ဝန်ကြီးပြောစကားကြောင့် လှိုင်သာယာစက်မှုဇုန်ရှိ ကျူးကျော်နေထိုင်သူများက ဖယ်ရှားခံရမည်ကို စိုးရိမ်နေ

ဝန်ကြီးပြောစကားကြောင့် လှိုင်သာယာစက်မှုဇုန်ရှိ ကျူးကျော်နေထိုင်သူများက ဖယ်ရှားခံရမည်ကို စိုးရိမ်နေ

ဇွန် ၂၀။          ။ လှိုင်သာယာစက်မှုဇုန််တွင် လက်ရှိ ကျူးကျော်များပြားခြင်းသည် အဓိကပြဿနာ ဖြစ်နေကြောင်း ရန်ကုန်တိုင်းဒေသကြီးလွတ်တော်၌ လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေး ဝန်ကြီး ဒေါ်နီလာကျော်က ပြောကြားခဲ့ခြင်းကြောင့် လှိုင်သာယာမြို့နယ်တွင် နေထိုင်နေကြသည့် ကျူးကျော်များမှာ နေအိမ်များ ဖယ်ရှားခံရမည်ကို စိုးရိမ်နေကြကြောင်း သတင်းရရှိသည်။

လှိုင်သာမြို့နယ်ရှိ ကျူးကျော်များ နေထိုင်ရာနေရာများတွင် ညစ်ပတ်ခြင်း၊ ရေမြောင်းပိတ်ဆို့ခြင်းများမရှိကြောင်း ဇွန်လ ၂၀ ရက် Orchid ဟိုတယ်တွင် ပြုလုပ်သည့် မြို့ပြဆင်းရဲသားများအရေး (ကျူးကျော်) နှင့် ပတ်သက်သော သတင်းစာရှင်းလင်းပွဲတွင် လှိုင်သာယာမြို့နယ် ရွှေသံလွင်ဝန်း မေခလမ်းတွင် နေထိုင်သူ ဦးမြသန်းက ပြောသည်။

“လွတ်တော်ကိုယ်စားလှယ်တွေ ပြောကြားသွားတဲ့သတင်းကိုရလို့ ဒီပွဲလေးကို ကျင်းပရခြင်းဖြစ်ပါ တယ်။ ကျွန်တော်တို့ ကျူးမှာ ညစ်ပတ်တာတို့ ရေမြောင်းပိတ်ဆို့တာတို့ ဒါတွေမဟုတ်ပါဘူးဆိုတဲ့ အကြောင်းကိုလည်း ပြောကြားချင်တယ်။ လူထုနဲ့ပူးပေါင်းပြီး ညှိနှိုင်းတိုင်ပင်ဆွေးနွေးဖို့ အကြမ်းဖက်ပြီး ဆောင်ရွက်ဖို့လည်း ပြောကြားချင်တယ်။ လူမှုအဖွဲ့အစည်းတွေနဲ့ အားလုံးပူးပေါင်းပြီး ဆောင်ရွက်မယ် ဆိုရင် အောင်မြင်နိုင်တယ်” ဟု ၎င်းက ပြောသည်။

ရန်ကုန်တိုင်းဒေသကြီးအတွင်း စက်မှုဇုန်များအဆင့်မြှင့်တင်ရေး ကြီးကြပ်မှုကော်မတီအနေဖြင့် လှိုင် သာယာစက်မှုဇုန်များအပါအဝင် ရန်ကုန်တိုင်းဒေသကြီးအတွင်းရှိ စက်မှုဇုန်များ ဖွံ့ဖြိုးတိုးတက်အောင် မည်ကဲ့သို့သောလုပ်ငန်းစဉ်များ ချမှတ်အကောင်အထည် ဖော်နေခြင်း ရှိ/မရှိ လှိုင်သာယာမြို့နယ်၊ မဲ ဆန္ဒနယ်အမှတ်(၁) လွှတ်တော်ကိုယ်စားလှယ် ဦးဝင်းမောင်(ခ)ဦးဦးဝင်းမောင်က မေ ၃၁ရက် ဒုတိယ အကြိမ် ရန် ကုန်တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေး (၃၇)ရက်မြောက်နေ့တွင် မေး မြန်းခဲ့ခြင်း ဖြစ်သည်။

“ရန်ကုန်တိုင်းဒေသကြီးအစိုးရအဖွဲ့အနေဖြင့် ရန်ကုန်တိုင်းဒေသကြီးအတွင်းရှိ စက်မှုဇုန်(၂၉)ဇုန်ကို အဆင့်မြှင့်တင်နိုင်ရန်အတွက် စက်မှုဇုန်များအဆင့်မြှင့်တင်ရေး ကြီးကြပ်မှုကော်မတီကို ၂၀၁၇ခုနှစ် ဧပြီလ (၂၄)ရက်တွင် ဖွဲ့စည်းခဲ့ပါကြောင်း၊ စက်မှုဇုန်များအဆင့်မြှင့်တင်ရေးအတွက် ကနဦးဆန်းစစ်မှု များအနေဖြင့် လှိုင်သာယာစက်မှုဇုန် တောင်ဒဂုံစက်မှုဇုန်နှင့် ရွှေပြည်သာစက်မှုဇုန်များအား ပထမဦး စွာလေ့လာခဲ့ပါကြောင်း၊ လှိုင်သာယာစက်မှုဇုန်များသည် လက်ရှိတွင် လည်ပတ်နေသော စက်ရုံအရေ အတွက်နှင့်အလုပ်သမားဦးရေမှာ အခြားဇုန်များနှင့်နှိုင်းယှဉ်လျင် များပြားပြီး၊ လမ်းများအခြေအနေဆိုး ဆိုးဝါးဝါးပျက်စီးနေခြင်း မရှိသော်လည်း ကျူးကျော်များပြားခြင်းသည် အဓိကပြဿနာ ဖြစ်နေခြင်းနှင့် ထိုသို့ကျူးကျော်တဲများ များပြားစွာရှိနေခြင်းကြောင့်အမှိုက်နှင့် ရေမြောင်းပိတ်ဆို့ခြင်းကို ဆောင်ရွက် ရန် အခက်အခဲများရှိနေကြောင်း” လျှပ်စစ်၊စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာ ကျော်က ဖြေကြားခဲ့သည်။

ထို့ကြောင့် လှိုင်သာယာမြို့နယ်တွင် နေထိုင်သော ကျူးကျော်များမှာ မည်သည့်အချိန်တွင် ဖယ်ရှား ရှင်းလင်းခံမည်ကို စိုးရိမ်စိတ်ဖြင့် နေလိုင်နေရကြောင်း လှိုင်သာယာမြို့နယ်မှ ဒေါ်ဝင်းမြကပြောသည်။

“နေတာကတော့ ငါးနှစ်လောက်ရှိပြီ။ အခုက နေသာနေရတယ် သူတို့လာပြီးဘယ်တော့ ဖျက်မလဲ စိုး ရိမ်စိတ်ကတစ်မျိုး၊ ရေမီးကျတော့လည်း ဒုက္ခရောက်တယ်။ အခု ညစ်ပတ်တယ်ဆိုပြီး သူတို့က ပြော နေတယ်ဆိုပေမယ့် အမှိုက်ပစ်တဲ့အခါကျ ဒီနေရာတင်ပြန်ပစ်လို့မရဘူး။ နေရာပေးမယ် စည်ပင်ကား လေးပေးမယ်ဆိုရင် နေလို့တော်တော်အဆင်ဆင်ပြေမှာပါ” ဟု ၎င်းကပြောသည်။

နေထိုင်စရာနေရာများ လုပ်ဆောင်ပေးမည်ဆိုလျှင် မြို့နှင့် ဝေးသည့်နေရာဖြစ်ပါက အလုပ်လုပ်ကိုင် ရန် အခက်အခဲရှိပြီး ယခုနေထိုင်လုပ်ကိုင်သည့် နေရာနှင့် နီးစပ်လျှင် နေထိုင်ချင်ကြောင်းသိရသည်။ အဆင်မြင့် အိမ်ယာများဖော်ဆောင်လျှင် လက်လုပ်လက်စားလုပ်ကိုင်နေကြသည့်အတွက် ဆိုက်ကား၊ တွန်းလှဲစသည်များကြောင့် နေထိုင်ရန် အခက်အခဲရှိကြောင်း လှိုင်သာယာမြို့နယ်မှ ကျူးကျော်အချို့ ကဆိုသည်။

၂၀၁၃ခုနှစ်တွင် ကုမ္ပဏီတစ်ချို့မှ လူမိုက်များ ငှားရမ်းပြီး ကျူးကျော် နေအိမ်များကို ဖျက်ဆီးရန်လုပ် ဆောင်မှုများရှိခဲ့သော်လည်း တားဆီးမှုများကြောင့် ဖျက်ဆီးမှုများမရှိဘဲ ပြေလည်မှုရရှိခဲ့ကြောင်း ဦးမြသန်းက ပြောသည်။

“အစိုးရအနေနဲ့ ကျူးကျော်တွေ ဘာကြောင့် ဖြစ်လာရသလဲဆိုတာ ခြေခြေမြစ်မြစ် နားလည်ဖို့လိုမယ် လို့ ယူဆပါတယ်။ ဘာကြောင့်လဲဆိုရင် အထူးသဖြင့် အခြားနိုင်ငံတွေရဲ့ အတွေ့အကြံုအရ ကျူးကျော် တွေကို အခြားမြို့ပြင်မှာ နေရာပေးလိုက်တယ်။ အဲဒီလူတွေက အခြားမြို့ပြင်ကနေရာတွေ ရောင်းစားပြီးတော့ ပြန်လာတယ်။ ဘာလို့လဲဆို ရင် အလုပ်အခွင့်အလမ်းနဲ့ သူတို့နေထိုင်ရတဲ့နေရာ အရမ်းဝေးတယ်။ နောက်ဆုံးမနေနိုင်ဘူး။ နောက်ပြီး အထပ်မြင့်တိုက်တွေနဲ့လည်း သူတို့အသက်မွေးဝမ်းကြောင်း လုပ်ငန်းတွေက မကိုက်ညီဘူး” ဟု ဗေဒါ လူမှုဖွံ့ဖြိုးရေးအဖွဲ့ အစီစဉ်ညှိနှိုင်းရေးမှူး စောကဲဇာ ကပြောသည်။

ကျူးကျော်များရှင်းလင်းရေး၊ စက်မှုဇုန်များ အဆင့်မြှင့်တင်ရေးတွင် အရေးကြီးပြီးတစ်ပြိုင်နက်တည်း ဆောင်ရွက်ရမည့် လုပ်ငန်းများဖြစ်သည့်အတွက် အချိန်အတိအကျ မပြောနိုင်သော်လည်း တစ်ချိန်တည်း၊ တစ်ပြိုင်တည်း အရှိန်အဟုန်ဖြင့် လုပ်ဆောင်နေကြောင်း ၀န်ကြီးဒေါ်နီလာကျော်က ဒုတိယ အကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေး (၃၇)ရက်မြောက်နေ့တွင် ဖြေကြားခဲ့သည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly