ကိုကြီးနု (သို့မဟုတ်) ဒီမိုကရေစီနည်းကျကျ ရွေးကောက်တင်မြှောက်ခံခဲ့ရတဲ့ မြန်မာ့ပထမဆုံးဝန်ကြီးချုပ်

ကိုကြီးနု (သို့မဟုတ်) ဒီမိုကရေစီနည်းကျကျ ရွေးကောက်တင်မြှောက်ခံခဲ့ရတဲ့ မြန်မာ့ပထမဆုံးဝန်ကြီးချုပ်

ရန်ကုန် ၊ ဖေဖော်ဝါရီ ၂၅ ။             ။ “U Nu, 87, Burma’s first and only democratically elected prime minister”  ဆိုပြီး မြန်မာခေါင်းဆောင် တစ်ဦး ကွယ်လွန်ချိန်မှာ နျူးယော့ခ်တိုင်းမ်မဂ္ဂဇင်းက နာရေးသတင်းကို ရေးသားဖော်ပြပြီး ဂုဏ်ပြုခဲ့ပါတယ်။ သူကတော့ မြန်မာနိုင်ငံရဲ့ ဒီမိုကရေစီနည်းကျကျ ပထမဆုံး ရွေးကောက်တင်မြှောက်နိုင်ခဲ့တဲ့ ဝန်ကြီးချုပ် ကတော့ ဦးနု ဖြစ်ပါတယ်။

မေလနှောင်းပိုင်းရဲ့ နေခပ်ကျဲကျဲ အပူချိန်ဟာ ရန်ကုန်မြို့ ဆရာစံလမ်းမ ပြည်ထောင်စုလမ်းသွယ်ထဲမှာ တည်ရှိနေတဲ့ ဦးနုရဲ့ နေအိမ်ပေါ် တိုက်ရိုက်ကျရောက်နေပါတယ်။ ဒီလိုနေ့အပူချိန်ထဲမှာပဲ   နိုင်ငံရေးလောက အသိုင်းအဝိုင်းကလူတွေ ၊ ဦးနုမိသားစုတွေနဲ့ ခင်မင်ရင်းနှီးတဲ့သူတွေဟာ ဦးနုရဲ့ အိမ်ထဲမှာလည်း လှုပ်လှုပ်ရှားရှား ဖြစ်နေပါတယ်။

မြန်မာနိုင်ငံရဲ့ပထမဆုံးဝန်ကြီးချုပ်ဦးနုရဲ့ အမှတ်တရပြခန်းကို သူနောက်ဆုံးခေါင်းချသွားခဲ့တဲ့ အိမ်လေးထဲမှာ ဖွင့်လှစ်ခဲ့တာပါ။ ဒီနေ့(မေလ ၂၅ ရက်နေ့)ဟာဆိုရင် ဦးနု သက်ရှိထင်ရှားရှိနေခဲ့ရင် အသက် ၁၁၁ နှစ် ပြည့်မွေးနေ့လည်း ဖြစ်ပါတယ်။

အိမ်ရဲ့နံရံတွေမှာ ဦးနုရဲ့ အမှတ်တရ ဓါတ်ပုံတွေအများအပြား ချိတ်ဆွဲထားပါတယ်။ သူ့ကို နိုင်ငံတကာက ခေါင်းဆောင်တွေ လက်ဆောင်ပေးခဲ့တဲ့ အထိမ်းအမှတ် ပစ္စည်းတွေ ၊ သူတစ်ကိုယ်ရည် သုံးဆောင်ခဲ့တဲ့ အသုံးအဆောင်တွေကို အိမ်ထဲမှာ ခင်းကျင်းပြသထားတာကို တွေ့ရမှာပါ။

ဒါအပြင် ဗုဒ္ဓဘာသာကို အထူးယုံကြည်သက်ဝင်တဲ့သူလို့ နာမည်ကြီးခဲ့တဲ့ ဦးနုရဲ့ ကျယ်ဝန်းလှတဲ့ ဘုရားရှိခိုး ဆောင်ကို တွေ့မြင်ခဲ့ရပါတယ်။ ဦးနုဟာ ဒီဘုရားရှိခိုးဆောင်မှာပဲ အချိန်တော်တော်ကြာ နေလေ့ရှိခဲ့တယ်လို့ သူ့ရဲ့ သမီးဖြစ်တဲ့ ဒေါ်သန်းသန်းနုက ဆိုပါတယ်။

“အဖေ့ဆီကနေ အမွေကောင်းအနေနဲ့ ဘာသာရေးကိုင်းရှိုင်းမှုကို ရခဲ့တယ်။

အဖေ့ခြေရာမမှီပေမယ့် အတတ်နိုင် ဆုံး ကြိုးစားနေပါတယ်” လို့ ဦးနုရဲ့ သမီးငယ် ၊ ဒီမိုကရက်တစ်ပါတီရဲ့ အတွင်းရေးမှူး ဒေါ်သန်းသန်းနုက ပြောပါတယ်။

မြန်မာနိုင်ငံရဲ့ ပထမဆုံးဝန်ကြီးချုပ် ဖြစ်ခဲ့တဲ့ ဦးနုဟာ သူ့ရဲ့ အိပ်ခန်းထဲမှာလည်း တစ်ယောက်အိပ်ကုတင် တစ်လုံးနဲ့ စာရေးစားပွဲတစ်ခုသာ ထားရှိပါတယ်။ ဒီစားပွဲမှာထိုင်ပြီး စာအုပ်၊ ပြဇာတ်ပေါင်းများစွာ ရေးသားခဲ့ တယ်လို့ ဦးနုရဲ့မိသားစုဝင်တွေက ဆိုပါတယ်။

စာရေးဆရာတစ်ဦးလည်း ဖြစ်ခဲ့ပြီး ဦးနုရဲ့ အထ္တုပတ္တိ လို့ ပြောလို့ရနိုင်တဲ့ တာတေစနေသားလို စာအုပ်တွေ ၊ လူအချင်းချင်း ပေါင်းသင်းဆက်ဆံ မှုမှာ အရေးပါ အသုံးချနိုင်တဲ့ မိတ္တဗလ ဋီကာကျမ်းလို စာအုပ်တွေဟာ ဦးနုရဲ့ ထင်ရှားတဲ့ စာအုပ်တွေ ဖြစ်ပါတယ်။ပြဇာတ်ရေးရာမှာလည်း ထင်ရှားတဲ့ ဦးနုဟာ ကိုလိုနီခေတ်ဦးက နဂါးနီစာအုပ်အသင်းကို ဦးဆောင်တည်ထောင်ခဲ့သူတစ်ဦး ဖြစ်ခဲ့ပါတယ်။

ဒါအပြင် မြင်ဖူးသမျှ နိုင်ငံရေးသမားများထဲတွင် ဦးနုလောက် ထူးခြားသူမျိုး မတွေ့ခဲ့ဖူးသလို့ ဝန်ကြီးချုပ် တစ်ဦးနဲ့ မတူအောင် အနေအထိုင်ရိုးရှင်းတယ်လို့လည်း ၈၈ ဒီမိုကရေစီလှုပ်ရှားမှုမှာ ဦးနုနဲ့ အတူလှုပ်ရှားခဲ့တဲ့ ဦးကိုကိုကြီး က ဆိုပါတယ်။

“တစ်ချိန်တုန်းက ဝန်ကြီးချုပ်လို့တောင် ဟုတ်မှဟုတ်ရဲ့လားလို့တောင် သံသယဖြစ်တယ်။ နေလိုက်ရင် အမြဲတမ်း စွပ်ကျယ် နဲ့ အဲ့ဒီအပေါ်မှာ တိုက်ပုံအကျီင်္လေးနဲ့ ပြီးတော့ အောက်က ပုဆိုးအကွက်ကျားလေးနဲ့ သူ့ကိုကြည့်လိုက်ရင် ဘယ်တော့မှ မာန်မာန ဒေါသအရိပ်အယောင်မျိုး လုံးဝမတွေ့ရဘူး” လို့ ဦးကိုကိုကြီးက ဆိုပါတယ်။

ကိုလိုနီခေတ်ဦးကာလမှာ ရန်ကုန်တက္ကသိုလ်ကျောင်းသားသမဂ္ဂဥက္ကဋ္ဌ တာဝန်ယူခဲ့တဲ့ဦးနုဟာ ဆိုရင် ဗိုလ်ချုပ်အောင်ဆန်း၊ ဗိုလ်လကျ်ာ၊ဦးကျော်ငြိမ်း စတဲ့ သူတွေနဲ့ လက်တွဲပြီး လွတ်လပ်ရေးရယူခဲ့သူတစ်ဦးလည်း ဖြစ်ပါတယ်။ ဗိုလ်ချုပ်အောင်ဆန်း  မရှိတော့တဲ့နောက် လွတ်လပ်ပြီးစ မြန်မာနိုင်ငံမှာ ဖဆပလပါတီနဲ့အတူ ဝန်ကြီးချုပ် တာဝန်ယူခဲ့သူ ဖြစ်ပါတယ်။

သူတာဝန်ယူစဉ်ကာလအတွင်း ၀န်ကြီးချုပ်အဖြစ် စွမ်းစွမ်းတမံ ဆောင်ရွက်ခဲ့ပြီး အပြောင်းလဲများတဲ့ မြန်မာ့နိုင်ငံရေးသမိုင်းလောကမှာ မပါမဖြစ် ပြောရသူတစ်ဦးလည်း ဖြစ်ပါတယ်။ ၀န်ကြီးချုပ်အဖြစ် ၁၉၄၈ မှ ၁၉၅၆ ခုနှစ်အထိ ပထမအကြိမ်၊ ၁၉၅၇-၁၉၅၈ အထိ ဒုတိယအကြိမ်၊ ၁၉၆၀ -၆၂ အထိ တတိယအကြိမ် ဆောင်ရွက်ခဲ့သူ ဖြစ်ပါတယ်။

၁၉၈၈ ခုနှစ် ဒီမိုကရေစီလှုပ်ရှားမှုမှာလည်း ဦးနုရဲ့ အခန်းကဏ္ဍဟာ မှေးမှိန်ပျောက်ကွယ်ခဲ့ခြင်းမရှိပါဘူး။ စင်ပြိုင်အစိုးရ တည်ထောင်တယ်ဆိုတဲ့ ကြေညာချက်ဟာ နိုင်ငံရေးအရ အပြင်းထန်ဆုံး ထိုးနှက်ချက်တစ်ခု ဖြစ်ခဲ့ပါတယ်။ ဒီလို စင်ပြိုင်အစိုးရ တည်ထောင်တဲ့ ဦးနုရဲ့ လုပ်ဆောင်ချက်အပေါ်မှာ ထောက်ခံသူတွေ ကန့်ကွက်သူတွေရှိနေခဲ့ပါတယ်။

ဒီလိုမျိုး မြန်မာနိုင်ငံရေးဇာတ်ခုံပေါ်မှာ အနိမ့်အမြင့်မျိုးစုံနဲ့ ကပြခဲ့တဲ့ ဦးနုတစ်ယောက်ဟာ အသက် ၈၇ ခုနှစ် အရွယ် ၁၉၉၅ ခုနှစ် ဖေဖော်ဝါရီလ ၁၄ ရက်နေ့မှာ ကွယ်လွန်အနိစ္စရောက်ခဲ့ပါတယ်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly