ရန်ကုန်၊ ဖေဖော်ဝါရီ ၂၄ ။ ။ ဘင်္ဂလားဒေ့ရှ်ဘက်မှ ပေးပို့ထားသည့် ဒုက္ခသည် ၈ထောင်ကျော်စာရင်းတွင် အချက်အလက်မပြည့်စုံမှုများကြောင့် နှစ်နိုင်ငံအကြားသဘောတူညီချက်တွင် ပါရှိသည့်အတိုင်း တိကျစွာ ပြန်ပို့ရန် မြန်မာနိုင်ငံဘက်မှ တောင်းဆိုထားကြောင်း သိရသည်။
ပြီးခဲ့သည့် ဖေဖော်ဝါရီလ ၁၅ ရက်နေ့၊ ဒါကာမြို့တွင် ပြုလုပ်ခဲ့သော နှစ်နိုင်ငံပြည်ထဲရေးဝန်ကြီးများ အစည်း အဝေးအရ ဘင်္ဂလားဒေ့ရှ်ဘက်မှ ပထမအသုတ် လူဦးရေ ၈၀၃၂ ဦး စာရင်း ပေးအပ်ခဲ့ခြင်း ဖြစ်သည်။
“ အကုန်လုံးပဲဗျ။ အဲ့ဒါကြောင့် ရရှိတဲ့အချက်အလက်တွေကို ရသလောက်စစ်ထား ပြီးတော့ နိုင်ငံခြားရေးက တစ်ဆင့် ဘင်္ဂလားဒေ့ရှ်ကိုပြန်ပြီးတော့ နောက်ဆုံး MOU ထဲက ပုံစံအတိုင်းပြန်ပို့ပေးဖို့ တောင်းဆိုထားပါတယ်” ဟု လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ အမြဲတမ်းအတွင်းဝန် ဦးမြင့်ကြိုင်က ပြောသည်။
အဆိုပါ သဘောတူညီချက်တွင် အထောက်အထားအချက်အလက်များ၊ မိသားစုဓာတ်ပုံများ ၊ တစ်ဦးချင်း ဓာတ်ပုံများ ပါဝင်ပြီး ပြန်ဝင်လာမည့်သူများနှင့် တိုက်ဆိုင်စစ်ဆေးရန်ဆိုသည့် အချက်များ ပါဝင်သည်။
“ မြန်မာနဲ့ ဘင်္ဂလားဒေ့ရှ်နဲ့ထိုးထားတဲ့ MOU ပုံစံနဲ့ မဟုတ်ဘဲနည်းနည်းလွဲနေ တာပေါ့နော်။ အဓိကတော့ ဘာတွေမပါဘူးလဲဆိုလို့ရှိရင် မိသားစုတစ်ခုကို လျောက်လွှာတစ်စောင်ဆိုပေမယ့် အဲ့ဒီထဲမှာ ဓာတ်ပုံလည်း ပါတယ်။ နောက်တစ်ခါ မိသားစုဝင်တစ်ယောက်ချင်းစီရဲ့ ပုံတွေလည်းတပ်ပေးရမယ်။ နောက်ပြီးတော့ လက်ဗွေ တွေ နှိပ်ရမှာပေါ့နော်။ အခု အဓိက လက်ဗွေတွေ မပါလာဘူး။ နောက်တစ်ခုက တစ်ယောက်ချင်းစီကို ဓာတ်ပုံ နည်းပညာနဲ့ တိုက်ဆိုင်စစ်ဆေးလို့ရအောင် တစ်ယောက်ချင်းဓာတ်ပုံတွေမပါလာဘူး ” ဟု အမြဲတမ်း အတွင်း ဝန် ဦးမြင့်ကြိုင်က ဆိုသည်။
ပြန်လည်လက်ခံရာတွင် မြန်မာအစိုးရဘက်မှ တစ်ဦးချင်းစီကို ဓာတ်ပုံဖြင့် တိုက်ဆိုင်စစ်ဆေးရန်လိုအပ်နေပြီး လက်ဗွေနှိပ်ရန်လိုအပ်ခြင်းမှာလည်း အခြားသူ၏ တိုက်တွန်းချက် မပါဘဲ မိမိဆန္ဒဖြင့် ပြန်လာကြောင်းနှင့် တည်ဆဲဥပဒေအတိုင်း လိုက်နာမည်ဆိုသည့်အချက်အတွက်ဖြစ်သည်ဟု ၎င်းကဆက်လက်ပြောသည်။
လက်ရှိတွင် ဓာတ်ပုံများနှင့် လက်ဗွေစာရင်းများ မပါရှိသောကြောင့် တစ်ဦးလျှင် ၂ နာရီခန့်အထိ မြန်မာဘက်မှ စစ်ဆေးနေရပြီး စာရင်းအချက်အလက်များ ပြည့်စုံပါက စစ်ဆေးချိန် ၂ မိနစ်ခန့်သာကြာမြင့်မည်ဟု မြန်မာ ဘက်မှ သိရသည်။
အာရဗီဘာသာအသံထွက်ကို အင်္ဂလိပ်လိုပြန်ရေးသားသည့်အသံထွက်ကိစ္စတွင် လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အနေဖြင့် ခက်ခဲမှုအချို့ ရှိနေကြောင်း သိရသည်။
လွန်ခဲ့သည့် ဇန်နဝါရီလကတည်းက ဘင်္ဂလားဒေ့ရှ်ဘက်သို့ ထွက်ပြေးသူများကို ပြန်လက်ခံရန် နှစ်နိုင်ငံ အကြား သဘောတူညီထားခဲ့သော်လည်း ဘင်္ဂလားဒေ့ရှ်နိုင်ငံဘက်မှ အဆင်သင့်မဖြစ်သေးမှုများကြောင့် နေရပ်ပြန်ပို့ရေးလုပ်ငန်းစဉ်များ ကြန့်ကြာနေရခြင်းလည်းဖြစ်သည်။
