ကလေးသူငယ်များကို မိဘရင်းသဖွယ်ပြုစုစောင့်ရှောက်နိုင်ရန် လမ်းညွှန်မိတ်ဆက်

ကလေးသူငယ်များကို မိဘရင်းသဖွယ်ပြုစုစောင့်ရှောက်နိုင်ရန် လမ်းညွှန်မိတ်ဆက်

ရန်ကုန် ၊ဇူလိုင် ၆ ရက်။                         ။ လူမှုဝန်ထမ်း ၊ကယ်ဆယ်ရေးနှင့်ပြန်လည်နေရာချထား ရေးဝန်ကြီးဌာန၊ UNICEF ၊ TDH-L တို့ပူးပေါင်းပြီး မြန်မာနိုင်ငံရှိကလေးသူငယ်များကို မိဘအရင်းသဖွယ် ပြုစုစောင့်ရှောက်ခြင်း လုပ်ငန်းလမ်းညွှန် မိတ်ဆက်ပွဲကို ရန်ကုန်မြို့ Summit parkview hotel တွင်ဇူလိုင် ၆ရက်နေ့က ပြုလုပ်ခဲ့သည်။

မြန်မာနိုင်ငံရှိ ကလေးသူငယ်များကို ကောင်းမွန်သောအနာဂတ် ဖြစ်လာစေရေးအတွက် ကူညီဆောင်ရွက် ပေးရန်နှင့် ရပ်ရွာ အတွင်းရှိလူများကိုလည်း အကူညီပေးရန်၊ မိရင်းဖရင်း ပြုစုစောင့်ရှောက်မှု မရရှိသော ကလေးငယ်များကို ခေါင်းပုံဖြတ် အမြတ်ထုတ်ခြင်း၊လူကုန်ကူးခံရခြင်း၊ အဓမ္မစေခိုင်းမှုများနှင့်အခြားသော အကြမ်းဖက်မှုများမှ ကာကွယ်စောင့်ရှောက်နိုင်အောင် လုပ်ဆောင်နေခြင်းဖြစ်ကြောင်း သိရသည်။

 “မိဘအရင်းသဖွယ်ပြုစုစောင့်ရှောက်ခြင်းဆိုတာ မိဘအရင်းတော့မဟုတ်ဘူး။ ကလေးမွေးစားသလိုလဲ မဟုတ်ဘူး။ဒါပေမဲ့ ကလေးကိုတတ်နိုင်တဲ့ ကာလအတိုင်းအတာ နဲ့ပြုစုစောင့်ရှောက်တဲ့နည်းပါ။ ဝင်ငွေနည်းပါးမှလဲမဟုတ်ဘူး။ ဝင်ငွေများမှလဲ မဟုတ်ဘူး။ကလေးသူငယ်တွေကို မေတ္တာတရားနဲ့တကယ် ကူညီကာကွယ်စောင့်ရှောက်ချင်တဲ့ သူတွေကို ‌ကာလတိုနဲ့ပဲဖြစ်ဖြစ် ကာလရှည်နဲ့ပဲဖြစ်ဖြစ် စောင့်ရှောက်ခွင့် ပေးမှာဖြစ်ပါတယ်”လို့ လူမှုဝန်ထမ်း၊ပြန်လည်နေရာချထားရေးဌာနမှ ဒုညွှန်ကြားရေးမှူးချုပ် ဒေါ်ရူပါမြ ကပြောသည်။

လက်ရှိတွင် အဆိုပါစောင့်ရှောက်ခြင်းများကို ရန်ကုန်တိုင်းဒေသကြီးအတွင်းရှိ ဒလ မြို့နယ်နှင့် မန္တလေးမြို့ မဟာအောင်မြေမြို့နယ်များအတွက် ရှေ့ပြေးဆောင်ရွက်မှုများ ပြုလုပ်နေပြီး ကလေးငယ်များကို ကူညီစောင့်ရှောက်နေသော ပရဟိတ အဖွဲ့အစည်းများနှင့်လည်း လက်တွဲဆောင်ရွက်သွားရန် စီစဉ်နေကြောင်း သိရသည်။

မြန်မာနိုင်ငံတွင် အစိုးရအသိအမှတ်ပြု မှတ်ပုံတင်ထားသော ကလေးသူငယ်များစောင့်ရှောက်ရေးဌာန ဂေဟာပေါင်း ၂၂၇ရှိပြီး ကလေးသူငယ်စုစုပေါင်း ၁၇၃၂၂ဦးကို လက်ခံစောင့်ရှောက်ထားကြောင်း ထို့အပြင် အစိုးရမှ ဖွင့်လှစ်ဆောင်ရွက်ထားသော သင်တန်းကျောင်းဌာန ၂၂ခု ရှိကြောင်း သိရသည်။

အဆိုပါ အခန်းနားကို လူမှုဝန်ထမ်းပြန်လည်နေရာချထားရေးဌာမှတာဝန်ရှိသူများနှင့် UNICEF မှတာဝန်ရှိသူများ တက်ရောက်ပါဝင်ဟောပြောခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly