စံချိန်အများအပြားကို အဆက်မပြတ်တင်ရှိနေသော စူပါဟီးရိုးရုပ်ရှင် Black Panther သည် ယခုအခါတွင် တွစ်တာပေါ်၌ လူပြောအများဆုံးရုပ်ရှင်တစ်ကားအဖြစ် စံချိန်တင်နိုင်ခဲ့သည်။

လူမည်းဒါရိုက်တာ ရိုင်ယန်ကူဂလာ၏ ရုံဝင်ငွေစံချိန်တင်ရရှိထားသော Black Panther အကြောင်းကို တွစ်တာ ပေါ်၌ တွိစ်လုပ်သည့်အကြိမ်ရေ စံချိန်တင် ၃၅ သန်းကျော်အထိရှိခဲ့ကြောင်း တွစ်တာက အင်္ဂါနေ့တွင် ကြေညာ ခဲ့သည်။

ထို့ကြောင့် Black Panther သည် တွစ်တာပေါ်၌ လူပြောအများဆုံးရုပ်ရှင်အဖြစ် စံချိန်တင်ထားခဲ့သော Star Wars: The Force Awakens နှင့် The Last Jedi တို့ကိုကျော်ဖြတ်ပြီး စံချိန်သစ်တင်နိုင်ခဲ့ပြီဖြစ်သည်။

ပြီးခဲ့သောစနေတနင်္ဂနွေပိတ်ရက်တွင်လည်း Blak Panther သည် ရုံဝင်ငွေအများအပြားရရှိခဲ့ပြီး Box Office ရုံဝင်ငွေဇယား၌ ဆက်လက်ဦးဆောင်နိုင်ခဲ့သည့်အတွက် လွန်ခဲ့သော ၂၀၀၉ ခုနှစ်ကထွက်ရှိခဲ့သော Avatar ရုပ်ရှင်ပြီးနောက် ရုံဝင်ငွေဇယား၌ ထိပ်ဆုံးနေရာမှ ငါးပတ်ဆက်တိုက်ရပ်တည်နိုင်သည့် ရုပ်ရှင်တစ်ကားဖြစ်လာ ခဲ့သည်။

Black Panther ရုပ်ရှင်သည် အမေရိကန်ပြည်တွင်း၌ ရုံဝင်ငွေ အမေရိကန်ဒေါ်လာ ၆၀၇ သန်းခန့်ရရှိခဲ့ပြီး တစ်ကမ္ဘာလုံးရုံဝင်ငွေ ၁.၂ ဘီလျံကျော်အထိ ရရှိခဲ့ပြီးပြီဖြစ်သည်။

တွစ်တာ၏ အဆိုအရ Black Panther ရုပ်ရှင်သည် အမေရိကန်၌ တွိစ်လုပ်သည့်အကြိမ်ရေအများဆုံးရှိသော ရုပ်ရှင်ဖြစ်ယုံသာမက ဗြိတိန်နှင့် ထိုင်းနိုင်ငံတို့တွင်လည်း တွစ်တာ၌ လူပြောအများဆုံးရုပ်ရှင်ဖြစ်သည်ဟု သိရ သည်။

Ref: Billboard