ဒေါ်လာဈေးတက်မှုကို အစိုးရမှ အချိန်မီ ထိန်းချုပ်ရန်လို

.

ဓာတ်ပုံ - AFP

 

ဇူလိုင် ၃။                             ။ဒေါ်လာဈေးတက်မှုကြောင့် စက်သုံးဆီဈေးတက်မှုအပါအ၀င် ကုန်ဈေးနှုန်းကြီးမြင့်မှုများ ကြုံလာ နိုင်ပြီး အချိန်တိုအတွင်း အစိုးရအနေဖြင့် ထိန်းချုပ်ရန် လိုအပ်ကြောင်း စီးပွားရေးလုပ်ငန်းရှင်တစ်ချို့ထံမှ သိရသည်။

“အဓိကတော့ သွင်းကုန်တွေ ဈေးတက်မယ်။ ကုန်ဈေးနှုန်းတွေ မြင့်လာမယ်။ ဒါကြောင့် တည်ငြိမ်အောင် အချိန်တိုအတွင်းမှာ ပြန်ပြီး ထိန်းချုပ်ဖို့လိုတယ်။ ပြည်တွင်းမှာ သွင်းကုန်ပမာဏ များပြီး ပို့ကုန်က နည်းတော့ အဲဒါလည်းပါတယ်။ ကမ္ဘာ့ဈေးကွက်ရဲ့ သက်ရောက်မှုက အဓိကကျတယ်” ဟု ကုန်သည်စက်မှုအသင်းချုပ်မှ ဒုတိယဥက္ကဋ္ဌ ဦးရဲမင်းအောင်က ပြောသည်။

ဇူလိုင် ၃ ရက်ပေါက်ဈေးများအရ အမေရိကန်တစ်ဒေါ်လာလျှင် ၁၃၉၉ ကျပ်ရှိနေပြီး ဇွန်လ ၂၉ ရက်က တစ်ဒေါ်လာကို ၁၄၀၅ ကျပ်အထိ ပေါက်ဈေးရှိနေသည်ဟု မြန်မာနိုင်ငံတော် ဗဟိုဘဏ်၏ ထုတ်ပြန်ချက်များအရ သိရသည်။

ဒေါ်လာဈေးတက်ခြင်း၏ အကျိုးသက်ရောက်မှု၌ ရေနံဈေးမတက်သော်လည်း ပြည်တွင်း စက်သုံးဆီဈေး ကြီးမြင့်လာကြောင်း သိရသည်။

“ဒေါ်လာဈေးတက်တဲ့အတွက် သက်ရောက်မှုတွေကရှိတယ်။ လတ်တလောပဲ ဒီဇယ်ဓာတ်ဆီဈေး၊ ဒါက ရေနံဈေးတက်တာနဲ့ မဆိုင်ဘူး။ ဒေါ်လာဈေးတက်တာအတွက် တက်သွားတယ်။ တကယ်လို့ ရေနံဈေး တက်ရင်တော့ ထပ်တက်မှာပေါ့။ သယ်ယူပို့ဆောင်ရေးစရိတ်တက်တာနဲ့ ကျန်တဲ့ဈေး အကုန်လိုက်တက်မှာ။ အလုပ်လုပ်ရတာ နည်းနည်းလေး ခက်တာပေါ့။ ဈေးမငြိမ်တဲ့အခါကျတော့ ” ဟု မြန်မာနိုင်ငံဆောက်လုပ်ရေး လုပ်ငန်းရှင်များအသင်း၊ တွဲဖက်အတွင်းရေးမှူး ဦးကျော်ကျော်စိုး က ပြောသည်။

ယခုကဲ့သို့ ဒေါ်လာဈေး မြင့်တက်ခြင်းသည် စီးပွားရေးလုပ်ငန်းများအတွက် ရေရှည်မကောင်းမွန်နိုင်ဘဲ ကုန်ဈေး နှုန်းများ မြင့်တက်လာနိုင်ကြောင်း သိရသည်။

“နိုင်ငံခြား ဒေါ်လာငွေဝင်ရင်တော့ ပြဿနာမရှိဘူး။ ကုန်ဈေးနှုန်းတွေ ထိုးတက်လာရင်တော့ ကျွန် တော်တို့ အတွက် စိန်ခေါ်မှုရှိတယ်။ ရေတိုအတွက်ကတော့ကောင်းတယ်။ ရေရှည်အတွက်ကတော့ ကျွန်တော်တို့အတွက် မကောင်းဘူး။ ဒါတွေကတော့ တိုင်းရေး၊ ပြည်ရေးနဲ့လည်းဆိုင်တယ်။ ခရီးသွား လုပ်ငန်းတစ်ခုတည်းမဟုတ်ဘူး။ ကျန်တဲ့ Sector အကုန်လုံး အခြေယိုင်သွားနိုင်တယ်” ဟု မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဋ္ဌ ဦးသက်လွင်တိုး ကပြောသည်။

ဒေါ်လာဈေးမြင့်တက်မှုများကြောင့် ပို့ကုန်၊ သွင်းကုန်လုပ်ငန်းများတွင် အများဆုံး အကျိုးသက်ရောက် မှုများ ရှိနိုင်ပြီး ငွေဈေးနှုန်းများ အတက်ကြမ်း၊ အဆင်းကြမ်းဖြစ်နေလျှင် ပြည်တွင်းစီးပွားရေးကို ထိခိုက်မှုများရှိနိုင်ကြောင်း သိရသည်။