ဖေဖော်ဝါရီ ၁ ။ ။ အစိုးရလျှို့ဝှက်ချက် အက်ဥပဒေဖြင့် ဖမ်းဆီးခံထားရသည့် ရိုက်တာသတင်းဌာနမှ သတင်းထောက် ကိုဝလုံးနှင့် ကိုကျော်စိုးဦးတို့ နှစ်ဦးအား အမြန်ဆုံး ပြန်လွှတ်ပေးရန် မိမိတို့ နောက်တစ်ကြိမ် ထပ်မံ တောင်းဆိုသည်ဟု ဒိန်းမတ်သံရုံးမှ ယနေ့ ထုတ်ပြန်သည်။
ယနေ့ ဖေဖော်ဝါရီလ ၁ ရက်တွင် ရန်ကုန်မြောက်ပိုင်းခရိုင်တရားရုံး၌ ၃ ကြိမ်မြောက်ရုံးထုတ်ခဲ့ရာ ၎င်းတို့ နှစ်ဦး၏ အာမခံ တောင်းဆိုမှုနှင့်ပတ်သက်၍ ခွင့်ပြုရန် ရှိမရှိ ယနေ့ ဆုံးဖြတ်သွားရန် ရှိနေသည်။
ပြီးခဲ့သည့် သီတင်းပတ်က ၎င်းတို့နှစ်ဦးအား တရားရုံး ရုံးထုတ်ခဲ့ရာတွင်လည်း ဒိန်းမတ်သံရုံးမှလည်း တက်ရောက်ထားခဲ့ပြီး ရုံးထုတ်ခဲ့စဉ်အတွင်း ၎င်းတို့နှစ်ဦးအပေါ် စွဲဆိုထားချက်များနှင့်ပတ်သက်၍ သက်သေ အထောက်အထားခိုင်မာစေရန် တရားရုံးသို့ တင်ပြသည့် စာရွက်စာတမ်းတွင် ရှေ့နောက်မကိုက်ညီမှု များ ရှိနေသည်ကို တွေ့ခဲ့ရသည်ဟု သံရုံး၏ ယနေ့ ထုတ်ပြန်ချက်တွင် ဖော်ပြထားသည်။
ထို့ကြောင့် ရိုက်တာ သတင်းထောက်နှစ်ဦးအား အမြန်ဆုံး ပြန်လွှတ်ပေးရန် ထပ်မံတောင်းဆိုလိုက်ပြီး မီဒီယာအခန်းကဏ္ဍအပေါ် အပြည့်အ၀ လေးစားတန်ဖိုးထားရေးကိုလည်း ဒိန်းမတ်သံရုံးက တောင်းဆိုလိုက် သည်။