သမ္မတအသစ်အပေါ် ယုံကြည်မှုအပြည့်ရှိဟု ကျူးဘားပြည်သူများ ကြွေးကြော်

သမ္မတအသစ်အပေါ် ယုံကြည်မှုအပြည့်ရှိဟု ကျူးဘားပြည်သူများ ကြွေးကြော်

 

ဟာဗားနား၊ ကျူးဘား၊ ဧပြီ ၂၀ ။                   ။ ကျူးဘားသမ္မတအသစ် မီဂေးလ်ဒိုင်ယက်ဇ်ကာနယ်သည် ကျူးဘားအစိုးရအဖွဲ့အတွင်း၌ ရာထူးကြီးမားသော နေရာတွင် ဆယ်စုနှစ် ၂ စုခန့် တာဝန်ယူလုပ်ကိုင်ခဲ့သော်လည်း သူသည် အခြားခေါင်းဆောင်များနှင့်ယှဉ်လျှင် လူသိနည်းသော မထင်မရှားခေါင်းဆောင်တစ်ဦးအဖြစ်သာ နေထိုင်ခဲ့သည်။

လူပေါင်း ၁၁ သန်းကျော်ခန့်နေထိုင်သော ကျူးဘားကျွန်းနိုင်ငံမှ ပြည်သူအများစုက မီဂေးလ်သည် ကျူးဘား ခေါင်းဆောင်များဖြစ်ခဲ့ကြသော ကတ်စ်ထရိုညီနောင်ကဲ့သို့ ၁၉၅၉ တော်လှန်ရေး၌ ပါ၀င်ခဲ့သူမဟုတ်ကြောင်း သိရှိထားကြသည်။

ထိုသို့ တော်လှန်ရေးကာလအတွင်း၌ ပါ၀င်ခဲ့ခြင်းမရှိသော်လည်း ကျူးဘားပြည်သူများအနေဖြင့် သမ္မတအသစ် ကို ကြိုဆိုလက်ခံမှုများ ရပ်တန့်သွားခြင်းမရှိသလို သမ္မတအသစ်သည် ပျှမ်းမျှလစာ ဒေါ်လာ ၃၀ခန့်သာ ရရှိနေ သော သူတို့၏ နေ့စဉ်နေထိုင်မှုဘဝများ တိုးတက်လာအောင် ပြုပြင်ပြောင်းလဲမှုများ လုပ်ဆောင်သွားနိုင်မည်ဟု ယုံကြည်မျှော်လင့်နေကြသည်။

“ကျွန်မတို့ဟာ ပြောင်းလဲမှုအများအပြား ပေါ်ပေါက်လာမယ်လို့ မျှော်လင့်နေကြပါတယ်” ဟု ဟာဗားနားရှိ ဘားတစ်ခုတွင် အလုပ်လုပ်နေသော အသက် ၂၇ နှစ် အရွယ်ရှိ ၀ိတ်တာမလေး ယာနီပူလီဒိုက ပြောခဲ့သည်။

“နိုင်ငံအာဏာကို အသက်အများကြီးငယ်ရွယ်ပြီး စိတ်ကူးစိတ်သန်းအသစ်တွေ၊ အတွေးအမြင်အသစ်တွေရှိတဲ့ ပုဂ္ဂိုလ်တစ်ဦးအပေါ် လွှဲပြောင်းပေးအပ်လိုက်တာကြောင့် ပြုပြင်ပြောင်းလဲမှုများဟာ လျင်မြန်စွာနဲ့ ပေါ်ပေါက် လာမယ်လို့ ကျွန်မတို့မျှော်လင့်နေကြပါတယ်” ဟုလည်း သူမက ဆိုခဲ့သည်။

ရာအူးလ်ကတ်စ်ထရိုတို့ကဲ့သို့ ကျူးဘားနိုင်ငံ၏ ၁၉၅၉ တော်လှန်ရေးကာလအတွင်းမှ ပေါ်ထွက်လာခဲ့သော ခေါင်းဆောင်များပြီးနောက် တော်လှန်ရေးနောက်ပိုင်း၌ မွေးဖွားသော ပထမဦးဆုံးသမ္မတဖြစ်လာသည့် မီဂေးလ် ဒိုင်ယက်ဇ်ကာနယ်၏ အမျိုးသားလွှတ်တော်အတွင်းမှ သမိုင်းဝင်ရာထူးလက်ခံမှုအခမ်းအနားကို မြို့တော် ဟာဗားနားနှင့် အခြားမြို့များမှ ပြည်သူအားလုံးနီးပါးခန့်က ဧပြီလ ၁၉ ရက်နေ့တွင် ရုပ်မြင်သံကြားမှ ကြည့်ရှုခဲ့ ကြသည်။

 

 

Mizzima Weekly