တရားဥပဒေစိုးမိုးရေးနဲ့ လူမှုစီးပွားဘဝတိုးတက်အောင် လုပ်ဆောင်ဖို့ NLD မူဝါဒ ချမှတ်ထား

တရားဥပဒေစိုးမိုးရေးနဲ့ လူမှုစီးပွားဘဝတိုးတက်အောင် လုပ်ဆောင်ဖို့ NLD မူဝါဒ ချမှတ်ထား
ဓာတ်ပုံ - သူရ
 

ရန်ကုန် ၊ ဧပြီ ၂ ။               ။ အမျိုးသားဒီမိုကရေစီအဖွဲ့ချုပ် အစိုးရအနေဖြင့် တရားဥပဒေစိုးမိုးရေး နှင့် ပြည်သူများ၏ လူမှုစီးပွားဘ၀ တိုးတက်မြင့်မား စေရေးအတွက် ဦးစားပေးလုပ်ဆောင်သွားရန် မူဝါဒ ချမှတ်ထားသည်ဟု ပါတီ၏ ပြောရေးဆိုခွင့်ရှိသူ ဒေါက်တာမျိုးညွန့်က မဇ္ဈိမသို့ အတည်ပြုပြောဆိုသည်။

"တရားဥပဒေစိုးမိုးရေး ရယ် ပြည်သူလူထုလူမှုစီးပွားရေးတိုးတက်မြင့်မားအောင် ဆောင်ရွက်မည် ဆိုတာ ကျွန်တော်တို့ရဲ့ ဦးစားပေးလုပ်ငန်းဖြစ်မှာပါ"  ဟု ဒေါက်တာမျိုးညွန့်က ဆိုသည်။

သို့သော်လည်း ပြည်တွင်းငြိမ်းချမ်းရေး ၊ ဖွဲ့စည်းပုံပြင်ဆင်ရေး ၊ ဖက်ဒရယ်ပြည်ထောင်စုတည်ဆောက်ရေး စသည့် လုပ်ငန်းစဉ်များအား လုပ်မြဲအတိုင်း ဆက်လက်လုပ်ဆောင်သွားမည်ဟု ၎င်းကဆိုသည်။

NLD အနေဖြင့် အစိုးရတာဝန်စတင်ယူခဲ့သည့် ကာလတွင် အမျိုးသားရင်ကြားစေ့ရေးနှင့် ပြည်တွင်းငြိမ်းချမ်းရေးကို ဦးစားပေးလုပ်ဆောင်ခဲ့သော်လည်း အောင်မြင်အောင် စွမ်းဆောင်နိုင်ခြင်း မရှိဟု ဆိုသည့် ဝေဖန်မှုများလည်း ရှိနေခဲ့သည်။

သို့သော်လည်း နိုင်ငံ၏ ဖွံ့ဖြိုးမှုအား ကိန်းဂဏန်းများဖြင့် ပြည့်စုံအောင် ဖော်ပြမရနိုင်ဘဲ အဖြေမှန်ကို သိရန်ခက်သည်ဟု နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က  ယမန်နေ့က ပြောဆိုခဲ့သည့်အစိုးရ (၂) နှစ်ပြည့် မိန့်ခွန်းတွင် ထည့်သွင်းပြောဆိုခဲ့သည်။

အစိုးရအနေဖြင့် လာမည့်နှစ်အတွင်းပြည်သူပြည်သားများအတွက် ဆောင်ရွက်ချက်များကို ထပ်မံသတ်မှတ်ပြီး နှစ်ကူးချိန်တွင် ချပြသွားမည်ဟု ဒေါ်အောင်ဆန်းစုကြည်ပြောဆိုသည့် မိန့်ခွန်းတွင် ပါရှိသည်။

ရခိုင်ပြည်နယ်အရေးကိစ္စများနှင့်ပတ်သက်ပြီး နိုင်ငံတကာ၏ ဖိအားများ အထင်အမြင်လွဲမှားမှုများကို NLD အစိုးရက ရင်ဆိုင်နေရပြီး ယင်းကိစ္စများအား ပြည်သူလူထု၏ စုပေါင်းအင်အားဖြင့် ရင်ဆိုင်ဖြေရှင်းသွားမည်ဟု ဒေါ်အောင်ဆန်းစုကြည်က ပြောဆိုထားသည်။

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly