မန္တလေး၊ ဇူလိုင် ၄ ။ ။ စိုက်ပျိးရေ ရရှိရန် ခက်ခဲနေသည့် တောင်သူများအနေဖြင့် ဆည်မြောင်းနှင့်ရေအသုံးချ စီမံခန့်ခွဲရေး ဦးစီးဌာနသို့ ဖုန်းဆက်အကြောင်းကြားနိုင်သည်ဟု ဆည်မြောင်းနှင့်ရေအသုံးချ စီမံခန့်ခွဲရေး ဦးစီးဌာနမှ လက်ထောက်ညွှန်ကြားရေးမှူး ဦးသန်းဦးကပြောသည်။
"စပါးပျိုးထောင်ရေ စပေးချိန်မှာ တောင်သူတွေနေနဲ့ ရေအခက်အခဲရှိရင် တူးမြောင်းထိပ်တွေမှာ ဌာန တာဝန်ခံအမည်နဲ့ဖုန်းနံပါတ်တွေရှိတယ်။ရေရရှိရေးအတွက် လိုတဲ့အကူအညီ တောင်းနိုင်ပါတယ်။"ဟု ဦးသန်းဦးကပြောသည်။
၂၀၁၈-၂၀၁၉ ခုနှစ် မိုးစပါးအတွက် ပျိုးထောင်ရေကိုလည်း မန္တလေးခရိုင်၊ ပြင်ဦးလွင်ခရိုင်နှင့် ကျောက်ဆည်ခရိုင်အတွင်းရှိ ဆည်၊ကန်၊တမံများမှ စတင်ပေးဝေနေလျှက်ရှိပြီး၊မြင်းခြံခရိုင်၊မိတ္ထီလာခရိုင်၊ ရမည်းသင်းခရိုင်နှင့့်ညောင်ဦးခရိုင််များတွင်မိုးစပါးပျိုးထောင် ရန်အတွက်လည်း လာမည့် ၁၅ ရက်နေ့တွင် စတင်ပေးဝေသွားမည်ဖြစ်ကြောင်းသိရသည်။
မန္တလေးတိုင်းဒေသကြီးအတွင်း မိုးစပါးစိုက်ပျိုးရန် စိုက်ဧက ၃၃၀၀၀၀ ကျော်အား ရေလှောင်တမံ၊ရေလွှဲဆည်များမှ စိုက်ပျိုးရေ လုံလောက်အောင် ပေးဝေသွားမည်ဖြစ်ကြောင်းလည်း သိရသည်။
ဆည်မြောင်းနှင့်ရေအသုံးချ စီမံခန့်ခွဲရေး ဦးစီးဌာနအနေဖြင့် မိုးစပါးအပြင် အခြားသီးနှံများ စိုက်ပျိုးနိုင်ရန်အတွက်လည်း ရေရရှိအောင် ပေဝေးသွားမည် ဖြစ်ကြောင်းသိရသည်။