ်သူဘယ်ဝါမှန်း မသိကြသလို ပြည်နယ်ထိပ်ပိုင်းNLD ခေါင်းဆောင်အချို့လည်း သူ့ကို မသိကြပါဘူး။

ကယန်းနဲ့ရှမ်း သွေးပါတဲ့ ဦးအယ်လ်ဖောင်းရှိုဟာ ၂ဝ၁၅ ရွေးကောက်ပွဲ မတိုင်မီ လပိုင်းအလိုရောက်မှ ပညာရေးဝန်ထမ်းအဖြစ်ကနေ နုတ်ထွက်ပြီး NLD ထဲဝင်ဖို့ စာရင်းပေးခဲ့တာ ဖြစ်ပါတယ်။

လောပိတရှမ်းရွာလို့ခေါ်တဲ့လွိုင်ကော်မြို့နယ်ထဲက ကျေးရွာလေးမှာ မွေးဖွားခဲ့တဲ့သူဟာ စစ်ကိုင်းက ပြည်ထောင်စုတိုင်းရင်းသားလူမျိုးများဖွံ့ဖြိုးရေး တက္ကသိုလ်ကျောင်းဆင်း တစ်ဦးပါ။

ဒို့တာဝန်အရေးသုံးပါးကိုလိုက်နာပြီးပါတီနိုင်ငံရေးကင်းရှင်းပါ့မယ်လို့ကတိပေးမှ တက်ခွင့်ရခဲ့တဲ့ အဲဒီတက္ကသိုလ် ဟာ ကွယ်လွန်သူ ဗိုလ်ချုပ်ကြီးဟောင်း ဦးနေဝင်းဦးဆောင်တဲ့ အာဏာသိမ်း တော်လှန်ရေးကောင်စီပေါ်ပေါက်ပြီး နှစ်နှစ်အကြာ ၁၉၆၄ မှာ တည်ထောင်တာ ဖြစ်ပြီး ၂ဝ၁၂ ခုနှစ်မှာတော့ နယ်စပ်ရေးရာဝန်ကြီးဌာန လက်အောက် ရောက်သွားပါတယ်။

အဲဒီတက္ကသိုလ်ကနေ B.Edပညာရေးဘွဲ့ ရခဲ့ပြီးတဲ့နောက် လူဦးရေ ၆ဝဝဝ လောက်ပဲရှိတဲ့ ကယားပြည်နယ် မယ်စဲ့ မြို့နယ်မှာ လက်ထောက်မြို့နယ်ပညာရေးမှူးအဖြစ်ခန့်အပ်ခံခဲ့ရပါတယ်။

ဝန်ထမ်းဘဝမျာ သူဟာ စည်းကမ်းလိုက်နာပြီး နာမည်ပျက်မရှိဘဲ နိုင်ငံတော်အေးချမ်း သာယာရေးတံဆိပ်နဲ့ ငြိမ်ဝပ်ပိပြားရေးနှင့်တရားဥပဒေစိုးမိုရေးတံဆိပ်ဆိုတဲ့ ဆုနှစ်ဆုလည်းရခဲ့ပါသေးတယ်။

NLD ပါတီရဲ့ သုတေသနနှင့်မဟာဗျူဟာ လေ့လာရေး ဗဟိုကော်မတီ အတွင်းရေးမှူး ဦးမျိုးရန်နောင်သိမ်းဟာ ရွေးကောက်ပွဲမတိုင်ခင် မယ်စဲ့ကိုရောက်ချိန်မှာ ငယ်ရွယ်ပြီးအလားအလာရှိတဲ့ ဦးအယ်လ် ဖောင်းရှိုကို အမတ်လောင်းအဖြစ်တင်မြှောက်ဖို့ ဆုံးဖြတ်ခဲ့ တယ်လို့ အမည်မဖော်လိုတဲ့ NLD ပါတီဝင်အချို့ကပြောပါတယ်။

၂ဝ၁၅ ခုနှစ်ရွေးကောက်ပွဲမှာ ပြည်နယ်လွှတ်တော် မယ်စဲ့မဲဆန္ဒနယ် အမှတ်(၂) မှာ ထောက်ခံမဲ ၇၂၅ မဲနဲ့ ပြိုင်ဘက်ခုနစ်ယောက်ကို အလဲထိုးပြီးဦးအယ်လ်ဖောင်းရှို အမတ်ဖြစ်လာခဲ့ပေမယ့် ဝန်ကြီးချုပ်အဖြစ်ရေပန်းစားတာ သူမဟုတ်ပါဘူး။ အဲဒီတုန်းက ရေပန်းစားတာကတော့ လွိုင်ကော်မြို့ ပြည်နယ်ဆေးရုံ လက်ထောက်ဆရာဝန်ဟောင်း အသက် ၄၉ နှစ်အရွယ် ဒေါက်တာအောင်ကျော်ဌေးပါ။

တစ်ချိန်တည်းမှာ ရွေးကောက်ပွဲပြီးတော့ ရက်ပိုင်းအတွင်း ပြည်နယ်ထဲကလူငယ်တွေနဲ့ လက်နက်ကိုင်အချို့က လူထုအစည်းအဝေးတစ်ခုခေါ်ခဲ့ပြီး ဝန်ကြီးချုပ်ဖြစ်လာမယ့်သူဟာ ဒေသခံဌာနေတိုင်းရင်းသားဖြစ်သင့်တယ် ဆိုတဲ့ ဆုံးဖြတ်ချက်နဲ့ပဲ ရန်ကုန်ကော့မှူးဖွား ကရင်မျိုးနွယ်စုဝင် ဒေါက်တာ အောင်ကျော်ဌေးဟာ ဝန်ကြီးချုပ် နေရာနဲ့ လွဲခဲ့ရပါတယ်။။

ဒေသခံတွေဟာ အဲဒီဆုံးဖြတ်ချက်ကို ပြည်နယ် NLD ခေါင်းဆောင်တွေက တစ်ဆင့် ဒေါ်အောင်ဆန်းစုကြည်ဆီ အရောက်ပို့ခဲ့ပါတယ်။ နောက်ထပ်အလားအလာရှိတဲ့သူကိုထပ်မံရှာဖွေတဲ့အချိန်မှာ ဦးအယ်လ်ဖောင်းရှိုဟာ ပြည်နယ်ဝန်ကြီးချုပ် ဖြစ်လာပါတော့တယ်။

“ကျွန်တော်တို့အမြင်မှာတော့ NLD ဟာရွေးချယ်စရာမရှိဘူး။ ဝန်ကြီးချုပ်အဖြစ် သူ့ကိုမလွဲမသွေ ခန့်လိုက်ရ တယ်လို့ ယူဆတယ်” လို့ ကယားပြည်နယ်မှာ နိုင်ငံရေးလှုပ်ရှားသက်တမ်း ၁ဝ နှစ်ကျော်ရှိတဲ့ အသက် ၃ဝ အရွယ် ခွန်းအသန်းကပြောပါတယ်။

NLD ခေါင်းဆောင်တွေဟာ ကယားဝန်ကြီးချုပ်ကိုရွေးချယ်ချိန်မှာ အတော်လေး အကျပ်ရိုက်ခဲ့ဖွယ်ရှိတယ်လို့ ဒေသခံတွေက ထင်မြင်ကြပါတယ်။ ဒီအကျပ်အတည်းဟာ ရွေးကောက်ပွဲ အတွက် အမတ်လောင်း ရွေးကတည်းက စတင်လာတာလည်း ဖြစ်နိုင်ပါတယ်။ ဘာကြောင့်လဲဆိုတော့ NLD ဟာ ၁၉၉ဝ ရွေးကောက်ပွဲအလွန်ကာလတွေကတည်းက ကယားပြည်နယ်မှာ လွန်စွာကျပ်တည်းတဲ့ အခြေအနေနဲ့ ရုန်းကန်ရှင်သန်ခဲ့ရလို့ပါပဲ။

မဖွဲ့ခင်ကကွဲနှင့်သည် ကယား NLD

၁၉၉ဝ ရွေးကောက်ပွဲရလဒ်ကိုငြင်းဆန်ခဲ့တဲ့ တပ်မတော်အစိုးရဟာ သူ့ရဲ့မဟာပြိုင်ဘက် NLD ကိုချေမှုန်းတဲ့ စစ်ဆင်ရေးမှာ ကယားပြည်နယ်ဟာဦးစားပေးအဆင့်မှာရှိခဲ့ပါတယ်။ ၁၉၉ဝ ရွေးကောက်ပွဲမှာ ကယားပြည်နယ် မဲဆန္ဒနယ် ရှစ်နယ်အနက် ထက်ဝက်အနိုင်ရခဲ့ NLD ကို ပြည်နယ်တွင်းလှုပ်ရှားလို့မရအောင် NLD ကင်းစင် နယ်မြေလို့ ကြွေးကြော်ဖိအားပေးခဲ့ပါတယ်။

“မြို့နယ်စည်းရုံးရေးမှူးတွေစာရင်း ရသွားတော့ ဘယ်သူမှန်းတော့သူတို့ (စစ်ထောက်လှမ်းရေးတွေ) က မသိဘူးပေါ့။ ဒါပေမယ့်နာမည်တူတဲ့သူတွေအကုန်လုံးကိုလိုက်ဖမ်းတော့တာဘဲ” လို့ ကယား NLD ရဲ့၁၉၉ဝ ရွေးကောက်ပွဲအနိုင်ရ အမတ် ဦးတင်အောင်က ပြန်ပြောင်းပြောပါတယ်။

အပြင်းအထန် ထိုးနှက်မှုတွေကြောင့် ၁၉၉၄ မှာ ရှားတောမဲဆန္ဒနယ် အမတ်ဦးတင်အောင် NLD ကနေ နုတ်ထွက်ခဲ့သလို မိတ်ဆွေတွေလည်း အကျဉ်းကျခံခဲ့ရပြီးတဲ့နောက် ကယားပြည်နယ်မှာ NLD လှုပ်ရှားမှုဟာ မရှိသလောက် ဖြစ်သွားခဲ့ပါတယ်။

စစ်ဗိုလ်ချုပ်ကြီးဟောင်း သမ္မတဦးသိန်းစိန်နဲ့ ဒေါ်အောင်ဆန်းစုကြည်တို့ တွေ့ဆုံခဲ့ကြပြီး NLD ဟာ၂ဝဝ၈ ဖွဲ့စည်းပုံအခြေခံဥပဒေအရ ပေါ်လာတဲ့ရွေးကောက်ပွဲတွေကို ဝင်ဖို့ပါတီကို ၂ဝ၁၁ နှောင်းပိုင်းမှာ ပြန်ပြီးမှတ်ပုံတင်ခဲ့တဲ့နောက် ကယားNLD လည်း ပြန်အသက်ဝင်လာခဲ့ပါတယ်။

၁၉၉ဝ ရွေးကောက်ပွဲကတည်းက ပါခဲ့တဲ့ ကယား NLD ပါတီဝင်ဟောင်းတွေဟာအလျင်အမြန်ပဲ ပြည်နယ်ပါတီ ဖြစ်လာအောင် စုစည်းလိုက်ကြပါတယ်။ တစ်ချိန်တည်းမှာပဲ နောက်ထပ်လူသစ်အုပ်စုတစ်စုက ကယား NLD ဆိုပြီး ဆိုင်းဘုတ်အပြိုင်တင်တဲ့နောက်မှာ ဗဟိုရဲ့အသိအမှတ်ပြုမှုကို ရယူဖို့ကြိုးပမ်းတဲ့ လူဟောင်း နဲ့ လူသစ် NLD ပါတီနှစ်ဖွဲ့ဆိုပြီး စင်ပြိုင်သဘောမျိုး ဖြစ်လာခဲ့ပါတယ်။

လွိုင်ကော်က NLD နှစ်ဖွဲ့ကွဲတဲ့ပြဿနာကို ရန်ကုန်ကဝင်ရှင်းရပါတယ်။ ရှင်းအပြီးမှာ ၁၉၉ဝ ရွေးကောက်ပွဲ အနိုင်ရအမတ် ဦးတင်အောင် ပါဝင်တဲ့NLD ကိုအသိအမှတ်မပြုဘူးလို့ ရန်ကုန် ရုံးချုပ်ကကြေညာလိုက်ပါတယ်။

“NLD ရဲ့ဆုံးဖြတ်ချက်ကတော့ဗဟိုဆန်လွန်းအားကြီးတယ်။ ကျွန်တော်တို့တင်ပြတာတော့နားမထောင်ဘူး။ သူတို့လုပ်ချင်တာလုပ်တာ” လို့ ၈၃ နှစ်အရွယ်နိုင်ငံရေးသမားကြီး ဦးတင်အောင်ကဒေါ်အောင်ဆန်းစုကြည်ဓာတ်ပုံ ချိတ်ဆွဲထားတဲ့ သူဧည့်ခန်းထဲမှာ ထိုင်နေရင်းပြောပါတယ်။

NLD ဌာနချုပ်ရဲ့ အသိအမှတ်ပြုတာမခံရတဲ့ နိုင်ငံရေးသမားတွေဟာ နောက်တစ်နှစ်အကြာမှာ “ကယားလူမျိုးစု ဒီမိုကရေစီပါတီ” ကို တည်ထောင်ပြီး ၂ဝ၁၅ ရွေးကောက်ပွဲမှာ ဝင်ပြိုင်ပေမယ့် အနိုင်မရခဲ့ပါဘူး။ အဲဒီပါတီဟာ ပြီးခဲ့တဲ့နှစ်က ဒေသခံကယားပါတီတစ်ခုနဲ့ပေါင်းပြီး “ကယားပြည်နယ်ဒီမိုကရက်တစ်ပါတီ” အဖြစ် ဆက်လက် ရပ်တည်နေခဲ့ပါတယ်။

မဟာမိတ်များနှင့်အိုးစားကွဲခြင်း

ရန်ကုန်ရုံးချုပ် အသိအမှတ်ပြုခံရတဲ့အဖွဲ့မှာ ပါဝင်သူတွေဟာ ၂ဝ၁၅ ရွေးကောက်ပွဲဝင်ဖို့ပြင်ဆင်ပါတော့တယ်။

“ပြောင်းလဲချိန်တန်ပြီ” လို့ကြွေးကျော်ပြီး ၂ဝ၁၅ ရွေးကောက်ပွဲဝင်ချိန်မှာတော့ စစ်အုပ်ချုပ်ရေး ဆန့်ကျင်ကြဖူးတဲ့ ကယားပြည်နယ်ကနိုင်ငံရေး အင်အားစုတွေဟာ NLD ကိုမဟာမိတ်အဖြစ် သတ်မှတ်ပြီး ရွေးကောက်ပွဲအတွက် ဝိုင်းကူခဲ့ကြပါတယ်။

၂ဝ၁ဝ ရွေးကောက်ပွဲမှာ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ အသာရခဲ့တဲ့ ရလဒ်မျိုး ၂ဝ၁၅ မှာ အဆုံးသတ်နိုင်ဖို့ ဒေသခံနိုင်ငံရေးအင်အားစုတွေဟာ NLD အတွက်မဲဆွယ်ပေးခဲ့ ကြပါတယ်။

“အထူးသဖြင့်အရင်အစိုးရဝန်ကြီးချုပ်တွေဖြစ်တဲ့ဦးအောင်မင်းတို့၊ ဦးစိုးသိန်းတို့တွေဝင်ရောက်ယှဉ်ပြိုင် တဲ့နေရာတွေမှာ ကျွန်တော်တို့ဒေသခံတွေ နိုင်မှပဲ ဖြစ်မယ်ဆိုပြီးပစ်မှတ်ထားပြီး (NLD အနိုင်ရအောင်) ရွေးကောက်ပွဲ မဲဆွယ်မှုတွေလုပ်ကြတယ်” လို့ ကယန်းတိုင်းရင်းသား ခွန်းအသန်းကပြောပါတယ်။

၂ဝ၁၅ ရွေးကောက်ပွဲမှာ NLD ဟာ ပြည်နယ်တွင်း မဲဆန္ဒနယ်အားလုံးရဲ့ လေးပုံသုံးပုံ အနိုင်ရခဲ့ပါတယ်။ ဒါပေမယ့် ရွေးကောက်ပွဲအလွန်ကာလရောက်ချိန် NLD အစိုးရဟာ သူတို့မဟာမိတ်တွေနဲ့ ဆက်ဆံရေး မရှိသလောက်ဖြစ်သွားခဲ့တယ်လို့ ဝန်းရံခဲ့ကြတဲ့ ဒေသခံနိုင်ငံရေးအင်အားစုတွေက ပြောပါတယ်။

NLD အစိုးရဟာ အရပ်ဘက်အဖွဲ့အစည်းတွေရဲ့လှုပ်ရှားမှုကိုထိန်းချုပ်လာတာ၊ ယဉ်ကျေးမှုပွဲလမ်းသဘင်တွေ ကျင်းပရင် ထောက်ခံချက် အဆင့်ဆင့် တောင်းတာ စတာတွေ တစ်စတစ်စ တိုးပြီးလုပ်လာခဲ့တယ်လို့ နယ်ခံ နိုင်ငံရေးအင်အားစုတွေကပြောပါတယ်။

NLD ပါတီ အစိုးရရဲ့တုံ့ပြန်ပုံဟာ သူတို့ကိုအံအားသင့်စေခဲ့တယ်လို့ ခွန်းအသန်းက ပြောပါတယ်။

“ယုံကြည်မှုပြန်တည်ဆောက်ဖို့ကတော်တော်နဲ့မလွယ်တော့ဘူး။ လမ်းကတစ်လမ်းစီဖြစ်သွားတဲ့ပုံစံမျိုးပါ” လို့ သူကဆိုပါတယ်။

အဓိပ္ပာယ်နှစ်ခုနဲ့ဗိုလ်ချုပ်ကြေးရုပ်

ဝေဖန်မှုတွေ အပြင်းအထန်ခံနေရတဲ့ ပြည်နယ်ဝန်ကြီးချုပ် ရဲ့ ဗိုလ်ချုပ်ရုပ်တုကိုထောက်ခံတဲ့သူတွေ လည်း ရှိကြပါတယ်။ Myanmar Now က လွိုင်ကော် ဒေသခံ ၁၅ ယောက်လောက်ကို မေးမြန်းကြည့်တဲ့အခါ တစ်ဝက်လောက်က ဒီအစီအစဉ်ကိုသဘောတူကြပါတယ်။ အထူးသဖြင့် ဗမာမျိုးနွယ်စုတွေက ထောက်ခံကြပါတယ်။

သူတို့တွေဟာ ဝန်ကြီးချုပ်ဦးအယ်လ်ဖောင်းရှို လက်ထက်မှာ လမ်းပန်းဆက်သွယ်ရေး ပိုကောင်းလာတယ် လို့ ထောက်ခံပြောဆိုပြီး လွတ်လပ်ရေးဖခင်ဗိုလ်ချုပ်ကြေးရုပ်ဟာလည်း ပြည်နယ်အတွက်လိုအပ်တယ်လို့ ဆိုပါတယ်။

“သူတို့ (ကန့်ကွက်တဲ့သူတွေ) အတွက်လည်း ဘာမှနစ်နာသွားတာမဟုတ်ဘူး။ ဘယ်လိုပဲဖြစ်ဖြစ် ဒါက အထိမ်းအမှတ်တစ်ခုအနေနဲ့ ထားသင့်တယ်လို့မြင်တယ်” လို့ ၂၁ နှစ်အရွယ် ကယန်းအမျိုးသမီး တစ်ယောက်က Myanmar Now ကိုပြောပါတယ်။

ကြေးရုပ်စိုက်ထူရေးကန့်ကွက်သူတွေကတော့ ပြည်နယ်ဝန်ကြီးချုပ်နဲ့ NLD ဟာ လွတ်လပ်ရေးခေါင်းဆောင်ရဲ့ နာမည်ကို အသုံးပြုပြီး ရွေးကောက်ပွဲမှာ မဲရဖို့အတွက် ကြိုးစားနေကြတယ်လို့ စွပ်စွဲကြပါတယ်။

“သူတို့ကနိုင်ငံရေးမပါးနပ်ဘူး။ နိုင်ငံရေးကိုဖြတ်လမ်းနည်းနဲ့လုပ်တယ်။ ပုံရိပ်တည်ဆောက်တဲ့နေရာမှာလည်း ကိုယ့်အရည်အချင်းနဲ့မလုပ်ဘူး။ အားကိုးနဲ့ နိုင်ငံရေးပုံရိပ်တွေ ဩဇာတွေတည်ထောင်နိုင်ဖို့လုပ်တယ်” လို့ ၂ဝဝ၈ ဖွဲ့စည်းပုံအခြေခံဥပဒေကိုဆန့်ကျင်တာကြောင့် ၂ဝဝ၈ တုန်းက ထောင်ဒဏ် ၃၂ နှစ်ချမှတ်ခံခဲ့ရတဲ့ ဒီးဒီက ဝေဖန်ပါတယ်။

NLD အစိုးရဟာ မွန်ပြည်နယ်ချောင်းဆုံ တံတားကို ဒေသခံတွေ သဘောထားနဲ့ ဆန့်ကျင်ပြီး ဗိုလ်ချုပ်အောင်ဆန်း အမည်ပေးခဲ့တာ၊ နေပြည်တော်မှာ နိုင်ငံအတွင်း အကြီးဆုံး ဗိုလ်ချုပ်ကြေးရုပ် စိုက်ထူဖို့ စီစဉ်နေတာတွေလည်း ရှေ့မှာရှိခဲ့ပါတယ်။ ကယားမှာတော့ ပြည်နယ်ဝန်ကြီးချုပ် ဦးအယ်လ်ဖောင်းရှို ဟာ သူ့ကို NLD ထိပ်ပိုင်းခေါင်းဆောင်တွေ သဘောကျလာအောင် ဗိုလ်ချုပ်ရုပ်တုကို မဖြစ်မနေ ထုလုပ်ချင်တဲ့သဘောရှိတယ်လို့ ဝေဖန်ခံနေရပါတယ်။

“ဗိုလ်ချုပ်မြင်တာနဲ့ဒေါ်စုဆိုတာမြင်လာမယ်။ ဒေါ်စုမြင်တာနဲ့ NLD အစိုးရဆိုတာမြင်လာမယ်။ နိုင်ငံရေးကို အသုံးချတယ်”လို့ ပြည်ခိုင်ဖြိုးပါတီဝင်ယခင် ကယားပြည်နယ်အစိုးရ စည်ပင်၊ ပြန်ကြားရေးနဲ့ ယဉ်ကျေးမှုဝန်ကြီးအဖြစ် တာဝန်ယူခဲ့ဖူးတဲ့ ဦးအောင်နိုင်ဦးကပြောပါတယ်။

ဦးအယ်လ်ဖောင်းရှို ရွေးကောက်ပွဲနီးမှ NLD ပါတီဝင်ဖြစ်လာခဲ့ပေမယ့် ပါတီတွင်း အလျင်အမြန် ဩဇာကြီးလာပြီး ထိပ်ပိုင်းနေရာတက်လှမ်း နိုင်ခဲ့ပါ တယ်။ ပါတီဝင်သက်တမ်း သုံးနှစ်နီးပါးသာရှိသေးပေမယ့် ပြီးခဲ့တဲ့လက ကျင်းပတဲ့ NLD ရဲ့ ဒုတိယအကြိမ် နိုင်ငံလုံးဆိုင်ရာပါတီညီလာခံအပြီးမှာ သူဟာ ဗဟိုကော်မတီဝင် ဖြစ်လာပါပြီ။

သူ့အပေါ်စွပ်စွဲမှုတွေကို မေးမြန်းဖို့ Myanmar Now ကဝန်ကြီးချုပ်ရုံးကို ဇူလိုင်ဒုတိယပတ်အတွင်း စာပို့မေးမြန်းခဲ့ပေမယ့် နေပြည်တော်ရောက်နေတာကြောင့် အဆက်အသွယ်မရခဲ့ပါဘူး။ ဝန်ကြီးချုပ် ကိုယ်ရေးအရာရှိကိုဆက်သွယ်ရာမှာလည်း ဝန်ကြီးချုပ်အလုပ်များနေ တယ်လို့သာ ဖြေကြားပါတယ်။

ဗိုလ်ချုပ်ကြေးရုပ် စီမံကိန်းစကတည်းက သူတို့အစိုးရဟာ ထင်သာမြင်သာဖြစ်အောင် ချပြထားတယ်လို့ ဦးအယ်လ်ဖောင်းရှိုက ဇူလိုင်လအစောပိုင်းက RFA သတင်းဌာနကိုပြောခဲ့ပါတယ်။

“ဗိုလ်ချုပ်ကြေးရုပ်စတင်လုပ်ဆောင်တဲ့အချိန်မှာ တစ်ပြည်နယ်လုံးမှာရှိတဲ့ကျေးရွာရပ်ကွက် အုပ်စု အုပ်ချုပ်ရေးမှူးတွေ အားလုံး၊ ပြည်နယ်အတွင်းမှာရှိတဲ့ တိုင်းရင်းသားစာပေယဉ်ကျေးမှု ကော်မတီအဖွဲ့တွေအားလုံး ကိုဖိတ်ပြီးမှ သူတို့ရဲ့ ဆန္ဒကလိုလိုလားလား လုပ်ချင်တယ်ဆိုလို့သာ ကျွန်တော်က ဖော်ဆောင်ပေးတာ” လို့ ဝန်ကြီးချုပ်က RFA ကိုပြောပါတယ်။

ကန့်ကွက်တဲ့သူတွေဟာ လူနည်းစုသာဖြစ်ပြီး အများစုက ထောက်ခံတယ်၊ ဒါကြောင့် အစိုးရကအများဆန္ဒကို ဖော်ထုတ်ပေးဖို့ နောက်ဆုတ်မှာမဟုတ်ဘူးလို့လည်း သူကဆိုပါတယ်။

ဒီလိုအကျပ်အတည်း တွေ့လာရနိုင်တယ်ဆိုတာကို ပြည်နယ်NLD ကလည်း လွန်ခဲ့တဲ့ငါးလလောက် ကတည်းက ဝန်ကြီးချုပ်နဲ့ ပြည်နယ်အစိုးရကိုအကြံပေးခဲ့သေးတယ်လို့ ပါတီတာဝန်ရှိသူတွေကပြောပါတယ်။

“ဒီကိစ္စက လောလော လောလော မလုပ်သင့်ဘူး။ ပြည်သူ့သဘောထားခံယူပြီးတော့ လုပ်ရမယ်။ ဒါ့ကြောင့်ယာယီ ရပ်ဆိုင်းထားသင့်တယ်လို့ ဖေဖော်ဝါရီလောက်ကတည်းက ပါတီကဆုံးဖြတ်ထားတာ” လို့ ကယားပြည်နယ် NLD ဥက္ကဋ္ဌ ဦးသောင်းဌေးကပြောပါတယ်။

အစိုးရဘက်ကရှေ့ဆက်တိုးရင် ကြုံတွေ့လာမယ့် တင်းမာမှုတွေအတွက် စိုးရိမ်နေကြတဲ့သူတွေ ရှိပါတယ်။

ပြည်နယ်အစိုးရဝန်ကြီးဟောင်းတွေကတော့ ဒေသတွင်း ဌာနေတိုင်းရင်းသားတွေဟာ သူတို့ရဲ့သီးခြားတည်ရှိခဲ့တဲ့ သမိုင်းကြောင်းကို လေးစားသူတွေဖြစ်တဲ့တွက် သူတို့အစိုးရသက်တမ်းအတွင်းကလည်း ဘာသာရေး၊ လူမျိုးရေး ပြဿနာတွေ မဖြစ်အောင် အတော်လေး သတိထားကိုင်တွယ်ခဲ့ရတယ်လို့ ပြောပါတယ်။

“ဒီမှာ (ကယားပြည်နယ်မှာ)လူမျိုးရေးရယ်၊ မျိုးနွယ်စုရေးရယ်၊ ဘာသာရေးရယ်လုံးဝထိလို့မရဘူး” လို့ ပြည်ခိုင်ဖြိုးပါတီဝင်၊ သစ်တောနှင့်သတ္တုဝန်ကြီးဟောင်း ဦးရဲဝင်း ကပြောပါတယ်။

“အစိုးရတော်တော်လေးကိုင်တွယ်လို့ခက်မယ်။ သူကမီးကစမွှေးထားပြီးသားဖြစ်နေတယ်” လို့ ဂေဘားမျိုးနွယ်စု နွယ်ဖွား ဝန်ကြီးဟောင်းက ပြောပါတယ်။

မကျေလည်မှုတွေဟာ အရပ်ဘက်အင်အားစုတွေတင်မဟုတ်ဘဲ ဒေသတွင်းလက်နက်ကိုင် အင်အားစုတွေ ဆီကိုပါရောက်သွားတဲ့အတွက် ဒေသတွင်းမှာ စိုးရိမ်မှုတွေမြင့်တက်နေပါတယ်။

၂ဝ၁၂ အထိ မြန်မာ့တပ်မတော်နဲ့တိုက်ပွဲတွေဖြစ်ခဲ့တဲ့ ကရင်နီအမျိုးသားတိုးတက်ရေးပါတီ (KNPP) က ပြီးခဲ့တဲ့သတင်းပတ်အတွင်း ဗိုလ်ချုပ်ကြေးရုပ်စိုက်ထူတာနဲ့ ကန့်ကွက်တဲ့ဒေသခံတွေကို ဖမ်းဆီးတရားစွဲတဲ့အပေါ် စိုးရိမ်မကင်းဖြစ်တယ်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဆီကိုစာပို့ပါတယ်။

အပြန်အလှန်အားဖြင့် ဖမ်းဆီးခံရတဲ့ တက်ကြွလှုပ်ရှားသူတွေကို ထောက်ခံတဲ့ ပြည်နယ်အခြေစိုက် နိုင်ငံရေးအင်အားစုတွေက နေပြည်တော်မှာ လုပ်မယ့်၂၁ ရာစုပင်လုံညီလာခံကို သပိတ်မှောက်ဖို့ KNPP ကိုတောင်းဆိုခဲ့ပါတယ်။

တစ်ချိန်ကပိတ်ပင်တားဆီးမှုတွေကိုကျော်ဖြတ်ရင်း ဗိုလ်ချုပ်အောင်ဆန်းနဲ့အာဇာနည်တွေကိုအလေးပြုခဲ့ကြတဲ့ ကယားပြည်နယ်ထဲက လူငယ်တချို့ဟာ ဒီနှစ်မှာတော့အာဇာနည်နေ့ အခမ်းအနားကိုတက်ရောက် အလေးပြုဖို့ မသေချာတော့ပါဘူး။

အကြောင်းက သူတို့ထဲတချို့ဟာ ရွေးကောက်ပွဲအကြိုကာလက မဟာမိတ်NLD အစိုးရနဲ့ သဘောထား မတိုက်ဆိုင်ဘဲ ဖမ်းဆီးထိန်းသိမ်းခံနေရလို့ဖြစ်ပါတယ်။

“ဒီလိုအခြေအနေဖြစ်လာမယ် မထင်လို့ ဝိုင်းကူခဲ့တာ။ အခုတော့ ကိုယ့်သမိုင်းကိုယ် ရေးကြရတော့မှာပေါ့” လို့ ရွေးကောက်ပွဲအကြိုကာလမှာ NLD အနိုင်ရရေးအတွက်အကူအညီပေးခဲ့တဲ့ နိုင်ငံရေးအကျဉ်းသားဟောင်း ဒီးဒီက သူအဖမ်းမခံရင် တစ်ရက်အလို ဇူလိုင် ၁ဝ ရက်မှာ Myanmar Now ကိုပြောပါတယ်။ ။