လူငယ်နဲ့ စကားပြေအရေးအသားပြဿနာ ၅

လူငယ်နဲ့ စကားပြေအရေးအသားပြဿနာ ၅

 

ဒီကနေ့လည်း စကားလုံးသတ်ပုံအမှားတွေ၊ ဝါကျအထားအသိုအမှားတွေကြောင့် ရုပ်ပျက်ဆင်းပျက်အဓိပ္ပါယ်တွေဖြစ်ရပြီး ရည်ရွယ်ရာမရောက် မရောက်သင့်ရာရောက်စေတဲ့ စကားပြေတချို့ ဆက်ပြီး ဆွေးနွေးချင်ပါသေးတယ်။

တစ်ခုတော့ အလေးအနက်ထား မေတ္တရပ်ခံချင်တာ ရှိပါတယ်။ အခု တင်ပြဆွေးနွေးမယ့် စကားပြေအမှားနဲ့ စကားလုံးပေါင်းအမှားကိစ္စတွေ အပြင်မှာ တကယ်ရှိခဲ့ဖြစ်ခဲ့တာမှန်ပေမယ့် စာဖတ်သူများအနေနဲ့ မဟုတ်မဟပ်တဲ့မျက်လုံးနဲ့ မဖတ်ကြဘဲ ပျော်ရွှင်စေဖို့အတွက် ပညာမျက်စေ့နဲ့သာ ဖတ်ကြဖို့ တောင်းပန်အပ်ပါတယ်။

ပထမ အောက်ပါ စာတစ်စောင်ကို ဖတ်ကြည့်ပါ။

သို့

စုမျက်

ကို ဘာအမှားလုပ်မိလို့လဲကွာ

စုမျက်ကို ကိုက မမှန်းပေမဲ့

စုမျက်က ကို့ကို အရမ်းမှန်းတာပဲ

စုမျက် ကြိုက်သလောက်မှန်းပါ ကို မမှန်းရက်ပါဘူး

စုမျက် အားတဲ့အပတ် ဘူဘုရားကိုလာခဲ့ပါ

စုမျက်ကို ကှိကှိတေ့ချင်တယ်

စုမြတ်ဘက်က တေ့စရာမရှိပေမဲ့ ကိုကိုဘက်က တေ့စရာရှိတယ်

ပုံ

စုမျက် မှန်းလွန်းတဲ့ အိုးပါး

ကဲ ဒါကတော့ ပထမဦးစွာ ကျနော်တို့ လေ့လာဖတ်ရှုရမယ့် သင်ခန်းစာဝင် စကားပြေစာတစ်စောင်ပဲ။ စာမှာပါတဲ့ စကားလုံးပေါင်းအမှားတွေကို သေသေချာချာ ဂရုစိုက်ပြီး ဖတ်ကြည့်ပါ။ မရှင်းရင် ဘာမှားနေသလဲဆိုတာ မဝေခွဲတတ်ရင် အခြားသူငယ်ချင်းတစ်ယောက်ယောက်ရဲ့အကူအညီနဲ့ ဖတ်ကြည့်ပါ။ ခွက်ထိုးခွက်လန် ရယ်မောရလောက်အောင် စကားလုံးအမှားတွေ တွေ့ကြရမှာပါ။ အဲဒီအမှားတွေဟာ တစ်လုံးချင်းအဓိပ္ပါယ် စောင်းသွားမှားသွားစေမှာဖြစ်တဲ့အပြင် သူပြောချင်တဲ့ရည်ရွယ်ချက်ကိုပါ ကပြောင်းကပြန်ဖြစ်စေတာ တွေ့ကြရမှာပါ။

ကဲ နောက်ထပ် စာလုံးပေါင်းမှားလို့ အဓိပ္ပါယ်ပြောင်းပြန်ဖြစ်စေတဲ့ကဗျာပိုဒ်တစ်ပိုဒ်ဆီ သွားကြရအောင်ပါ။

