တူညီသော တန်ပြန်မှုဖြင့် ဗြိတိန်သံတမန် ၂၃ ဦး တစ်ပတ်အတွင်း နိုင်ငံမှ ထွက်သွားရန် ရုရှအမိန့်ထုတ်

တူညီသော တန်ပြန်မှုဖြင့် ဗြိတိန်သံတမန် ၂၃ ဦး တစ်ပတ်အတွင်း နိုင်ငံမှ ထွက်သွားရန် ရုရှအမိန့်ထုတ်

 

မော်စကို၊ မတ် ၁၇ ။            ။ ဗြိတိန်နိုင်ငံ၏ လုပ်ရပ်ကို တူညီသော တန်ပြန်မှုဖြင့် ရုရှနိုင်ငံသည် ဗြိတိန်သံတမန် ၂၃ ဦးက ပြည်နှင်ခြင်းကို မတ် ၁၇ ရက်တွင် အမိန့်ထုတ်လိုက်သည်။

ဗြိတိန်မြေပေါ်တွင် ရုရှစပိုင်ဟောင်းနှင့် သမီးဖြစ်သူတို့ ဓာတုအဆိပ်လုပ်ကြံခံရခြင်းအပေါ် ရုရှအား စွပ်စွဲကာ ဗြိတိန်က ဆုံးဖြတ်လုပ်ဆောင်ခဲ့ခြင်းများအပေါ် ရုရှက ဗြိတိန်သံတမန်များအား တစ်ပတ်အတွင်း နိုင်ငံအတွင်းမှ ထွက်ခွာရန် တူညီသော တန်ပြန်မှုဖြင့် တုံ့ပြန်လိုက်ခြင်းဖြစ်သည်။

၎င်းပြင် ရုရှနိုင်ငံအတွင်းက ဗြိတိသျှကောင်စီ၏ လုပ်ငန်းဆောင်တာလည်ပတ်မှုများကို ရပ်ဆိုင်းခိုင်းလိုက်သည်။

“မော်စကိုက ဗြိတိန်သံရုံးက သံတမန် ၂၃ ဦးကို သံအဖွဲ့ဝင်အဖြစ်မှ ဆက်လက်ထားရန် အစိုးရမလိုလားသူများအဖြစ် ကြေညာပြီး တစ်ပတ်အတွင်း ထွက်ခွာခိုင်းထားပါတယ်။”ဟု ဗြိတိန်သံအမတ်ကြီး ဘရစ္စတိုးအား သမ္မန်ဆင့်ခေါ်လိုက်ပြီးနောက် ရုရှနိုင်ငံခြားရေးဝန်ကြီးဌာနက ကြေညာသည်။

မတ် ၄ ရက်က ရုရှစပိုင်ဟောင်း လုပ်ကြံခံရမှုကို ဗြိတိန်က အခြေအမြစ်မရှိ စွပ်စွဲပြီး ရန်စသည့် လုပ်ရပ်များ ဆောင်ရွက်ခဲ့ခြင်းကြောင့် ယခုကဲ့သို့ တုံ့ပြန်ရခြင်းဖြစ်ကြောင်း ရုရှနိုင်ငံခြားရေးဝန်ကြီးဌာန ထုတ်ပြန်ချက်တွင် ဖော်ပြသည်။

အင်္ဂလန်တွင် စပိုင်ဟောင်း ဆာဂျီစကီရီပဲလ်နှင့် သမီးဖြစ်သူအား ဆိုဗီယက်ပြည်ထောင်စုတွင် ထုတ်လုပ်ဖူးသည့် အာရုံကြောသေဓာတုအဆိပ်ဖြင့် လုပ်ကြံခဲ့ခြင်းကြောင့် ဗြိတိန်က ရုရှအပေါ် အပြစ်ဖို့ကာ ရုရှသံတမန် ၂၃ ဦးအား တစ်ပတ်အတွင်း နိုင်ငံက နှင်ထုတ်ကြောင်း ကြေညာထားခြင်းဖြစ်သည်။

ရုရှက ပြန်လည်တုံ့ပြန်ရာတွင် နိုင်ငံအတွင်းရှိ ဗြိတိန်၏ ယဉ်ကျေးမှုကူးလူးဆက်ဆံခြင်းနှင့် ပညာရေးအခွင့်အရေးများဆိုင်ရာ အဖွဲ့အစည်းဖြစ်သော ဗြိတိသျှကောင်စီ၏ လုပ်ငန်းဆောင်တာများကိုလည်း ရပ်ဆိုင်းပစ်ခိုင်းခဲ့သည်။

“ရုရှနိုင်ငံအတွင်းမှာ ဗြိတိသျှကောင်စီက တရားမဝင်တော့တဲ့ အခြေအနေကြောင့် လုပ်ငန်းများ ရပ်ဆိုင်းရမှာဖြစ်တယ်။”ဟု အဆိုပါ ထုတ်ပြန်ချက်က ဖော်ပြခဲ့သည်။

 

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly