ကျန်းမာရေးစောင့်ရှောက်မှုကွန်ယက် ၂ ခု အော်ရီဒူးမြန်မာမှ ကျန်းမာရေးနှင့် အားကစားဝန်ကြီးဌာနသို့ လွှဲပြောင်း

ကျန်းမာရေးစောင့်ရှောက်မှုကွန်ယက် ၂ ခု အော်ရီဒူးမြန်မာမှ ကျန်းမာရေးနှင့် အားကစားဝန်ကြီးဌာနသို့ လွှဲပြောင်း
(ဓာတ်ပုံ၊အော်ရီဒူးမြန်မာ သတင်းပြန်ကြားရေး)

မန္တလေး၊မတ်လ ၁၆ ။            ။ ပဲခူးတိုင်းဒေသကြီး၊ရွှေတောင်မြို့နယ်၊ ကမ်းတင်ကျေးရွာနှင့် ကြက်ဖြူတောင်ကျေးရွာတို့တွင် အော်ရီဒူးမြန်မာ၏ ထောက်ပံ့မှုဖြင့် တည်ဆောက်ပြီးစီးခဲ့သည့် ကျန်းမာရေးကွန်ယက်၂ခုကို မတ်လ ၁၆ ရက်နေ့က ကျန်းမာရေးနှင့် အားကစား ဝန်ကြီးဌာနသို့ လွှဲပြောင်းပေးအပ်လိုက်သည်ဟု အော်ရီဒူးမြန်မာသတင်းပြန်ကြားရေးအဖွဲ့ထံမှ သိရသည်။

အော်ရီဒူးမြန်မာမှပြည်နယ်နှင့်တိုင်း ၈ ခုတွင် ပဏာမ ကျန်းမားရေးစောင့်ရှောက်မှုကွန်ယက် ၁၇ ခုကို တည်ဆောက်ရန် အမေရိကန်ဒေါ်လာ ၃.၁ သန်းပံ့ပိုးကူူညီပြီး လက်ရှိတွင် ပဲခူးတိုင်းဒေသကြီး၌ တည်ဆောက် ပြီးစီးခဲ့သည့် ကျန်မာရေကွန်ယက် ၂ ခုကို ကျန်းမာရေးနှင့်အားကစားဝန်ကြီးဌာနသို့ လွှဲပြောင်း ပေးအပ် လိုက်ခြင်းဖြစ်သည်။

အဆိုပါ ပဏာမ ကျန်းမာရေးကွန်ယက်တည်ဆောက်နေခြင်းကို အော်ရီဒူးမြန်မာနှင့် ကုလသမဂ္ဂ စီမံကိန်း လုပ်ငန်းများ ဆိုင်ရာရုံး UNOPS တို့ ပူးပေါင်းဆောင်ရွက်နေကြောင်းသိရသည်။

အော်ရီဒူးမြန်မာအနေဖြင့် ယခုလို ပြည်နယ်နှင့်တိုင်းဒေသကြီး၈ ခုတွင် ပဏာမကျန်းမာရေးကွန်ရက် ၁၇ ခုကို တည်ဆောက်ရန် အမေရိကန်ဒေါ်လာ ၃.၁ သန်း ပံ့ပိုးကူညီပေးရခြင်းမှာ ကျန်းမာကြံ့ခိုင်သော လူမှုအဖွဲ့အစည်းကို ပြုစုပျိုးထောင်ရန်နှင့် နိုင်ငံ၏ ဖွံ့ဖြိုးတိုးတက်မှုကို အထောက်အပံ့ပေးရန်၊ မြန်မာအမျိုးသမီးများနှင့် ကလေးငယ်များကို ပိုမိုကောင်းမွန်သော ကျန်းမာရေးစောင့်ရှောက်မှုများ လုပ်ဆောင်ပေးနိုင်ရန်တို့အတွက်ဖြစ်သည်။

အော်ရီဒူးမြန်မာအနေဖြင့် မြန်မာနိုင်ငံတွင် ကျန်းမာရေးစောင့်ရှောက်မှု ပိုမိုဖွံ့ဖြိုးတိုးတက်ရန်အတွက် ပံံ့ပိုးပေးနိုင် မည့် တာဝန်သိ လူမှုအကျိုးပြုလုပ်ငန်း ဆောင်ရွက်ချက်များကို လုပ်ဆောင်ရန် လေးစားလိုက်နာ စောင့်သိရ မည့် ကတိထားရှိပါသည်။

ကျေးလက်နှင့် မြို့ပြဒေသများရှိ လူထုအနေဖြင့် ယခုအခါ မိမိတို့၏လူမှုအဖွဲ့အစည်းတွင် စံချိန်မီ အဆင့်မြင့် ပဏာမကျန်းမာရေးကွန်ရက်များ ရရှိတော့မည်ဖြစ်သဖြင့် မိခင်၊ မွေးကင်းစအရွယ်ကလေးငယ်များနှင့် ကလေးများ၏ ကျန်းမာရေးကို အဓိကထားသည့် ဆေးကုသမှုများနှင့်ဝန်ဆောင်မှုများ ရရှိနိုင်တော့မည် ဖြစ်သည်။

ထိုပဏာမကျန်းမာရေးစောင့်ရှောက်မှုကွန်ယက်များသည် တီဘီရောဂါနှင့်ငှက်ဖျားရောဂါ အစရှိသကဲ့သို့ ကူးစက်ရောဂါများကို ကုသရန်လည်း ကူညီပေးနိုင်လိမ့်မည် ဖြစ်ကြောင်း အော်ရီဒူးမြန်မာက သတင်း ထုတ်ပြန်ထားသည်။

အော်ရီဒူးမြန်မာ၏ CEO ဖြစ်သူ Mr. Vikram Sinhaက "မြန်မာနိုင်ငံ ကျေးလက်နဲ့ မြို့ပြ ဝေးကွာတဲ့ဒေသများတွင် မိခင်နဲ့ ကလေး သေဆုံးမှုအဆင့်က လက်မခံနိုင်လောက်အောင် မြင့်တာကို တွေ့ရပြီး အထူးသဖြင့် သေဆုံးမှု အများစုဟာ ကာကွယ်နိုင်သောကိစ္စများ ဖြစ်ကြောင်း သိရသည်။

“  မြန်မာပြည်သူလူထု၊ အထူးသဖြင့် မိခင်နဲ့ကလေးတို့ရဲ့ ကျန်းမာရေးစောင့်ရှောက်မှုကို ပိုမိုတိုးတက် ကောင်းမွန်စေရန် ပံ့ပိုးပေးလိုတဲ့အတွက် မိမိတို့ရဲ့ ကတိထားရှိချက်အတိုင်း အမေရိကန်ဒေါ်လာ ၃.၁ သန်း (လက်ရှိတန်ဖိုးမြန်မာငွေ ကျပ် ၄,၁၂၆,၁ဝဝ,ဝဝဝ) ကို လှူဒါန်းပံ့ပိုးပေးခဲ့ပါတယ်” ဟု ပြောသည်။

ဆောက်လုပ်ရန်ကျန်ရှိနေသည့် ပဏာမကျန်းမာရေးစောင့်ရှောက်မှုကွန်ယက် ၁၅ ခုကိုလည်း ၂၀၁၈ခုနှစ်၊သြဂုတ်လအတွင်း အပြီးတည်ဆောက်သွားရန် စီစဉ်ဆောင်ရွက်လျှက်ရှိကြောင်းသိရသည်။

Mizzima Weekly