အဲဒီကဗျာပိုဒ်ကတော့…၊

ငါတို့ တနိုင်ငံလုံး ကြိမ်မီးအုန်းသလိုဖြစ်နေပြီ

ငါတို့ ကျောင်းသားတွေအားလုံး ဒေါသဟုန်းဟုန်းတောက်နေကြရပြီ

ငါတို့ လယ်သမားတွေ ခံစားချက်တွေ ကြီးမားနေကြရပြီ

ငါတို့ အလုပ်သမားတွေ တက်ခေါက်သံတွေ ဆူညံနေကြရပြီ

ဒီအကြောင်းတွေကို

ဒေါ်အောင်ဆန်းစုကြည်ကို မေ့လိုက်စမ်းပါ မေ့လိုက်စမ်းပါ။

အဲဒါကတော့ နိုင်ငံရေးတက်ကြွလှုပ်ရှားသူတစ်ဦးရေးတဲ့ကဗျာတစ်ပုဒ်ထဲက ကဗျာတစ်ပိုဒ်ပါပဲ။ ဒီကဗျာပိုဒ်မှာကော ဘယ်စကားလုံးဟာ မှားနေသလဲ။ ဘယ်စကားလုံးက စာလုံးပေါင်းအပေါ်မူတည်ပြီး ဆိုလိုချင်တာမရောက်တဲ့အပြင် အဓိပ္ပါယ်ပြောင်းပြန်နီးပါး ပြောင်းသွားတာတွေ့ကြရမှာပါ။ ဒေါ်အောင်ဆန်းစုကြည်ကို “မေး”လိုက်စမ်းပါလို့ စာလုံးပေါင်းရမယ့်အစား “မေ့” လိုက်စမ်းပါလို့ မှားရေးလိုက်တော့ ဘယ်လိုအဓိပ္ပါယ်ပြောင်းသွားရသလဲ။ ပိုဆိုးတာက ကဗျာဆရာက အမှန်အတိုင်း မေး ဆိုပြီး ရေးပို့ထားတာကို စာစီတဲ့သူက မှားပြီး မေး ကို မေ့ ဆိုပြီးစာစီမိတာရယ် တစ်ခါ အယ်ဒီတာကလည်း မျက်စေ့မှောက်ပြီး ပြင်မပေးလိုက်မိတာကြောင့် ပုံနှိပ်ပြီး စာအုပ်ထွက်လာတဲ့အခါကြမှာပဲ အဲဒီစာလုံးပေါင်းအမှားကို တွေ့ကြရတာပါ။ အဲဒီတော့ တာဝန်ရှိသူတွေကလည်း ကဗျာဆရာကိုအားနာ၊ ကဗျာဆရာမလည်း တသက်လုံးခိုးလိုးခုလုဖြစ်ရပါတော့မယ်။

နောက်တစ်ခုဆက်ပါအုန်းမယ်။

တခါတုန်းက ကျနော့်မိတ်ဆွေ အယ်ဒီတာ အပျိုကြီးတစ်ဦးရဲ့ တော်တော်အခက်အခဲကြုံခဲ့ရတဲ့အဖြစ်အပျက်ပါ။ ဒါလည်း စာလုံးပေါင်းမှားပြီး ပုံနှိပ်မိလို့ အပျိုကြီးအယ်ဒီတာတစ်ဦး ငိုရမလို ရယ်ရမလို ကြုံရတဲ့အဖြစ်ပါ။

သူ အယ်ဒီတာလုပ်ပြီးထုတ်ဝေတဲ့ မဂ္ဂဇင်းက အဖွဲ့အစည်းတစ်ခုက ထုတ်ဝေတဲ့မဂ္ဂဇင်းပါ။ သုတေသန အဖွဲ့အစည်းတစ်ခုပါ။ မဂ္ဂဇင်းရဲ့ ရှေ့အဖုံးအောက်ခြေမှာ ထုတ်ဝေတဲ့ အဲဒီအဖွဲ့အစည်းရဲ့အမည်ကို တပ်ရပါတယ်။ ဘယ်လိုတပ်ရသလဲဆိုတော့ “မြန်မာနိုင်ငံလုံးဆိုင်ရာ….သုတေသနအဖွဲ့မှ ထုတ်ဝေသည်”လို့ တပ်ရပါတယ်။ အဲဒီစာကြောင်းမှာ “လုံး” ဆိုတဲ့စာလုံးကို စာလုံးပေါင်းမှားပြီး သေးသေးတင်မရေးဘဲ လုံးကြီးတင်နဲ့ ရေးလိုက်တော့ ဘယ်လောက်အထိ အဓိပ္ပါယ်တိမ်းစောင်းသွားရသလဲ။ စဉ်းစားသာ ကြည့်ကြပါတော့။

နောက်တစ်ခု သင်ခန်းစာယူရမယ့် အဖြစ်အပျက်တစ်ခု ရှိပါသေးတယ်။ အဲဒါကတော့ ပြည်ပမှာ တချိန်က ရှိခဲ့ဖူးတဲ့ စင်ပြိုင်အစိုးရတစ်ခုရဲ့ ဝန်ကြီးတစ်ဦးနဲ့ အဲဒီအစိုးရအဖွဲ့ ရုံးဝန်ထမ်းတစ်ဦးတို့ ကြုံရတဲ့အဖြစ်ပါ။

တနေ့မှာ အဲဒီစင်ပြိုင်အစိုးရအဖွဲ့က ထိုင်းမြန်မာနယ်စပ်မှာရှိတဲ့ သူတို့ရုံးမှာ အစည်းအဝေးလုပ်ပါတယ်။ အဲဒီအစည်းအဝေးက သူတို့ရေးဆွဲထားတဲ့ ဖွဲ့စည်းပုံအခြေခံဥပဒေစာတမ်းကို ဝိုင်းဝန်းဆွေးနွေးတဲ့ အစည်းအဝေးပါ။ အစည်းအဝေးမှာ စာပေနဲ့နီးစပ်တဲ့ရဲဘော်တချို့က စာတမ်းထဲမှာပါတဲ့ စကားလုံးပေါင်းသတ်ပုံတွေ မှားနေတာကို ခဏခဏ ထောက်ပြကြပါတယ်။ အဲဒီအခါ အဲဒီစင်ပြိုင်အစိုးရ ဝန်ကြီးတစ်ယောက်က မင်းတို့ကလည်း စာလုံးပေါင်းတွေက ဒီလောက်အရေးမကြီးပါဘူး ခတ်မြန်မြန်လုပ်ကြကွာလို့ ပြောပါတယ်။ ရဲဘော်တချို့ နောက်ထပ် စာလုံးပေါင်းအမှားကိုတွေ့ရင် ထပြော ထောက်ပြလုပ်ကြပါတယ်။ ဒီတော့ အဲဒီဝန်ကြီးစိတ်တိုပြီး မင်းတို့ကလည်း စာလုံးပေါင်းက ဒီလောက်အရေးမကြီးပါဘူးကွာလို့ ထပ်ပြောပြန်ပါတယ်။

အဲဒီအချိန်မှာ ကိုတင်ဦးလို့ခေါ်တဲ့ရဲဘော်တစ်ယောက်က ဒီလိုတော့ မပြောပါနဲ့ စာလုံးပေါင်းက အရမ်းအရေးကြီးတဲ့အကြောင်း အခုလို ဥပေဒရေးရာကိစ္စမှာ စာလုံးပေါင်းသတ်ပုံ ပိုပြီးအရေးကြီးကြောင်းပြောရင်း “ကဲ ဝန်ကြီးကို ၀ နသတ်နဲ့ မဝန်ဘဲ ၀ သေးသေးတင် ဝံ ဆိုပြီး ကျနော်ရေးမယ် လက်ခံမလား”လို့မေးတော့ ရဲဘော်တွေအားလုံးက ဝိုင်းရယ်ကြပါတော့တယ်။ ဝန်ကြီးဆိုတဲ့သူလည်း ငြိမ်သွားပါတော့တယ်။

ကဲ ဒီကနေ့တော့ ဒီလောက်ပါပဲ။

စာလုံးပေါင်းသတ်ပုံနဲ့ ဝါကျအထားအသိုအမှား အခက်အခဲများကို အောင်မြင်ကျော်လွှားနိုင်ကြပါစေ။

လူငယ်တို့ရဲ့ မိုးကောင်းကင် ကြည်လင်ဝင်းပနိုင်ကြပါစေ။

အပိုင်း(၁) အား ဖတ်ရန်-http://www.mizzimaburmese.com/article/37601

အပိုင်း( ၂ ) အား ဖတ်ရန်-http://www.mizzimaburmese.com/article/37690

အပိုင်း (၃)အား ဖတ်ရန် - http://mizzimaburmese.com/article/37691

အပိုင်း (၄)အား ဖတ်ရန် - http://mizzimaburmese.com/article/38139

 

Mizzima Weekly