မြန်မာ့စာတိုက်လုပ်ငန်း ဘဏ္ဍာနှစ် ၃ နှစ်ဆက်တိုက် ကျပ်သန်းပေါင်း ၁၈၀၀၀ ကျော် အရှုံးပေါ်

မြန်မာ့စာတိုက်လုပ်ငန်း ဘဏ္ဍာနှစ် ၃ နှစ်ဆက်တိုက် ကျပ်သန်းပေါင်း ၁၈၀၀၀ ကျော် အရှုံးပေါ်

၂၀၁၅ ခုနှစ်၊ ဧပြီလ ၁ ရက်နေ့မှစတင်ကာ ဖွဲ့စည်းပုံအသစ်ဖြစ် ရပ်တည်လျက်ရှိသော ပို့ဆောင်ရေးနှင့် ဆက်သွယ်ရေး ဝန်ကြီးဌာန လက်အောက်ရှိ မြန်မာ့စာတိုက်လုပ်ငန်းသည် ယင်းဘဏ္ဍာရေးနှစ်အပါအဝင် ယခုဘဏ္ဍာနှစ်အထိ သုံးနှစ်ဆက်တိုက် အရှုံးပေါ်နေကြောင်း မြန်မာ့စာတိုက်လုပ်ငန်း၏ ဦးဆောင်ညွှန်ကြားရေးမှူးဖြစ်သူ ဦးခမ်းအောင်ကဆိုသည်။

ယင်းကို ယနေ့ ရန်ကုန်မြို့၊ ကမ်းနားလမ်းနှင့် ဗိုလ်အောင်ကျော်လမ်းထောင့်တွင်ရှိ ရန်ကုန်စာတိုက်ကြီး အဆောက်အအုံ၌ ပြုလုပ်သော မြန်မာ့စာတိုက်လုပ်ငန်းနှင့် Za Information Technology Co.,Ltd တို့်၏ Marketplace ဝဘ်ဆိုဒ် မီဒီယာမိတ်ဆက်ပွဲအခမ်းအနားတွင် ပြောဆိုခဲ့ခြင်းဖြစ်သည်။

ဦးခမ်းအောင်က - “ပွင့်ပွင့်လင်းလင်း ကျွန်တော် တင်ပြရမယ်ဆိုရင် မြန်မာ့စာတိုက်လုပ်ငန်းက ၂၀၁၅ ခုနှစ်၊ဧပြီလ ၁ရက်နေ့မှာ စခဲ့တဲ့ ၂၀၁၅-၁၆ ဘဏ္ဍာရေးနှစ်မှာ ၈.၄ ဘီလီယံကျပ် အရှုံးပေါ်ခဲ့ပါတယ်။ ပြီးတော့ ၂၀၁၆-၁၇ ဘဏ္ဍာနှစ်မှာ ၆.၂ ဘီလီယံကျပ်ရှုံးတယ်။ ဒီ ၂၀၁၇-၁၈ ဘဏ္ဍာနှစ်မှာလည်း ၄ ဘီလီယံကျပ် ပတ်ချာလည်လောက် ရှုံးတော့မယ်ဆိုတာ ကျွန်တော့်အနေနဲ့ တင်ပြလိုပါတယ်။ ဒါဟာ ဒီနိုင်ငံမှာ အရှုံးပေါ်ခဲ့တဲ့ လုပ်ငန်းတွေမှာ မြန်မာ့စာတိုက်လုပ်ငန်းဟာ တစ်ခုဖြစ်တယ်လို့ ပြောလိုပါတယ်” ဟု ဆိုသည်။

ထို့ကြောင့် ယင်းဘဏ္ဍာနှစ် သုံးရပ်စလုံးအတွက် မြန်မာ့စာတိုက်လုပ်ငန်း၏ စုစုပေါင်းအရှုံးမှာ ကျပ်သန်းပေါင်း ၁၈၀၀၀ ကျော် (၁၈.၆ ဘီလီယံကျပ်) ဖြစ်ကြောင်း တွေ့ရသည်။

မြန်မာ့စာတိုက်လုပ်ငန်းအနေနှင့် ထိုကဲ့သို့ အရှုံးပြရလာဒ်များရှိနေခဲ့သော်လည်း ဘဏ္ဍာနှစ် တစ်နှစ်ထက် တစ်နှစ် အရှုံးငွေ ကျပ် ၂ ဘီလီယံကျော်ခန့် တစ်ဖြည်းဖြည်း လျှော့ပါးလာသည်ကိုလည်းတွေ့ရသည်။

မြန်မာ့စာတိုက်လုပ်ငန်းအနေနှင့် ထိုကဲ့သို့အရှုံးပေါ်နေသော ကိစ္စသည် ဝန်ထမ်းစားရိတ်နှင့် ပင်စင်စားရိတ်များအပေါ်တွင်  ကုန်ကျစားရိတ်များရှိသည့်အပြင် ပြည်တွင်း- ပြည်ပ စာနှင့် ပါဆယ်ပစ္စည်းပို့ဆောင်ခများအပေါ်တွင် နိုင်ငံတော်က အရှုံးခံပြီး ဝန်ဆောင်မှုပေးနေရသောကြောင့်ဖြစ်သည်ဟု ဦးဆောင်ညွှန်ကြားရေးမှူး ဦးခမ်းအောင်က ပြောသည်။

ဦးခမ်းအောင်က “ရှုံးတဲ့အရှုူံးက ဘာကြောင့်ရှုံးလဲဆိုရင် လစာစားရိတ်တွေဖြစ်တယ်၊ ပင်စင်လစာစားရိတ်တွေဖြစ်တယ်ဆိုတာ ကျွန်တော် ပြောချင်ပါတယ်။ စာတိုက်က ဝန်ဆောင်မှုလုပ်ငန်းဖြစ်တဲ့အတွက် နိုင်ငံတော်က အရှုံးခံပြီး ဆောင်ရွက်ပေးနေတဲ့ ပြည်သူ့ဝန်ဆောင်မှုလုပ်ငန်းဖြစ်တယ်ဆိုတာလည်း မီဒီယာကနေတစ်ဆင့် ပြောချင်ပါတယ်”ဟု လုပ်ငန်းဌာန၏ အရှုံးပေါ်နေသော အသုံးစားရိတ်များနှင့် ပတ်သတ်၍ ပြောဆိုထားသည်။

၎င်းက ဆက်လက်ပြီး “ဒီရှုံးနေတဲ့ အရှုံးတွေထဲမှာ ၇၅ ရာခိုင်နှုန်းလောက်က ဝန်ထမ်းလစာစားရိတ်နဲ့ ပင်စင်စားရိတ်ဖြစ်ပါတယ်။ တကယ်တမ်းကျွန်တော်တို့ အမှန်တကယ်ကုန်ကျငွေဟာ ၂၅ ရာခိုင်နှုန်းပဲရှိပါတယ်။ တစ်ဆက်တစ်ဆက်တည်း ကျွန်တော်ပြောချင်တာ ပြည်တွင်းကို စာပို့ရင် စာတစ်စောင်ကို ၂၀၀ ကျပ်ကောက်ပါတယ်။ တကယ်တမ်းကုန်ကျတာက စာတစ်စောင်ကို ရန်ကုန်ကနေ မြစ်ကြီးနားပဲထည့်ထည့်၊ မန္တလေးပဲထည့်ထည့် သူ့ရဲ့ ကုန်ကျစားရိတ်သည် ၂၁၅၄ ကျပ်ဖြစ်ပါတယ်။ အဲဒိတော့ ကျွန်တော်တို့ တကယ်တမ်းကောက်နေတာ ၂၀၀ ကျပ်ပဲကောက်တဲ့အတွက် ကျွန်တော်တို့က စာတစ်စောင်ပို့တိုင်း ၁၉၅၄ ကျပ် ရှုံးပါတယ်’’ ဖြည့်စွပ်ပြောဆိုသည်။

ထို့အပြင် နိုင်ငံခြားတိုင်းပြည်များသို့ စာတစ်စောင်ပို့လျှင် စာပို့သူများမှ ၁၀၀၀ ကျပ်သာပေးချေရပြီး အမှန်တကယ် ကုန်ကျငွေမှာ ၂၅၇၈ ကျပ်ဖြစ်သောကြောင့် စာတစ်စောင်လျှင် ကျပ် ၁၅၀၀ ကျော် ရှုံးသည်ဟု ဦးခမ်းအောင်က ပြောသည်။

ဆက်တိုက်အရှုံးပေါ်မှုများဖြစ်ပေါ်နေသော်လည်း ၂၀၁၈၊ ဧပြီလ ၁ ရက်နေ့မှစတင်၍ နောက်ထပ် ၃ နှစ်တွင် အသုံးစားရိတ် နှင့် ဝင်ငွေ ကာမိသော (Break even) အခြေအနေသို့ ရောက်ရှိနိုင်မည်ဟု ဦးဆောင်ညွှန်ကြားမှူး ဦးခမ်းအောင်က ပြော သည်။

