ရေနံစျေးနှုန်း ကျဆင်းမှုကြောင့် ရုရှရူဘယ်မှာ ရလတာအတွင်း အနိမ့်ဆုံးသို့ ပြိုဆင်း

ရေနံစျေးနှုန်း ကျဆင်းမှုကြောင့် ရုရှရူဘယ်မှာ ရလတာအတွင်း အနိမ့်ဆုံးသို့ ပြိုဆင်း

မော်စကို၊ သြဂုတ် - ၂၄ ။         ။ နိုင်ငံ၏ အဓိကပို့ကုန်ဖြစ်သော ရေနံဈေးနှုန်းမှာ ထပ်မံကျဆင်း သွားပြန်သောကြောင့် ရုရှရူဘယ်ငွေကြေးမှာ သြဂုတ်၂၄ရက်နေ့တွင် ၇လတာအတွင်း အနိမ့်ဆုံးအဖြစ် ၂.၃ရာခိုင်နှုန်း ထိုးဆင်းသွားခဲ့သည်။

ရုရှဈေးကွက်များမှာ စွမ်းအင်ဈေးနှုန်း နိမ့်ဆင်းမှုအပြင် အနောက်အုပ်စု၏ ဒဏ်ခတ်ပိတ်ဆို့မှုများကိုပါ ခါးစည်းခံနေရရာ မော်စကိုဈေးကွက် အစောပိုင်းအရောင်းအဝယ်တွင် ဇန်နဝါရီ ၃၀နောက်ပိုင်း အနိမ့်ဆုံးအဖြစ် အမေရိကန်၁ဒေါ်လာကို ၇၀.၇ရူဘယ်ဖြင့် အရောင်းအဝယ်ဖြစ်ခဲ့သည်။

ရေနံမှာ ရုရှစီးပွားရေး၏ ပင်မကျောရိုးပင်ဖြစ်ရာ ရေနံဈေးနှုန်း ကျဆင်းသည်နှင့်အမျှ ရူဘယ်ငွေမှာလည်း တစ်ပါတည်း ကျဆင်းသွားရသည်။ သောကြာနေ့က ရေနံကန်ထရိုက်မှာ ၂၀၀၉ခုနှစ်နောက်ပိုင်း ပထမဆုံးအကြိမ်အဖြစ် တစ်စည်လျှင် ဒေါ်လာ ၄၀အောက်သို့ ကျဆင်းသွားခဲ့ပြီးနောက် သြဂုတ်လ ၂၄ရက်နေ့တွင် တစ်စည်လျှင် ၃၉.၂၂ဒေါ်လာဈေးနှုန်းအထိ ၁.၂၃ဒေါ်လာ ထပ်မံကျဆင်းသွားခဲ့သည်။

ရုရှအာဏာပိုင်များကမူ ရုရှစီးပွားရေးမှာ ဆုတ်ယုတ်ကျဆင်းမှုဒဏ်ကို ကြံ့ကြံ့ခံနိုင်လောက်အောင် သန်စွမ်းအားကောင်းနေသည်ဟု အကြောက်အကန် ပြောဆိုနေကြသည်။

သြဂုတ်လ ၂၄ရက်နေ့က သတင်းထောက်များကို ပြောကြားရာတွင်မူ ရေနံဈေးမှာ တစ်စည် ဒေါ်လာ၄၀အောက်တွင် ရေရှည်တည်တံ့နေလိမ့်မည်ဟု မျှော်လင့်မထားကြောင်း စီးပွားရေးဖွံ့ဖြိုးမှုဝန်ကြီး အလက်ဇီ အူယူကာယက်ဖ်က ပြောကြားခဲ့သည်။ ရုရှအစိုးရမှာ ၎င်း၏ အသုံးစရိတ်များကို ရေနံဈေးနှုန်း တစ်စည်ဒေါ်လာ ၅၀ ခန့်မှန်းချက်အပေါ် အခြေခံ၍ ဘတ်ဂျက်ရေးဆွဲထားခြင်းဖြစ်သည်ဟုဆိုသည်။

Mizzima Weekly