နာမည်ကျော်မျက်လှည့်ပြကွက်၏ လျှို့ဝှက်ချက်ကိုဖွင့်ချပြရန် တရားရုံး၌ ဖိအားပေးခံခဲ့ရသည့် ဒေးဗစ်ကော်ပါဖီး

နာမည်ကျော်မျက်လှည့်ပြကွက်၏ လျှို့ဝှက်ချက်ကိုဖွင့်ချပြရန် တရားရုံး၌ ဖိအားပေးခံခဲ့ရသည့် ဒေးဗစ်ကော်ပါဖီး

ကမ္ဘာကျော် အမေရိကန်မျက်လှည့်ပညာရှင် ဒေးဗစ်ကော်ပါဖီးသည် သူ၏နာမည်ကျော်မျက်လှည့်ပြကွက်တစ်ခု ကို ဖျော်ဖြေစဉ်တွင် ပရိသတ်တစ်ဦးအား ဒဏ်ရာရရှိအောင်လုပ်မိခဲ့သည်ဟု စွပ်စွဲခံထားရကာ တရားရင်ဆိုင်နေ ရပြီး တရားရုံးက သူ့အား ထိုမျက်လှည့်ပြကွက်၏ လျှို့ဝှက်ချက်ကိုထုတ်ဖော်ပြသရန် ဖိအားပေးစေခိုင်းခဲ့သည်။

လာ့စ်ဗီးဂတ်စ်၌ Lucky#13 ဟုအမည်ရသော နာမည်ကျော်မျက်လှည့်ပြကွက်ကို ဖျော်ဖြေခဲ့စဉ်တွင် ဒေးဗစ် သည် အသက် ၅၈ နှစ်အရွယ်ရှိ ဂါဗင်ကော့စ်ဟုအမည်ရသော ဗြိတိန်ပရိသတ်တစ်ဦးအား ပြကွက်အတွင်း၌ ပါ၀င်အသုံးတော်ခံပေးရန် တောင်းဆိုခဲ့ပြီး ထိုပရိသတ်ဒဏ်ရာရရှိခဲ့သည့်အတွက် တရားစွဲခံနေရခြင်းဖြစ်သည်။

မစ္စတာကော့စ်သည် ယင်းပြကွက်အတွင်း၌ ပါ၀င်ခဲ့စဉ်တွင် ပုခုံးအဆစ်လွဲခဲ့ပြီး ပြင်းပြင်းထန်ထန်နာကျင်ခဲ့ကာ ဦးနှောက်ဒဏ်ရာလည်းရရှိခဲ့သည်ဟု စွပ်စွဲပြောဆိုပြီး ဒေးဗစ်အား ပေါ့ဆမှုဖြင့် တရားစွဲဆိုနေခြင်းဖြစ်သည်။

ဒေးဗစ်ကော်ပါဖီးသည် ယင်းနာမည်ကျော်ပြကွက်ကို အနှောင့်အယှက်တစ်စုံတစ်ရာမရှိပဲ ပြသလာခဲ့သည်မှာ အကြိမ်ပေါင်း ထောင်နှင့်ချီနေပြီဟု သိရသည်။

ဒေးဗစ်၏ Lucky#13 ပြကွက်မှာ ပရိသတ်များထဲမှ လူ ၁၃ ဦးကို ကျပန်းရွေးချယ်ကာ စင်ပေါ်သို့ ခေါ်ပြီးနောက် ၄င်းတို့အား စင်ပေါ်မှပျောက်သွားအောင် ဖျောက်ပြခြင်းဖြစ်သည်။ ထို့နောက်တွင် ထိုလူ ၁၃ဦးအား စင်၏ အနောက်ဘက်ခြမ်း၌ ပြန်ပေါ်လာအောင်လုပ်ပြီး ပရိသတ်များအား ဖျော်ဖြေခြင်းဖြစ်သည်။

ကမ္ဘာ့ဝင်ငွေအကောင်းဆုံး မျက်လှည့်ပညာရှင် ဒေးဗစ်ကော်ပါဖီး၏ရှေ့နေဖြစ်သူက ယင်းပြကွက်၏လျှို့ဝှက် ချက်ကို ထုတ်ဖော်ပြသခြင်းသည် ဒေးဗစ်ကို ၀င်ငွေပိုင်းအရ နစ်နာစေနိုင်သည်ဟု ခုခံလျှောက်လဲခဲ့သော်လည်း လာ့စ်ဗီးဂတ်စ်တရားရုံးကမူ ဖိအားပေးခိုင်းစေခဲ့ခြင်းဖြစ်သည်။