“မြန်မာ့စာတိုက်လုပ်ငန်းအနေနဲ့ အရှုံးလျှော့နည်းစေဖို့နဲ့ ပပျောက်စေအောင် ရည်ရွယ်ပြီးတော့ ၂၀၁၆ ခုနှစ်၊ သြဂုတ်လ ၂၆ရက်နေ့မှာ နိုင်ငံပိုင်သတင်းစာတွေကနေတစ်ဆင့် ပြင်ပပုဂ္ဂလိက လုပ်ငန်းများနဲ့ ပူးပေါင်းလုပ်ကိုင်နိုင်ဖို့ ပုဂ္ဂလိက အမြန်အချောပို့ လုပ်ငန်းကဏ္ဍ၊ ကိုယ်စားငွေကောက်ခံခြင်း၊ Mobile Money, ဘဏ်လုပ်ငန်းဆိုင်ရာကိစ္စများနှင့် Online မှ ဈေးဝယ်သူများကို ပစ္စည်းပို့ဆောင်ပေးခြင်းစသည့် လုပ်ငန်းကဏ္ဍ (၆) ခုကို ဖိတ်ခေါ်ခဲ့ပါတယ်” ဟု ဦးခမ်းအောင်က ဆိုသည်။

မြန်မာ့စာတိုက်လုပ်ငန်းအနေနှင့် ၂၀၁၅ ခုနှစ်၊ ဧပြီလမတိုင်ခင်က ယင်း၏ စာနှင့် ပါဆယ်ပစ္စည်း ပို့ဆောင်ခြင်းလုပ်ငန်းကို မြန်မာ့ဆက်သွယ်ရေးလုပ်ငန်းလက်အောက်တွင် စာတိုက်-ကြေးနန်း-တယ်လီဖုန်း တွဲဖက်ဝန်ဆောင်မှုလုပ်ငန်းအဖြစ် လုပ်ကိုင်ခဲ့ပြီး လက်ရှိအချိန်တွင် သီးခြားဝန်ထမ်း၊ ကိုယ်ပိုင်စီမံခန့်ခွဲမှုနှင့် သီးသန့်ဘဏ္ဍာငွေတို့ကို အသုံးပြုပြီး ဖွဲ့စည်းပုံ အသစ်ဖြင့် လည်ပတ်လျက်ရှိနေသည်။

“အဲဒိအချိန်တုန်းက ကျွန်တော်တို့က လူလိုတယ်၊ ငွေလိုတယ်၊ ပစ္စည်းလိုတယ်ဆိုရင် MPT (မြန်မာ့ဆက်သွယ်ရေး) ကို အဆိုပြုရပါတယ်၊ အခုတော့ ကိုယ်ပိုင်ဖွဲ့စည်းပုံနဲ့ လုပ်ကိုင်နေပါတယ်” ဟု ဦးခမ်းအောင်က ပြောသည်။

လက်ရှိအချိန်တွင် နိုင်ငံ၌ ပြည်တွင်းအမြန်အချောပို့ဝန်ဆောင်မှုပေးရန် ပုဂ္ဂလိက အမြန်အချောပို့လုပ်ငန်းများဖြစ်သည့် MGL၊ Royal၊ SBS နှင့် UCL စသည့် လုပ်ငန်း ၄ ခုနှင့် ပြည်ပသို့ဝန်ဆောင်မှုပေးရန် MGL ၊ UCL နှင့် Transmarine စသည့် လုပ်ငန်း ၃ ခုကို အမြန်အချောပို့လုပ်ငန်းဝန်ဆောင်မှုများပေးရန် ခွင့်ပြုထားသည်။

ယင်းသို့ မြန်မာနိုင်ငံ၏ အမြန်အချောပို့ဈေးကွက်အတွင်း ပုဂ္ဂလိက လုပ်ငန်းများရှိနေခြင်းနှင့်ပတ်သတ်ပြီး ဦးခမ်းအောင်က“ကျွန်တော်တို့က တရားဝင်အခွန်အခနဲ့ လုပ်ကိုင်စေတာဖြစ်တာကြောင့် သူတို့ရဲ့ ပို့ဆောင်မှုမှတ်တမ်းကို လစဉ်တောင်းပါတယ်။ အဲဒိ မှတ်တမ်းအသွားအလာတွေအရ သူတို့က ကျွန်တော်တို့ရဲ့ တကယ့် ပြိုင်ဘက်ဖြစ်နေတယ်။ အဲဒါက ကျွန်တော်တို့အတွက် ကြီးမားတဲ့ စိန်ခေါ်မှုဖြစ်ပါတယ်။ အဲဒါကြောင့် သူတို့ရဲ့ တွန်းအားတွေကြောင့်လည်း ပါပါတယ်။ ကျွန်တော်တို့ဘက်ကလည်း ဒီလိုမျိုး ဝန်ဆောင်မှုအသစ်တွေထည့်တယ်ဆိုတာက သူတို့ထက် ကျွန်တော်တို့က ကျော်လွန်ရမယ်၊ သာလွန်ရမယ်ဆိုပြီးတော့ဖြစ်ပါတယ်”ဟု ဆိုသည်။

၎င်းက ဆက်လက်ပြီး “ရိုးသားစွာပြောရရင် ပြည်တွင်းမှာ ဒီအမြန်အချောပို့လုပ်ငန်း ၄ ခုရှိတာက ကျွန်တော်တို့ကို သက်ရောက်မှုရှိပါတယ်။ ဘာလဲဆိုရင် ကျွန်တော်တို့ရဲ့ ဈေးကွက်တွေ ပေးလိုက်ရပါတယ်။ ဒါပေမယ့် အရင်တုန်းက Private,Public,Partnership ဆိုတာ မရှိခင်တုန်းက မြန်မာ့စာတိုက်လုပ်ငန်းဆိုတာက Dominate(စိုးမိုး) -တစ်ဦးထဲ မူပိုင်အဖြစ်လုပ်ကိုင်ခဲ့တာပါ။ ဒါပေမယ့် အမှန်ပြောရရင် ကျွန်တော်တို့က ဝန်ဆောင်မှုကို ပြည်သူတွေကို ပြည့်ပြည့်၀၀မပေးနိုင်ဘူး၊ အဲဒါကြောင့် ပြည်သူတွေ ဝန်ဆောင်မှုကောင်းကောင်းရဖို့အတွက် ပုဂ္ဂလိက လုပ်ငန်းတွေကို ကျွန်တော်ကိုယ်တိုင် ပြည်ထောင်စုဝန်ကြီးကို တင်ပြပြီး ခွင့်ပြုခဲ့တာဖြစ်ပါတယ်”ဟု ဖြည့်စွပ်ပြောဆိုထားသည်။

ထို့အပြင် အစိုးရအနေနှင့် အထက်တွင်ဖော်ပြခဲ့သည့် ပြည်တွင်း၊ပြည်ပပုဂ္ဂလိကလုပ်ငန်းများအပြင် နောက်ထပ် အမြန်အချောပို့ဝန်ဆောင်မှုလုပ်ငန်းပေါင်း ၉ ခုကို ဆက်လက်ခွင့်ပြုသွားမည်ဖြစ်ကြောင်း သိရသည်။

လက်ရှိအချိန်တွင် အစိုးရ၏ မြန်မာ့စာတိုက်လုပ်ငန်း၌ အမှန်တကယ်လုပ်ကိုင်နေသော အရာထမ်းနှင့် အမှုထမ်းပေါင်း ၅၀၀၀ နီးပါးက နိုင်ငံ၏ မြို့ပေါင်း ၃၀၀ နီးပါးသို့ အမြန်အချောပို့လုပ်ငန်းလုပ်ကိုင်နေပြီး  ပြည်ပ ၁၀၂ နိုင်ငံသို့ အမြန်အချောပို့ လုပ်ငန်း များကို ဝန်ဆောင်မှုပေးနေသည်ဟု သိရသည်။

ထို့အပြင် မြန်မာနိုင်ငံတဝှမ်း၌ စာတိုက်ပေါင်း ၁၃၈၂ ခုရှိပြီး ယင်းတို့အနက် စာတိုက်ပေါင်း ၇၈၃ ခုတွင်ငွေကြေးဝန်ဆောင် မှုလုပ်ငန်းများ လုပ်ဆောင်နေသည်။

မြန်မာ့စာတိုက်လုပ်ငန်းအနေနှင့် ၁၉၉၇ ခုနှစ်၊ ဇန်နဝါရီလ ၁ ရက်နေ့တွင် ဂျာမနီအခြေစိုက် DHL Express နှင့် အကျိုးတူ ပူးပေါင်းကာ Myanmar DHL Limited အဖြစ် ကမ္ဘာ့နိုင်ငံပေါင်း (၂၂၇) နိုင်ငံသို့ ပြည်ပအမြန်အချောပို့ လုပ်ငန်းများ ချိတ် ဆက်လုပ်ကိုင်လျက်ရှိသည်ဟု သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly