အေဒင်၊ ယီမင်၊ မတ် ၁၄ ။         ။ အစ္စလာမ်မစ်နိုင်ငံတော်အဖွဲ့ အိုင်အက်စ်တို့သည် အင်္ဂါနေ့က ယီမင်နိုင်ငံ အေဒင်မြို့မှ အစိုးရခံတပ်ရှိ ယူအေအီးနိုင်ငံမှလေ့ကျင့်ပေးထားသည့် ယီမင်တပ်သားများကို ပစ်မှတ်ထား၍ အသေခံဗုံးခွဲတိုက်ခိုက်ခဲ့ပြီး ယင်းလုပ်ရပ်ကြောင့် ကလေးငယ်တစ်ဦးအပါအဝင် လူ ၆ ဦးခန့် သေဆုံးခဲ့ကာ ဒါဇင်ပေါင်းများစွာ ဒဏ်ရာရရှိခဲ့ ကြောင်း တာဝန်ရှိသူများက ပြောခဲ့သည်။

ယင်းတိုက်ခိုက်မှုသည် ယီမင်အစိုးရ၏မဟာမိတ်ဖြစ်သော ယူအေအီးနိုင်ငံမှ ထောက်ပံ့ပေးထားသည့် ယီမင် တပ်ဖွဲ့တည်ရှိသော ဆိပ်ကမ်းမြို့မြောက်ပိုင်းကို ပစ်မှတ်ထား၍ တိုက်ခိုက်ခဲ့ခြင်းဖြစ်ကြောင်း သိရသည်။

ထိုတိုက်ခိုက်မှုအတွင်း ကလေးငယ်တစ်ဦးအပါအဝင် လူပေါင်း ၆ ဦးထက်မနည်း သေဆုံးခဲ့ပြီး လူ ၃၀ ခန့် ဒဏ်ရာရရှိခဲ့ကြောင်း သတင်းအရင်းအမြစ်များက ဆိုခဲ့သည်။ ဒါ့အပြင် အနီးအနားရှိ ကားအများအပြားလည်း ထိခိုက်ပျက်စီးသွားခဲ့ကြောင်း သိရသည်။

ယင်းတိုက်ခိုက်မှုသည် ၎င်းတို့၏လက်ချက်ဖြစ်ကြောင်း အိုင်အက်စ်တို့က ၎င်းတို့၏ဝါဒဖြန့်သတင်းဌာနဖြစ်သော Amaq မှတဆင့် ကြေညာခဲ့ခြင်းဖြစ်သည်။ ၎င်းတို့၏ အသေခံကားဗုံးဖောက်ခွဲ၍ တိုက်ခိုက်မှုသည် ယူအေအီး အစိုးရကိုသစ္စာခံသော ယီမင်တပ်သားများ၏ဌာနချုပ်ကို ထိမှန်ခဲ့သည်ဟု ဆိုခဲ့သည်။

အေဒင်မြို့အား ယီမင်အစိုးရနှင့် ဆော်ဒီဦးဆောင်သော ညွန့်ပေါင်းတပ်ဖွဲ့က ထိန်းချုပ်ထားပြီး ၎င်းတို့သည် မြို့တော် ဆာနားမြို့နှင့် နိုင်ငံမြောက်ပိုင်းနယ်မြေအများအပြားကို ထိန်းချုပ်ထားသော ရှီးအိုက်ဟွတ်သီသူပုန် များနှင့် တိုက်ခိုက်နေကြခြင်းဖြစ်သည်။

ယီမင်နိုင်ငံအတွင်း၌ ဂျီဟတ်ဝါဒီအကြမ်းဖက်အဖွဲ့များဖြစ်ကြသော အယ်လ်ကေးဒါးနှင့် အိုင်အက်စ်တို့လည်း ရှိနေကြပြီး ယင်းနှစ်ဖွဲ့စလုံးသည် အေဒင်မြို့အတွင်း၌ မကြာသေးခင်နှစ်များအတွင်း တိုက်ခိုက်မှုအများအပြား ကို ကျူးလွန်ခဲ့ကြသည်။

ပြီးခဲ့သော ဖေဖေါ်ဝါရီလ ၂၄ ရက်နေ့ကလည်း အေဒင်မြို့ရှိ အကြမ်းဖက်တန်ပြန်တိုက်ခိုက်မှုတပ်ဖွဲ့၏ ဌာနချုပ်ကို အိုင်အက်စ်တို့က နှစ်ထပ်ကွမ်း ဗုံးခွဲတိုက်ခိုက်ခဲ့မှုကြောင့် ကလေးငယ်တစ်ဦးအပါအဝင် လူ ၅ ဦး သေဆုံးခဲ့ရသည့် အလားတူဖြစ်ရပ်မျိုး ဖြစ်ပွားခဲ့ဖူးသည်။