မစ္စတာကော်ပါဖီး၏ ထုတ်လုပ်သူဖြစ်သောခရစ္စကန်နာသည် ထိုပြကွက်၏လျှို့ဝှက်ချက်ကို အင်္ဂါနေ့က တရားရုံး ၌ ထုတ်ဖော်ပြောကြားခဲ့သည်။

ယင်းပြကွက်အတွင်း ပရိသတ်ထဲမှ လူ ၁၃ဦးကို စင်ပေါ်သို့ခေါ်လိုက်ပြီးနောက်တွင် ၄င်းတို့အပေါ်သို့ လိုက်ကာ စကြီးဖြင့်အုပ်လိုက်ပြီးနောက် မျက်လှည့်အဖွဲ့သားများက ၄င်းတို့အား လမ်းကြောင်းတစ်ခုမှတဆင့် စင်အနောက် သို့ လျင်မြန်စွာခေါ်ဆောင်သွားခြင်းဖြစ်သည်။ ထို့နောက်တွင် ၄င်းတို့သည် မျက်လှည့်ဇာတ်ရုံ၏ အနောက်မှ တဆင့် ပြန်ပေါ်လာခြင်းဖြစ်သည်ဟု သိရသည်။

တရားလိုဖြစ်သူ မစ္စတာကော့စ်က သူ့အားထိုသို့ခေါ်ဆောင်သွားစဉ်တွင် ပြုတ်ကျသွားခဲ့ခြင်းဖြစ်ကြောင်းနှင့် ဒဏ်ရာများကြောင့် ဆေးရုံသို့သွားရောက်ကုသမှုခံယူခဲ့ရကာ ဒေါ်လာ ၄ သိန်းခန့် ကုန်ကျခဲ့ရသည်ဟု တရားရုံး ၌ ထွက်ဆိုခဲ့သည်။

မစ္စတာကော့စ်၏ရှေ့နေဖြစ်သူက မျက်လှည့်ဆရာများသည် ပရိသတ်များထဲမှ ပါ၀င်အသုံးတော်ခံသူများကို ဘေးကင်းအောင်လုပ်ဆောင်ပေးရမည့် တာဝန်ရှိသည်ဟု တရားရုံး၌ လျှောက်လဲခဲ့သည်။

သို့သော်လည်း ဒေးဗစ်ကော်ပါဖီးကမူ ပရိသတ်ဒဏ်ရာရရှိခဲ့ခြင်းသည် သူ၏အမှားကြောင့်မဟုတ်ကြောင်းနှင့် “ပြကွက်က ဘယ်လိုရလာဒ် ထွက်ပေါ်လာလဲဆိုတဲ့အပေါ်မှာပဲ မူတည်ပါတယ်။ တကယ်လို့ တစ်ခုခုလွဲချော်ခဲ့ မယ်ဆိုရင် ကျနော့်ရဲ့အမှားဖြစ်ပါတယ်” ဟု ခုခံချေပခဲ့သည်။

မစ္စတာကော့စ်ကမူ ၄င်းအနေဖြင့် စင်ပေါ်မှနေ၍ လမ်းကြောင်းတစ်ခုအတိုင်း လျှောက်သွားခဲ့စဉ်တွင် အဆောက်အဦးထဲမှ အပျက်အစီးအစများကို လမ်းကြောင်းပေါ်၌ တက်နင်းမိခဲ့သည်ဟု ထွက်ဆိုခဲ့သည်။ သို့သော်လည်း ဒေးဗစ်ကမူ ထိုလမ်းကို သူ့ဘက်မှ အရင်စစ်ဆေးခဲ့ပြီး လမ်းကြောင်းပေါ်၌ မည်သည့်အရာမှ မရှိကြောင်း ပြန်လည်ချေပခဲ့သည်။

ဒေးဗစ်အပြင် မျက်လှည့်ပွဲကျင်းပရာနေရာဖြစ်သော Las Vegas Resort MGM မှ တာဝန်ရှိသူများကလည်း ခုခံ ချေပခဲ့ကြသည်။ “မစ္စတာကော့စ်ဟာ ကျနော်တို့ကြောင့် ချော်လဲခဲ့တာမဟုတ်ပါဘူး။ သူ့ဘာသာ ခလုတ်တိုက် မိတာပါ” ဟု ချေပခဲ့သည်။

ယင်းတရားစစ်ဆေးမှုကို ဆက်လက်ပြုလုပ်မည်ဖြစ်ပြီး ဒေးဗစ်ကော်ပါဖီးအနေဖြင့် လာမည့်အင်္ဂါနေ့တွင် တရားရုံး၌ သက်သေထွက်ဆိုရမည်ဖြစ်ကြောင်း သိရသည်။

Ref: BBC

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly