ရန်ကုန်တိုင်းဒေသကြီး၊ ကျောက်တန်းမြို့နယ်တွင် အဲကွန်းပါ YBS ၉၅ ယာဉ်လိုင်းကို မေလမကုန်ခင် လာမည့် ရက်သတ္တပတ်ထဲတွင် စတင်ပြေးဆွဲတော့မည် ဟု ရွှေတောင်ပိုင်းအများပိုင်ယာဉ်လိုင်းကုမ္ပဏီ၏ မန်းနေဂျင်းဒါရိုက်တာ ဦးတင်ထွန်းက မဇ္ဈိမသို့ ပြောသည်။
" YBS ယာဉ်လိုင်းနံပါတ် ၉၅ နဲ့ အစီးရေ ၃၀ စီးစတင်ပြေးဆွဲမယ်။ လမကုန်ခင် ရှေ့တစ်ပတ်ထဲပြေးဆွဲနိုင်အောင် လုပ်ဆောင်နေတယ်။ ယာဉ်စစ်တွေက စစ်ပြီး စတင်ဆွဲလို့ရပြီဆိုတာနဲ့ စဆွဲသွားမယ်။ ယာဉ်အစီးရေ ၃၀ စီးနဲ့စပြီး အစီးရေ ၅၀ အထိ တိုးချဲ့ပြေးဆွဲသွားမယ်" ဟု မန်းနေဂျင်းဒါရိုက်တာ ဦးတင်ထွန်းက မေလ ၁၇ ရက်တွင် ပြောသည်။
ရွှေတောင်ပိုင်း အများပ်ိုင်ယာဉ်လိုင်းကုမ္ပဏီမှ YBS ၉၅ ယာဉ်လိုင်းကို ဟွန်ဒိုင်း အဲယားကွန်းစီးတီးဘတ်စ် ခရီးသည်တင်ယာဉ်အမျိုးအစား ကား အစီး ၃၀ ဖြင့် ကျောက်တန်း၊ သာကေတ၊ တာမွေ၊ အလုပ်သမားဆေးရုံအထိ ပုံသေ ယာဉ်စီးခ ၂၀၀ ကျပ် သတ်မှတ်ပြေးဆွဲသွားမည်ဖြစ်သည်။
ကျောက်တန်းမှ ရန်ကုန်မြို့တွင်းသို့ မီနီဘတ်စ်ခရီးသည်တင်ယာဉ်များဖြင့် ပြေးဆွဲနေပြီး ကျောက်တန်းနှင့် ရန်ကုန်အကြား အကွာအဝေး ၂၂ မိုင်ခန့် ရှိပြီး ၂ နာရီကြာခန့် ကားစီးရသည့်ခရီးစဉ် ဖြစ်သည်။
ရွှေတောင်ပိုင်း အများပိုင်ယာဉ်လိုင်းကုမ္ပဏီလက်အောက်တွင် ယာဉ်လိုင်းပေါင်း ၁၀လိုင်းပြေးဆွဲနေပြီး YBS ၃၂၊ YBS ၃၃ တို့မှာ ကျောက်တန်းသို့ ပြေးဆွဲနေပြီး YBS ၃၄ မှာ ခရမ်းသုံးခွသို့ ပြေးဆွဲနေသည်။
အဆိုပါယာဉ်လိုင်းသည် ကျောက်တန်းသို့ပြေးဆွဲနေသည့် ကားလိုင်းများအနက် ပထမဆုံး အဲကွန်းပါ ဘတ်စ်ကားလိုင်းသစ်ဖြစ်သည်။