ရောမ၊ ဇွန် ၂၁ ။ ။ အီးယူအနေဖြင့် ရွှေ့ပြောင်းဝင်ရောက်သူများ ပြဿနာတွင် ခွဲဝေဝန်ထမ်းရန်နှင့် ပထမဆုံး ၀င်ရောက်ခံရသည့် နိုင်ငံကပဲ ယင်းဝန်ထုပ်ကို ဖြေရှင်းရေးဆိုခြင်းအား မညှိနှိုင်းရန် အီတလီသမ္မတက ကမ္ဘာ့ဒုက္ခသည်များနေ့တွင် ထုတ်ပြန်ချက်တစ်ရပ်၌ ပြောဆိုသည်။
ကမ္ဘာတစ်လွှား ဒုက္ခသည်များ အခြေအနေကို သတိပြုမိကြရန် ရည်ရွယ်ကာ နှစ်စဉ် ဇွန် ၂၀ ရက်အား ကမ္ဘာ့ဒုက္ခသည်များနေ့အဖြစ် ၂၀၀၁ ခုနှစ်မှစတင် သတ်မှတ်ကျင်းပလာခဲ့ခြင်း ဖြစ်သည်။
“အီတလီနိုင်ငံက နိုင်ငံတကာဥပဒေအရ စံနှုန်းတွေကို လိုက်နာနေကြောင်း၊ မွေးရပ်မြေမှ ပြေးလာရသူများကို စောင့်ရှောက်ကူညီနေကာ ၎င်းတို့နှင့် ၎င်းတို့ သားသမီးများ အနာဂတ် မျှော်လင့်ချက်ကို ဖော်ဆောင်ပေးနေကြောင်း”သမ္မတ ဆာဂျီယိုမတ်တာရီလာက ထုတ်ပြန်ချက်တွင် ရေးသားထားသည်။
နိုင်ငံတကာ အသိုင်းအဝန်းအနေဖြင့် ကမ္ဘာတစ်ခုလုံး ပါ၀င်နေသည့် ဒုက္ခသည်ရွှေ့ပြောင်းမှု ဖြစ်စဉ်အား စီမံခန့်ခွဲရေးတွင် မျှဝေကျခံကြရန်လည်း ၎င်းက တိုက်တွန်းထားသည်။
၎င်းပြင် အီးယူအနေဖြင့် ရွှေ့ပြောင်းဒုက္ခသည်များ အရေး လက်ရှိ စီမံခန့်ခွဲမှုတွင် နိုင်ငံရေး၊ ရာသီဥတု၊ စီးပွားရေးနှင့် လူမှုအသိုင်းအဝိုင်းနောက်ခံကိစ္စရပ်များကို ဖယ်ရှားနိုင်မည့် ဖော်ဆောင်အားထုတ်မှုများ ရှိရမည်ဖြစ်ကြောင်းလည်း ၎င်းက သတိပေးသည်။
“ကြီးမားသည့် ယခု ဒုက္ခသည်ဖြစ်စဉ်ကို ခန့်ခွဲနိုင်ရေးဆိုသည်မှာ ကျွန်တော်တို့အနေဖြင့် ပဋိပက္ခတွေကို တားဆီးနိုင်ရေး၊ ထို ဒုက္ခသည် ဖြစ်စဉ် အဆုံးသတ်ရေးတို့ကို ဖော်ဆောင်နိုင်ဖို့ ဖြစ်ကြောင်း၊ နေရပ်စွန့်ပြေးနေကြရသော နိုင်ငံများ၏ အငတ်ဘေး၊ အာဟာရချို့တဲ့သည့် ဘေး၊ စစ်ဘေးနှင့် ပဋိပက္ခဘေးအန္တရာယ်များကို ၀ုိင်းဝန်းကူညီဖြေရှင်းပေးရမည် ဖြစ်ကြောင်း။”လည်း ယင်းထုတ်ပြန်ချက်တွင် ရေးသားတိုက်တွန်းထားသည်။
