မေ ၂ ။ ။ ဧရာဝတီမြစ်အတွင်းပြေးဆွဲလျှက်ရှိသည့် နိုင်ငံပိုင်ရေယာဉ် ၁၀စီးကို အကြီးစားပြင်ဆင်မှုများ ပြုလုပ်သွားမည်ဟု ပြည်တွင်းရေကြောင်းပို့ဆောင်ရေး၊ရတနာပုံသင်္ဘောကျင်းမှ ဒုတိယ အင်ဂျင်နီယာမှူးကြီး ဦးဇော်မိုးမြင့်ကပြောသည်။
ထိုသို့ အကြီးစားပြင်ဆင်မှုများကို ဇွန်၊ဇူလိုင်၊သြဂုတ်၊စက်တင်ဘာလတို့တွင် ပြုလုပ်သွားမည် ဖြစ်သည်။
"လျာထားတာ ၁၀စီးပေါ့။ကျွန်တော်တို့ ပြည်တွင်းရေကြောင်းပိုင်ယာဉ်တွေပါပဲ။"ဟု ဦးဇော်မိုးမြင့်ကပြောသည်။
၂၀၁၇/၂၀၁၈ခုနှစ်ကလည်း ၁၀ စီးပြင်ဆင်ခဲ့ပြီး ယခု ၂၀၁၈/၂၀၁၉ခုနှစ်တွင်လည်း ၁၀ စီးပြင်ဆင်ရန် လုပ်ဆောင်ခြင်းဖြစ်သည်။
ပြည်တွင်းရေကြောင်းတွင် ရေယာဉ်အသစ်တည်ဆောက်မှု တစ်နှစ်ထက်တစ်နှစ် လျှော့နည်းလာနေပြီး ပြင်ဆင်မှုများ သာ လုပ်ဆောင်နေရကြောင်းသိရသည်။
"ပုဂ္ဂလိကဘက်ကလည်း အသစ် တည်ဆောက်တာတွေ မလုပ်ကြတော့ဘူး။လုပ်ငန်းက သိပ်မရှိဘူး။"ဟု ပြောသည်။
ရတနာပုံသင်္ဘောကျင်းအနေဖြင့် ဝင်ငွေရရှိစေရန်အတွက် ပုဂ္ဂလိကသင်္ဘောများပြင်ဆင်မှုအတွက် နေရာ ငှားရမ်းခြင်း၊ ပစ္စည်းများငှားရမ်းခြင်းများ ပြုလုပ်နေရကြောင်း သိရသည်။ ပြည်တွင်းရေကြောင်းကဏ္ဍ ပြန်လည်ဖွံ့ဖြိုးလာစေရန် ရေလမ်းကြောင်းကောင်းမွန်ရန် အဓိကလိုအပ်ကြောင်း သိရသည်။
