ရဲတံခွန်သဘာဝဓာတ်ငွေ့စီမံကိန်း ကမ်းလွန်လုပ်ကွက် ၃ ခု ၊ နှစ်ကုန်ပိုင်းတွင် တူးဖော်မည်

ရဲတံခွန်သဘာဝဓာတ်ငွေ့စီမံကိန်း ကမ်းလွန်လုပ်ကွက် ၃ ခု ၊ နှစ်ကုန်ပိုင်းတွင် တူးဖော်မည်
 ဓာတ်ပုံ - LNG World News

မြိတ်၊ ဧပြီ ၄ ။                    ။ မြိတ်ကျွန်းစု အနောက်မြောက်ကမ်းရိုးတန်း ရေမိုင် ၁၈၀ ခန့် အကွာတွင် မြန်မာကမ်းလွန်လုပ်ကွက်အမှတ် M12၊ M13၊ M14 တို့တွင် သဘာဝဓာတ်ငွေ့များကို ရဲတံခွန်သဘာဝဓာတ်ငွေ့စီမံကိန်းမှ လာမည့်၂၀၁၈ ခုနှစ် နှစ်ကုန်ပိုင်းတွင် ထပ်မံတူးဖော်သွားမည် ဖြစ်ကြောင်း သိရသည်။

“ အခု ပြန်လည်တူးဖော်မည့် မြန်မာကမ်းလွန် လုပ်ကွက်အမှတ် M12 M13 M14 သုံးခုက အသစ် တူးဖော် နေခြင်း မဟုတ်ပါဘူး၊ နဂိုရှိပြီးသား ဖြစ်တဲ့ တွင်းဟောင်း နေရာမှ နည်းနည်း ပြန်ရွေ့ပြီး၊ နောက်ထပ် တွင်းတွေကို ပြန်တူးဖော်မှာ ဖြစ်တယ်” ဟု PC MYANMAR (HONG KONG) LIMITED မှ တာဝန်ရှိသူ ဦးဇော်ဇော်အောင်က ပြောသည်။

အဆိုပါ မြန်မာ ကမ်းလွန် လုပ်ကွက်အမှတ် M12 M13 M14 တို့ကို ၂၀၁၈ ခုနှစ်၊ စတုတ္တသုံးလပတ် (အောက်တိုဘာ၊ နိုဝင်ဘာလနှင့် ဒီဇင်ဘာလ) တို့တွင် တူးဖော်သွားမည် ဖြစ်ကာ ရေနံတွင်းနေရာ၏ ရေအနက်မှာ (၁၀၃) မီတာနှင့် (၃၄၁) မီတာ ခန့် ရှိပြီး၊ သဘာဝဓာတ်ငွေ့ စီမံကိန်းကာလမှာ ၇ လကြာမြင့်မည် ဖြစ်ပြီး၊ လုပ်ငန်းလည်ပတ်ချိန် နှစ် ၅၀ ကြာမည် ဖြစ်ကြောင်း သိရသည်။

အဆိုပါ ရဲတံခွန်သဘာဓာတ်ငွေ့စီမံကိန်း၏ ရေနံတိုးတက် ဖွံဖြိုးထုတ်လုပ်ရေး တွင်းတူးဖော်ခြင်းအတွက် ပတ်ဝန်းကျင် ထိခိုက်မှု ဆန်းစစ်ခြင်းဆိုင်ရာများ၊ နယ်ပယ်တိုင်းတာ သတ်မှတ်ခြင်းနှင့် ထိခိုက်သက ရောက်နိုင်မှုများ အဆိုပြု လျှော့ချနိုင်မည့် နည်းလမ်းများကို ပြည်သူများ သိရှိနိုင်ရန်ဟု ဆိုကာ ဧပြီလ ၃ ရက်နေ့က မြိတ်မြို့နယ်၊ ဟိုတယ် Grand Jade တွင် ရှင်းလင်းခဲ့သေးသည်။

ရဲတံခွန် စီမံကိန်းမှ မြန်မာနိုင်ငံတွင် ဆောင်ရွက်နေသော လုပ်ကွက်များမှာ အော်ပရေတာအဖြစ် ကမ်းလွန် လုပ်ကွက် ၃ ခုမှာ တနင်္သာရီတိုင်းဒေသကြီးတွင် ကမ်းလွန်လုပ်ကွက် M12 M13 M14 ရဲတံခွန် သဘာ၀ ဓာတ်ငွေ့စီမံကိန်းနှင့် ကုန်းတွင်း လုပ်ကွက် ၂ ခု၊ ဧရာဝတ်တိုင်းတွင် ကုန်းတွင်း လုပ်ကွက် IRO5နှင့် IRO7၊ အခြား ရေနံနှင့် သဘာဝဓာတ်ငွေ့လုပ်ငန်း အော်ပရေတာများ၏ အကျိူးတူပူးပေါင်း ဆောင်ရွက်သူအဖြစ်  ကမ်းလွန်လုပ်ကွက် ၂ ခု၊ ရခိုင်ပြည်နယ် ဘင်္ဂလားပင်လယ်အော်အတွင်းရှိ ကမ်းလွန်လုပ်ကွက် D9 နှင့် D11နှင့် ကုန်းတွင်း လုပ်ကွက် ၁ ခုနှင့် မကွေးတိုင်းဒေသကြီးအတွင်း ကုန်းတွင်း လုပ်ကွက် EP 1 တို့ ဖြစ်ကြောင်း သိရ သည်။

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly