မင်းဘူး(စကု)မြို့နယ်၌ ပါတီကိုယ်စားပြု သုံးဦး ၊ တစ်သီးပုဂ္ဂလနှစ်ဦး ကြားဖြတ်ရွေးကောက်ပွဲတွင် ၀င်ရောက်ယှဉ်ပြိုင်မည်

.

 

မကွေး၊ ဇူလိုင် ၁၂ ။               ။ မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ် တိုင်းဒေသကြီးလွှတ်တော်မဲဆန္ဒနယ် အမှတ်(၂) အတွင်း ကျင်းပပြုလုပ်မည့် ကြားဖြတ်ရွေးကောက်ပွဲတွင် ဝင်ရောက်ယှဉ်ပြိုင်ရန် ဇူလိုင်လ ၁၁ ရက်နေ့အထိ အမည်စာရင်း လာရောက်တင်သွင်းသူ ၅ ဦးရှိကြောင်း မင်းဘူးခရိုင်ရွေးကောက်ပွဲကော်မရှင်အဖွဲ့ခွဲရုံးမှ သိရသည်။

“ ပါတီကိုယ်စားပြုပြိုင်မှာက ၃ ဦး ၊ တစ်သီးပုဂ္ဂလ၀င်ပြိုင်မှာက ၂ ဦး ၊ ဥပဒေ၊နည်းဥပဒေနဲ့အညီ အမည်စာရင်း တင်သွင်းတာ စုစုပေါင်း ၅ ဦး ရှိပါတယ်။ အဲဒီ့ ၅ ဦးက ပြည်ထောင်စုရွေးကောက်ပွဲကော်မရှင်ရဲ့ ညွှန်ကြားချက် အရ ဒီနေ့ညနေ ၄ နာရီခွဲမှာ နောက်ဆုံးထားပြီး အမည်စာရင်းတွေ တင်သွင်းကြပါတယ်။ အမည်စာရင်း တင်သွင်းတာက ခွင့်ပြုတဲ့ကာလ ကုန်သွားပါပြီ။ ကြားဖြတ်ရွေးကောက်ပွဲမှာ ကိုယ်စားလှယ်လောင်း ၅ ယောက် ၀င်ပြိုင်တယ်ဆိုတော့ အရေအတွက်အားဖြင့် ၀င်ရောက်ယှဉ်ပြိုင်တာ မနည်းပါဘူး ” ဟု မင်းဘူးခရိုင်၊ ရွေးကောက်ပွဲကော်မရှင်အဖွဲ့ခွဲ ၊ အတွင်းရေးမှူး ဦးတင်ခိုင်ဇော် က ပြောသည်။

ဇူလိုင်လ ၉ ရက်နေ့၌ အမျိုးသားဒီမိုကရေစီအဖွဲ့ချုပ်ပါတီ ကိုယ်စားပြုအဖြစ် ဦးကျော်ငွေ၊ ပြည်ထောင်စုကြံခိုင် ရေးနှင့်ဖွံ့ဖြိုးရေးပါတီ ကိုယ်စားပြုအဖြစ် ဦးစိန်ရွှေမင်း(ခေါ်)မောင်ပိုက် ၊ဇူလိုင်လ ၁၀ ရက်နေ့၌ တစ်သီးပုဂ္ဂလ ၀င်ရောက်ယှဉ်ပြိုင်မည့် ဦးသိန်းထက်ဝေ နှင့် အမျိုးသားညီညွတ်သော ဒီမိုကရက်တစ်ပါတီ(NUD) ကိုယ်စားပြု အဖြစ် ဦးအောင်ဌေး၊ ဇူလိုင်လ ၁၁ ရက်နေ့၌ တစ်သီးပုဂ္ဂလအဖြစ် ရွေးချယ်ခံမည့် ဦးသောင်းစိုး တို့ အမည်စာရင်း တင်သွင်းခဲ့ခြင်း ဖြစ်သည်။

“ ဇူလိုင်လ ၁၂ရက်နဲ့၁၃ရက်နေ့ ရုံးချိန်အတွင်းမှာ အမည်စာရင်းတင်သွင်းထားတဲ့ပုဂ္ဂိုလ်များက သူတို့ရဲ့ တင်သွင်းလွှာကို ရုပ်သိမ်းလိုက ရုပ်သိမ်းနိုင်တယ်။ ရုပ်သိမ်းမှုမရှိဘူးဆိုရင်တော့ ဇူလိုင်လ ၁၆ရက်နေ့ တနလာင်္နေ့နံနက် ၁၀နာရီမှာ မင်းဘူးခရိုင်၊ ရွေးကောက်ပွဲကော်မရှင်အဖွဲ့ခွဲရုံးမှာ သတ်မှတ်ထားတဲ့ လွှတ်တော်ကိုယ်စားလှယ်လောင်း ရှိရမယ့်အရည်အချင်းများနဲ့ ပြည့်စုံမှုရှိ၊ မရှိကို စီစစ်မှာပေါ့။ စီစစ်ပြီးရင်တော့ သတ်မှတ်တဲ့ အရည်အချင်းတွေနဲ့ပြည့်စုံတယ်ဆိုရင်တော့ ၀င်ရောက်ယှဉ်ပြိုင်ဖို့အတွက် လွှတ်တော်ကိုယ်စားလှယ်လောင်းအဖြစ် အသိအမှတ်ပြုတဲ့ ပုံစံ(၁၀)နဲ့ သြဂုတ်လ ၆ရက်နေ့မှာ ထုတ်ပြန်ပေးသွားမှာပါ ဟု မင်းဘူးခရိုင်ရွေးကောက်ပွဲကော်မရှင်အဖွဲ့ခွဲ ၊ အတွင်းရေးမှူး ဦးတင်ခိုင်ဇော်က ဆိုသည်။

လွှတ်တော်ကိုယ်စားလှယ်လစ်လပ်နေသည့် မင်းဘူး(စကု)မြို့နယ် ၊ တိုင်းဒေသကြီးလွှတ်တော် မဲဆန္ဒနယ် အမှတ်(၂)၌ ကြားဖြတ်ရွေးကောက်ပွဲကို ၂၀၁၈ ခုနှစ်၊ နိုဝင်ဘာလ ၄ ရက်နေ့တွင် ကျင်းပပြုလုပ်မည်ဖြစ်ကြောင်း သိရသည်။