ကချင်နိုင်ငံရေးပါတီ ၃ ခုပေါင်းစည်း၍ ပါတီသစ် ဖွဲ့စည်းမှု မတ်လ ၃၁ ရက်နေ့တွင် လူထုအတည်ပြုမှု ရယူမည်

ကချင်နိုင်ငံရေးပါတီ ၃ ခုပေါင်းစည်း၍ ပါတီသစ် ဖွဲ့စည်းမှု မတ်လ ၃၁ ရက်နေ့တွင် လူထုအတည်ပြုမှု ရယူမည်
ဓါတ်ပုံ ဒေါက်တာတူးဂျာ (Tu Ja Manam) ဖေ့ဘုတ်

ဖေဖော်ဝါရီလ ၂၀ ရက်၊ ၂၀၁၈ ခုနှစ်။ ချင်းမိုင်(မဇ္ဈိမ)။                   ကချင်အမျိုးသားကွန်ကရက်ပါတီ (Kachin National Congrass Party-KNCP) ဟူသော အမည်ဖြင့် ကချင်နိုင်ငံရေးပါတီ ၃ ခု ပေါင်းစည်း၍ ပါတီသစ် ဖွဲ့စည်းခြင်းကို လာမည့် မတ်လ ၃၁ ရက်နေ့တွင် ကချင်ပြည်သူလူထုအား ဖိတ်ခေါ်၍ သဘောထား အတည်ပြုချက် ရယူမည် ဖြစ်ကြောင်း သိရသည်။

 ဖေဖော်ဝါရီလ ၂၀ ရက်နေ့က ကချင်ပြည်နယ် မြစ်ကြီးနားမြို့ မနောကွင်းရှိ မဂျွယ်ခန်းမတွင် ကချင်နိုင်ငံရေးပါတီများ ပေါင်းစည်းရေး ကော်မတီ၏ အထူးအစည်းအဝေး ပြုလုပ်၍ ကချင်အမျိုးသားကွန်ကရက်ပါတီ(KNC)၊ ကချင်ပြည်နယ် ဒီမိုကရေစီပါတီ(KSDP )၊ ကချင်ဒီမိုကရက်တစ်ပါတီ (KDP)တို့မှ ပါတီဗဟိုကော်မတီဝင်များနှင့် ပါတီဝင်များက ပါတီသစ်ဖွဲ့စည်းခြင်းကို တရားဝင် တွေ့ဆုံဆွေးနွေး၍ ဆုံးဖြတ်ခဲ့ခြင်း ဖြစ်သည်။

 “ဒီနေ့က သုံးပါတီက ပါတီဝင်တွေကို အခုပါတီပေါင်းစည်းရေး လုပ်ဆောင်နေနိုင်တဲ့အပိုင်းတွေကို ရှင်းပြတာပါ။ ဒီအဆင့်မှာ ရောက်ပြီဆိုတာကို ရှင်းပြတာပါ။ သုံးပါတီက ပေါင်းစည်းဖို့ ပါတီနာမည်၊ လိုဂိုတွေ ယာယီ ရွေးထားတာပေါ့။ ကျနော်တို့ ဒီလို ရွေးထားတယ်ဆိုတာကို မတ်လ ၃၁ ရက်နေ့ လူထုညီလာခံမှာ တင်ပြမယ်။ အဲဒီညီလာခံကနေမှ ပြင်ဆင်ဖြည့်စွက်ပြီး သူတို့ အတည်ပြုပေးတာကို ယူဖို့ပေါ့”ဟု KSDP ပါတီ ဥက္ကဌ ဒေါက်တာ တူးဂျာက ပြောသည်။

 ပြီးခဲ့သည့် ဖေဖော်ဝါရီလ ၁၅ ရက်က ပြုလုပ်သော သုံးပါတီပေါင်းစည်းရေးအစည်းအဝေးမှ ပါတီသစ်အမည်၊ ကချင်အမျိုးသားအလံ တံဆိပ်ဖြစ်သော ဓါးနှစ်လက်နှင့် အောက်ခံအစိမ်းနှင့် အပေါ်ပိုင်းအနီ အလံ သုံးရန်နှင့် လိုဂို သည်လည်း အလံ၏ ညာဘက် အပေါ်ထောင့်တွင် ကြယ်ဖြူတစ်စင်း ထည့်သွင်းရန် ဆုံးဖြတ်ခဲ့ခြင်း ဖြစ်သည်။

 “ပေါ်လစီက သုံးပါတီက ရှိပြီးသား ပေါ်လစီကို စုစည်းလိုက်ပြီးတော့မှ တူညီတာ ရွေးထုတ်ယူလိုက်တယ်။ ရွေးယူပြီးတော့ ထပ်ဖြည့်တာတွေ ရှိတာပေါ့။ အဲဒါက လူထုညီလာခံပြီးနောက် ထုတ်ပြန်မယ်။ အဓိကပေါ်လစီက ငြိမ်းချမ်းရေး၊ ဖက်ဒရယ်ပေါ့။ ဒီမိုကရေစီထွန်းကားရေး၊ ဒေသဖွံ့ဖြိုးရေး၊ ၂၀၀၈ ဖွဲ့စည်းပုံ ပြုပြင်ရေးပါတယ်။ ပညာရေး၊ ကျန်းမာရေး၊ အမျိုးသမီးနဲ့ လူငယ်တွေကို ဦးစားပေးမယ် ဆိုတဲ့ချမှတ်ထားတာတွေကို စုစည်းလိုက်တယ်”ဟု ဒေါက်တာ တူးဂျာက ဆက် ပြောသည်။

 ယနေ့ ပြုလုပ်သော ဆွေးနွေးပွဲတွင် ၂၀၁၃ ခုနှစ်မှ ၂၀၁၈ ခုနှစ်ထိ ကချင်နိုင်ငံရေးပါတီများ ပေါင်းစည်းရန်အတွက် ကျော်ဖြတ်ခဲ့သော အခက်အခဲများ၊ ပါတီများ၏ ဖြတ်သန်းမှု နောက်ခံသမိုင်းများကို ရှင်းပြခဲ့ပြီး ကချင်နိုင်ငံရေးပါတီများ ပေါင်းစည်းရေးကော်မတီ၏ နိုင်ငံရေးမူဝါဒများနှင့် ရှေ့လုပ်ငန်းစဉ်များကို ချမှတ်ခဲ့သည်ဟု ကချင်နိုင်ငံရေးပါတီများ ညှိနှိုင်းပူးပေါင်းဆောင်ရွက်ရေးကော်မတီ (KPCC)မှ ပြည်သူ့ဆက်ဆံရေး တာယန်ခံ ဦးဘရန်အောင်က ပြောသည်။ 

(၁) ပြည်နယ်ပေါင်းစုမူကို အခြေခံသော ပြည်ထောင်စုမူအပေါ် ရပ်တည်ရန်၊ (၂) ဖက်ဒရယ်စနစ်ကို အခြေခံသော ဖက်ဒရယ် ဒီမိုကရေစီ ပြည်ထောင်စု စနစ်ကို ဖော်ဆောင်သွားရန်၊(၃) နိုင်ငံသားများ၏ အကျိုးစီးပွားကို ရှေ့ရှုသော သာတူညီမျှ စီးပွားရေးစနစ်ကို ဖော်ဆောင်သွားရန်နှင့်(၄) နိုင်ငံတကာ အဆင့်မှီသော ပညာရေးစနစ်၊ ကျန်းမာရေးစနစ်နှင့် ငြိမ်းချမ်းသာယာဖွံ့ဖြိုးတိုးတက်သော လူမှုဘဝ တည်ဆောက်သွားရန် အချက် ၄ ချက်ကို ချမှတ်ခဲ့သည်ဟု ဖေဖော်ဝါရီလ ၂၀ ရက်က ကြေငြာချက် ထုတ်ပြန်ခဲ့သည်။

 ပြီးခဲ့သည့် ဇန်နဝါရီလ ၁၃ ရက်နေ့က၎င်းကချင်နိုင်ငံရေးပါတီ ၃ ပါတီ ပေါင်းစည်းရန် သဘောတူ စာချွန်လွာ လက်မှတ် ရေးထိုးခဲ့ပြီးနောက် သုံးပါတီပေါင်း၍ ပါတီ အမည်သစ် ဖွဲ့စည်းကြောင်း ပါတီဝင်များကို တရားဝင် ရှင်းလင်းခဲ့ခြင်း ဖြစ်သည်။ ယနေ့ ဆွေးနွေးပွဲတွင် ပါတီဝင်များ ၂၀၀ ခန့် တက်ရောက်ခဲ့သည်ဟု သိရသည်။

 ကချင်နိုင်ငံရေးပါတီများ ပေါင်းစည်းရေးကော်မတီ အဖွဲ့ဝင်ဖြစ်သော လောင်ဝေါ် အမျိုးသားစည်းလုံး ညီညွတ်ရေးနှင့် ဖွံ့ဖြိုးရေးပါတီ (LNUD) နှင့် အဖွဲ့ဝင် မဟုတ်သော လီဆူအမျိုးသားဖွံံဖြိုးတိုးတက်ရေးပါတီ (ဒူးလေးပါတီ)-LNDP တို့နှင့်ပူးပေါင်းသွားရန် မရှိသေးသော်လည်း ဆက်လက် ညှိနှိုင်းသွားမည် ဖြစ်ကြောင်း သိရသည်။

 

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly